فوتو: قر مقىا ءباسپاسوز قىزمەتى
كەزدەسۋدىڭ نەگىزگى ماقساتى – ۇيىمعا قاتىسۋشى ەلدەردىڭ مەملەكەتتىك قىزمەتتەگى ادامي رەسۋرستاردى باسقارۋ سالاسىندا تاجىريبە الماسۋ جانە وزەكتى ماسەلەلەردى تالقىلاۋ.
ءىس-شاراعا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي, تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋراليەۆ, تۇركيا رەسپۋبليكاسى پرەزيدەنتى جانىنداعى ادامي رەسۋرستاردى باسقارۋ كەڭسەسىنىڭ پرەزيدەنتى ساليم اتاي, وزبەكستان رەسپۋبليكاسىنىڭ مەملەكەتتىك قىزمەتتى دامىتۋ اگەنتتىگىنىڭ ديرەكتورىنىڭ ءبىرىنشى ورىنباسارى اميرتەميرحون مۋساەۆ, ازەربايجان رەسپۋبليكاسىنىڭ مەملەكەتتىك ەمتيحان ورتالىعىنىڭ ديرەكتورلار كەڭەسى توراعاسىنىڭ ورىنباسارى باحرام حاليلوۆ, ازەربايجان رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسىنىڭ رەكتورى ۋرحان الاكباروۆ, قىرعىز رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسىنىڭ پرورەكتورى ۋرمات امانباەۆ, سونداي-اق ورتالىق مەملەكەتتىك ورگانداردىڭ اپپارات باسشىلارى قاتىستى.
مقىا توراعاسى دارحان جازىقباي جاھاندانۋ جانە جەدەل تەحنولوگيالىق پروگرەسس جاعدايىندا ۇلتتىق جانە حالىقارالىق دەڭگەيدەگى باسەكەگە قابىلەتتىلىكتىڭ نەگىزى – ادام كاپيتالىنا ەرەكشە كوڭىل ءبولۋدىڭ ماڭىزدىلىعىنا توقتالدى.
«مەملەكەت باسشىسى تۇركى مەملەكەتتەرى ۇيىمىنىڭ كەزەكتەن تىس سامميتىندە ەلدەرىمىز ساياسي, ەكونوميكالىق جانە مادەني ىقپالداستىقتى جاڭا دەڭگەيگە كوتەرۋى قاجەت دەپ ايتىپ وتكەن بولاتىن. سوندىقتان ءبىز ءۇشىن تۇركى الەمىنىڭ ەكونوميكالىق, مادەني جانە الەۋمەتتىك سالالارداعى ۇيلەسىمگە ۇمتىلىسىن ەسكەرە وتىرىپ, مەملەكەتتىك قىزمەتتەگى HR سالاسىندا دا ۇتىمدى شارالار قابىلداۋدىڭ ماڭىزى ەرەكشە. ءبىزدىڭ ماقساتىمىز ءبىر – ول مەملەكەتتىك قىزمەتتە ادام رەسۋرستارىن باسقارۋدىڭ كۇشتى ءارى ۇيلەسىمدى جۇيەسىن قۇرۋ», دەدى دارحان جازىقباي.
بۇگىندە قازاقستاندا مەملەكەتتىك قىزمەتتى جاڭعىرتۋدا HR قۇرالدارىن قولدانۋعا باسىمدىلىق بەرىلىپ, تالانتتى جاستاردى جانە جەكە سەكتوردان كاسىبي مامانداردى تارتۋدىڭ جاڭا تەتىكتەرى ەنگىزىلۋدە. بىلىكتىلىگى مەن سالالىق تاجىريبەسىنە سايكەس كاسىبي ماماندار مەن دارىندى باسقارۋشىلاردى جەكەلەگەن جوعارى لاۋازىمدارعا, ال جوعارى وقۋ ورىندارىنىڭ گرانتپەن بىتىرگەن ۇزدىك تۇلەكتەرىن اۋداندىق جانە اۋىلدىق دەڭگەيدەگى لاۋازىمدارعا كونكۋرسسىز تاعايىنداۋ, «كەلىسىمشارتتىق قىزمەتشى» رەتىندە سالالىق مامانداردى ناقتى جوبالاردى ىسكە اسىرۋعا تارتۋ مۇمكىندىكتەرى بەرىلگەن.
تسيفرلىق ترانسفورماتسيا اياسىندا «e-Qyzmet» جۇيەسىندە ىسكە قوسىلعان مەملەكەتتىك قىزمەتكە ىرىكتەۋدىڭ جاڭا فورماتى قازاقستان ازاماتتارىنا كونكۋرستارعا ونلاين تۇردە قاتىسۋعا جول اشتى. تسيفرلىق ىرىكتەۋ جۇيەسىن ودان ءارى جەتىلدىرۋ ماقساتىندا اگەنتتىكپەن جاساندى ينتەللەكت قۇرالدارىن قولدانۋ ماسەلەسىن قاراستىرۋ جوسپارلاندى.
جيىنعا قاتىسۋشىلار ءوز كەزەگىندە, قازاقستاننىڭ مەملەكەتتىك قىزمەتتى جەتىلدىرۋ باعىتىنداعى قادامدارىن وڭ باعالاپ, وزگەرىستەر داۋىرىندە ادامي كاپيتالدى دامىتۋعا قاتىستى وزەكتى ويلارى مەن وزىق تاجىريبەلەرىن ورتاعا سالدى. ازەربايجاندا تەستىلەۋ قۇرالدارىن كەڭىنەن قولدانۋ, قىرعىزستاندا مەملەكەتتىك قىزمەتشىلەردىڭ تسيفرلىق ساۋاتتىلىعىن ارتتىرۋ, تۇركيادا ۇزدىكسىز وقىتۋ جۇيەلەرىن ىلگەرىلەتۋ, وزبەكستاندا باعالاۋ تەتىكتەرىن جاڭارتۋ جۇمىسى العا قويىلعاندىعى ايتىلدى.
كەزدەسۋ سوڭىندا قاتىسۋشىلار بۇگىنگىدەي باسقوسۋدىڭ مەملەكەتتىك قىزمەتتەگى ادامي رەسۋرستاردى باسقارۋ بويىنشا تاجىريبە الماسۋداعى جانە ۇزدىك شەشىمدەردى ازىرلەۋدەگى ماڭىزىن ەرەكشە اتاپ, ودان ءارى ىنتىماقتاستىقتى نىعايتۋعا نيەتتى ەكەندەرىن ءبىلدىردى.
قىرمىزى جۇماعاليقىزى,
ەۇۋ ستۋدەنتى
