2013 جىلى قىتاي عالىمدارىنىڭ يدەياسىمەن روبوت-جورنالشى «Xiao Nan» جاسالعان. ول 300 تاڭبادان تۇراتىن جاڭا جىل كەزىندە ترافيكتىڭ جوعارىلاۋى تۋرالى جازبانى اياقتاۋعا ءبىر سەكۋند جۇمساعان. ماقالاسى «Southern Metropolis Daily» گازەتىندە شىقتى.
– كوررەسپوندەنتتەرمەن سالىستىرعاندا, «Xiao Nan» كولەمدى ماقالالاردى تەزىرەك جازادى. تەرەڭ اناليتيكالىق ماقالالار نەمەسە شولۋلار جاسايدى. بىراق بۇل روبوتتار جاقىن ارادا جۋرناليستەردى الماستىرادى دەگەندى بىلدىرمەيدى. سەبەبى قۇلتەمىرلەر سۇحباتتى ءوز بەتىنشە جۇرگىزە المايدى, سۇحباتتاسۋشىنىڭ سۇراقتارىنا ءينتۋيتيۆتى تۇردە جاۋاپ بەرە المايدى. ماقالانىڭ تاقىرىپتارىن ءوز بەتىنشە تاڭداي المايدى. دەگەنمەن ۋنيۆەرسيتەت قىزمەتكەرلەرى «Southern Metropolis Daily» كومپانياسىمەن بىرلەسىپ, باق-تا روبوتتاردى پايدالانۋ بويىنشا ارنايى زەرتحانا قۇرۋ ءۇشىن جۇمىس ىستەپ جاتىر. الداعى ۋاقىتتا روبوت-تىلشىلەر كەمەلدەنە تۇسەدى, – دەدى بەيجىڭ ۋنيۆەرسيتەتىنىڭ پروفەسسورى ۆان سياوتسزيۋن.
ال «The Los Angeles Times» باسىلىمىنىڭ روبوت-ءجۋرناليسى «Quakebot» 2014 جىلى كوليفورنيادا بولعان جەر سىلكىنىسىن 3 مينۋتتا-اق جازىپ بەرگەن. ال «كەن شۆەن» اقپاراتتى وڭدەمەي-اق الگوريتم ەسىمىمەن جاريالاعان. روبوت 2 جىل كولەمىندە جۇمىس جاسايدى. ورفوگرافيالىق قاتەلىكتەردىڭ بولۋىنا قاراماستان, ونىڭ ماقالالارى وتكىر. بۇگىندە روبوت-جۋرناليست 10 ميلليون ادامى بار اۋماقتى باقىلاۋدا ۇستايدى. سونىمەن قاتار قايتىس بولعان ادامداردىڭ, ۇرلىق-قارلىقتىڭ, قىلمىستىڭ سانىن ەسەپتەپ, ءوزىنىڭ يەسى, ونەرتاپقىش ءارى جۋرناليست كەن شۆەنگە جىبەرەدى.
2014 جىلى شۆەد زەرتتەۋشىسى كريستەر كليرۆولل روبوت-جۋرناليستەر جازعان جاڭالىقتاردى وقىرمان قالاي قابىلدايدى دەپ تالداۋ جۇرگىزدى. ول امەريكالىق فۋتبول ماتچى تۋرالى ماقالانىڭ ەكى نۇسقاسىن مەديالىق جانە كوممۋنيكاتسيالىق زەرتتەۋ فاكۋلتەتىنىڭ ستۋدەنتتەرىنە كورسەتتى. ەكسپەريمەنت قاتىسۋشىلارى ماتەريالداردى جۋرناليست نەمەسە روبوتتىڭ دايىنداعانىن انىقتاۋ كەرەك. ءماتىن اعىلشىن تىلىندە جازىلدى. سۋرەتتەر بولمادى. قوس ءماتىن – بىردەي كولەمدە. زەرتتەۋ ناتيجەسىندە قاتىسۋشىلار ماقالانى كىم جازعانىن اجىراتا المادى. 27 رەسپوندەنتتەن 10 قاتىسۋشى روبوت-جۋرناليست جاساعان ماتەريالدى ادام جازدى دەپ قاتەلەستى.
«سىرتىم – قۇرىش,ءجۇزىم – بولات, تاسقا دا سالساڭ مايرىلمان» دەگەن ءسوزدى اقتامبەردى جىراۋ ءتورت عاسىر بۇرىن ايتىپ ەدى. روبوت-جۋرناليستەر ايتسا دا, جاراساتىنداي-اق ەكەن.
