فوتو: ixbt.com
ءمينيستردىڭ ايتۋىنشا, رەسپۋبليكادا ترافيكتىڭ ءوسۋى 2020 جىلعا قاراعاندا 61,5%-عا, ال ابونەنتتەر سانى 12,9%-عا وسكەن. Speedtest Ookla-نىڭ 2024 جىلعى ساۋىردەگى دەرەكتەرىنە سايكەس, ەلىمىز ينتەرنەتتىڭ ورتاشا جىلدامدىعى بويىنشا – 43,6 مبيت/س, الەم بويىنشا 66-ورىندا. بۇل رەسەي, قىرعىزستان, وزبەكستاننان جوعارى كورسەتكىش.
«قازاقستاندا 6 290 اۋىل بار, ونىڭ ىشىندە سىمدى ينتەرنەت ارقىلى وپتيكا 2 606 اۋىلعا جەتكىزىلدى. ۇلتتىق جوبا شەڭبەرىندە ءمجا تەتىگى ارقىلى 3010 اۋىلعا وپتيكالىق بايلانىس جەلىلەرىن قوسۋ كوزدەلگەن. «سوڭعى» تۇتىنۋشى بولماعان جاعدايدا شاعىن جانە ورتا بايلانىس وپەراتورلارىنىڭ كۇردەلى شىعىندارىنىڭ 50%-ىن سۋبسيديالاۋ تەتىگى پايدالانىلادى. ناتيجەسىندە 2,4 ملن ادامنىڭ ينتەرنەتكە قولجەتىمدىلىگى قامتاماسىز ەتىلەدى. بايلانىس وپەراتورلارىنان 340 ملرد تەڭگەدەن استام كولەمدە جەكە ينۆەستيتسيا تارتۋ كوزدەلىپ وتىر. ءموبيلدى ينتەرنەت بۇگىندە 4 866 اۋىلدا قولجەتىمدى. سالىق جەڭىلدىكتەرى اياسىندا 2023 جىلى 1 161 اۋىل 4G تەحنولوگياسىنا قوسىلدى. قالعان 1 424 اۋىل بويىنشا جۇمىس جالعاسىپ جاتىر», دەدى جاسلان ماديەۆ.
ونىڭ ايتۋىنشا, 5G ۇيالى بايلانىسىن ەنگىزۋ 2025 جىلدىڭ سوڭىنا دەيىن اياقتالادى. كسەلل جانە تەلە2 وپەراتورلارى استانا, الماتى, شىمكەنت جانە وبلىس ورتالىقتارىندا 5G بايلانىسپەن قامتۋدى كەڭەيتۋ جۇمىستارىن جالعاستىرادى. بۇگىنگى تاڭدا 20 قالادا 1 144 بازالىق ستانسا ورناتىلعان. 2027 جىلدىڭ سوڭىنا دەيىن ۇيالى بايلانىس وپەراتورلارى تەلەكوممۋنيكاتسيا سالاسىنا 450 ملرد تەڭگەدەن استام ينۆەستيتسيا سالادى.
