– ءبىزدىڭ ۇيدەگى زامانداسىڭنىڭ پىسىرگەن پالاۋى پالاۋ ما ءتايىرى, – دەپ وزەۋرەدى ارىپتەسىم, – انشەيىن كۇرىش بوتقاسى عوي. ال جازعى دامحاناداعى پالاۋدىڭ ءدامى ءتىل ۇيىرەتىن كورىنەدى.
جاقسىنى كورمەك ءۇشىن دەپ باردىق. ءتۇس مەزگىلى بولسا دا ادام كوپ ەمەس ەكەن. ءدامحانانىڭ يەسى رەنجيتىن جاعدايعا ءبىز قۋانىپ قالدىق. ماقتاۋلى پالاۋىنان الىپ بوس ۇستەلدىڭ بىرەۋىنە جايعاستىق. استى الدىمىزعا ەندى الا بەرگەندە تورعايلاردىڭ قاپتاپ كەتكەنى. ەندى بايقادىم, قالا ىشىندە اۋىزدارىنا ىلىگەر ازىق تاپپاي ءۇيىر-ءۇيىر بولىپ كوشىپ جۇرەتىن تورعاي بىتكەن جازعى ءدامحانانى پانالاپتى. كورشى ۇستەلدە وتىرعان بوزبالا مەن بويجەتكەن الدارىنداعى ناننىڭ قيقىمىن ۇگىتىپ, ەدەنگە شاشىپ وتىر. وسى جەردەن ادام قولىنان ازىق جەپ دانىككەن تورعايلار ءتىپتى ۇركەتىن ەمەس. كىشكەنتاي باستارىن قىلتىڭ-قىلتىڭ ەتكىزىپ ەكەۋ-ۇشەۋى ءبىزدىڭ داستارقانعا دا قوندى. ءبىزدى دە ەل دەپ كەلىپ تۇر عوي دەپ ىرىمىن جاسادىق. اس ءىشىپ بولعانشا شىداساق نەتتى. الگىندەي بولماي قالىڭ تورعاي قاپتادى دا كەتتى. الدە شيقىلداپ ءبىرىن-ءبىرى شاقىردى ما ەكەن, شاقىرمادى ما ەكەن كىم ءبىلسىن. كورشى ۇستەلدە اس ءىشىپ وتىرعان الدەبىرەۋ پالاۋ باساتىن كاۆكازدىققا وكپەسىن ءبىلدىرىپ جاتىر.
– مىنا تورعايلارىڭ ادامعا تاماق ىشتىرمەيدى عوي ءتايىرى, – دەدى ول, – بۇدان بىلاي تابالدىرىقتارىڭدى اتتاماسپىن.
قوناعىنىڭ قاباعىنا قاراعان كاۆكازدىق بارماق باسىنداي كىشكەنتاي تورعايعا ءداۋ وجاۋىن الا ۇمتىلدى. شىرىلداي شيقىلداپ تاماق دامەتكەن بايعۇستى ءبىر ۇرىپ جاپىرىپ تاستاماق. ءدال وسى كەزدە 7-8 جاسار بالا اسپازدىڭ بىلەگىنە جارماستى.
– تيمەڭىز, تورعايعا! – دەدى ورىكپىگەن ۇنمەن.
اڭگىمەنىڭ بايىبىنا بارا الماي جايباراقات وتىر ەدىك, الگى بالانىڭ الدە اكەسى, بالكىم اعاسى ما ەكەن, ەگدە جىگىت كولدەنەڭنەن كيلىگە كەتتى. بارماق باسىنداي تورعايدى تاپتاپ تاستاماق بولعان كاۆكازدىقتىڭ سىباعاسىن بەرىپ جاتىر. قاراپ وتىرا الماي, ەكى كوزى جايناپ تۇرعان بالاقايدى قاسىمىزعا شاقىردىق.
– اتىڭ كىم, ق ۇلىنىم؟ – دەدىك ءبىز.
– تالاپپىن, – دەدى كىشكەنتاي بالا, – اناۋ اعاي جازىقسىز تورعايدى نەگە ولتىرمەك؟ ءبىزدىڭ دالانىڭ تورعايى عوي.
سوندا بارىپ بالانىڭ شىن نيەتى سانامىزعا جەتكەنى. شىركىن-اي, بالا بىتكەننىڭ ءبارى ءوز ەلىنىڭ, ءوز جەرىنىڭ تورعاي ەكەش تورعايىن قورعايتىن تالاپتاي بولسا عوي, شىركىن!
كوكشەتاۋ
