قازاقستان شەكاراسىنىڭ كەيىنگى 80 جىلدىق تاريحى وسى باسىلىم بەتتەرىنىڭ تىگىندىسىندە. اعا بۋىن شەكاراشىلاردان باستاپ بۇگىنگى قىزمەتكەرلەردىڭ ەڭبەگى مەن قىزمەتى. وتان تىنىشتىعى ءۇشىن جانىن پيدا ەتۋگە دايىن ەرلەردىڭ ەڭبەگىن ايگىلەپ جۇرگەن «وتان ساقشىسى – چاسوۆوي رودينى» گازەتىنىڭ تىلشىلەرى – ۇقك شەكارا قىزمەتىنىڭ وڭىردەگى دەپارتامەنتتەرىنىڭ اسكەري جۋرناليستەرى ساناتىندا. سايدىڭ تاسىنداي تىلشىلەر قوسىنى مۇندا شەكاراشىلاردىڭ ەل شەبىندەگى ءومىرىن قالت جىبەرمەي, تىنىمسىز تىرشىلىكتەرى تۋرالى قالام تەربەيدى. شەكارا تىنىسى مەن شەكاراشىنىڭ جۇرەك قاعىسىنا قۇلاعىن توسەيدى.
شەكاراشىلار باسىلىمىنىڭ العاشقى ءنومىرى ەكىنشى دۇنيەجۇزىلىك سوعىس قىزىپ تۇرعان 1943 جىلى 10 شىلدەدە وقىرمان قولىنا ءتيىپتى. قازاق رەداكتسياسىنىڭ تۇڭعىش رەداكتورى ساعيدوللا سيقىمباي ۇلى اسكەري شەنى پولكوۆنيك بولعانىمەن, جۋرناليستەر اراسىندا «پوگونسىز گەنەرال» اتانعان. «ساكەڭنىڭ ءىزى شەكارادا سايراپ جاتىر» دەيدى بىلەتىندەر. سوندىعىنان شەكاراشىلار ومىرىنەن سىر شەرتكەن پۋبليتسيستيكالىق جانرداعى كىتاپتاردىڭ قاتارى جىل وتكەن سايىن مولايىپ كەلەدى. وتكەن جىلى «سەكسەن جىلدىق شەجىرە» دەگەن اتپەن كىتاپ بولىپ شىقتى.
وسىنداي شەجىرەگە باي گازەتتى بۇگىندە پودپولكوۆنيك راحات نۇرعاليەۆ باسقارادى. ەل شەبىندەگى تىلشىلەر قاتارىن ماسكەۋدەگى اسكەري جۋرناليستەردى دايارلايتىن جوعارى اسكەري وقۋ ورنىن بىتىرگەن ەكى تۇلەك تولىقتىردى. سونداي-اق «OS-چر» گازەتىنىڭ جانىنان ۆيدەوستۋديا قۇرىلعانىن ايتا كەتكەن ءجون. اعا لەيتەنانت ايان قايىر باستاعان ءتۇسىرىلىم توبى شەكارا قىزمەتىنىڭ اياسىندا ءوتىپ جاتقان اۋقىمدى جيىنداردان تابىلىپ, تۇششىمدى دۇنيەلەر جاساۋدىڭ شەبەرلەرىنە اينالعان دەسەك, ارتىق ايتقاندىق ەمەس.
گازەت تىلشىلەرى وڭىردەگى بۇقارالىق اقپارات قۇرالدارىمەن تىعىز قارىم-قاتىناستا. شەكاراشىلار تۋرالى بىرنەشە دەرەكتى فيلم ءتۇسىرىلىپ, «قاھارMەN» اسكەري-پاتريوتتىق باعدارلاماسىنىڭ شىعارماشىلىق ءتۇسىرىلىم توبى الماتى وبلىسى بويىنشا دەپارتامەنتىنىڭ ۋچاسكەسىندەگى شەكارا بولىمشەلەرىنەن تۇششىمدى دۇنيەلەر جاسادى.
كاپيتان اسحات ءجاناليپوۆتىڭ قارىمدى قالامىنىڭ ارقاسىندا كاسپي تەڭىزىنىڭ بايلىعى – بەكىرەگە كوزىن الارتقان قانشاما براكونەر تەڭىزشى شەكاراشىلاردىڭ قۇرىعىنا ءىلىندى. مۇندا قانداي اۋقىمدى شەكارالىق وپەراتسيالار ءوتىپ جاتاتىنىنان دەر كەزىندە حاباردار بولىپ وتىرادى.
مايور ماناربەك قارەكەنوۆ جەتىسۋ وبلىسى بويىنشا دەپارتامەنتىنىڭ شارالارىن رەسپۋبليكالىق, وبلىستىق باق-قا شىعارىپ, حالىققا جاريالاپ كەلەدى. جاقىندا وڭىردەگى جۋرناليستەر الاكول اۋدانى بويىنشا شەكارا باسقارماسى قىزمەتىنىڭ, قاربالاستان تۇراتىن شەكارا بولىمشەلەرىنىڭ بىرىندە بولىپ, شەكاراشىلاردىڭ ومىرىمەن تانىسىپ قايتتى.
بيىلعى قىركۇيەك ايىندا اشىلعانىنا شيرەك عاسىر تولاتىن سارىاعاش اۋدانى بويىنشا شەكارا باسقارماسىنىڭ العاشقى جىلدارداعى ءومىرى تاجىك-اۋعان شەكاراسىنداعى «ىستىق نۇكتەدەن» كەم بولماعانىن جەرگىلىكتى حالىق جاقسى بىلەدى. گازەتتىڭ وسى وڭىردەگى مەنشىكتى ءتىلشىسى – تۇركىستان وبلىسى بويىنشا دەپارتامەنتىنىڭ كونسۋلتانتى مايور راۋان نۇرمەت وڭتۇستىكتەگى شەكاراشىلاردىڭ ەرلىگى جونىندە ماتەريالدار جاريالاپ, جاس ساربازدار مەن وفيتسەرلەردى وتانسۇيگىشتىككە تاربيەلەۋدە جانە جاۋىنگەرلىك رۋحتى كوتەرۋگە ۇلەسىن قوسىپ كەلەدى. قىسقاسى, ەلىمىزدىڭ باتىسى مەن شىعىسىنداعى, وڭتۇستىگى مەن سولتۇستىگىندەگى وتان قالقاندارىنىڭ ءومىرى اسكەري جۋرناليستەر نازارىندا. ەل مەن جەردىڭ اماندىعىن قىراعىلىقپەن قورعاۋشىلار بار دا اسكەري جۋرناليستيكانىڭ دا جالاۋى جەلبىرەي بەرەدى. شەكاراشىلار قايدا بولسا, اسكەري جۋرناليستەر دە سوندا!
