«Arlan Biotech» كومانداسى نانودەنەلەردى دايىنداۋ ءۇشىن جاساندى ينتەللەكتىنىڭ وزىق تەحنولوگيالارىن پايدالانادى. جوبا مەديتسينا مەن فارماتسەۆتيكا سالاسى ءۇشىن ماڭىزدى جاڭالىق بولدى. ويتكەنى وسى نانودەنەلەر قاتەرلى ىسىك پەن اۋتويممۋندى اۋرۋلاردى دياگنوستيكالاۋ مەن ەمدەۋدە كەڭىنەن قولدانىلادى. ۆەنچۋرلىق قورلاردىڭ نازارىنا ىلىككەن بۇل ستارتاپ الداعى ءۇش جىلدا جاساندى ينتەللەكت بويىنشا الەمدەگى ەڭ ۇزدىك 5 بيوتەحنولوگيالىق كومپانيا قاتارىنا قوسىلۋدى كوزدەپ وتىر.
جاقىندا اتالعان جوبا اقش-تاعى ستەنفورد ۋنيۆەرسيتەتىنىڭ بەدەلدى StartX حالىقارالىق اكسەلەراتسيالىق باعدارلاماسىنا وتكەن ەدى. StartX بۇل تەحنولوگيا, بيومەديتسينا, ەنەرگەتيكا, ءبىلىم بەرۋ سىندى سالالارداعى ستارتاپتارعا قولداۋ كورسەتەدى. باعدارلاما يدەيادان باستاپ نارىققا ءساتتى شىعىپ, ينۆەستيتسيالاردى تارتۋعا دەيىنگى دامۋدىڭ بارلىق كەزەڭىندە جوبالاردى سۇيەمەلدەيدى. «Arlan Biotech» جوباسىنىڭ نەگىزىن قالاۋشى ءارى باس ديرەكتورى بولات سۇلتانقۇلوۆتىڭ ايتۋىنشا, StartX-كە قابىلدانۋ – الەمدەگى كەز كەلگەن ستارتاپتىڭ ارمانى.
«2022 جىلدىڭ قاراشا ايىندا العاش رەت Startح-كە ءوتىنىش بەرگەنىمدە ەلىمىزدەن تۇسكەن العاشقى ءوتىنىم دەگەن بولاتىن ۇيىمداستىرۋشىلار. وكىنىشكە قاراي, ول كەزدە ءونىمىمىز ءالى جەتىلمەگەن ەدى. سول ۋاقىتتان بەرى كوپ جۇمىس اتقارىلدى: كوفاۋندەردى تاپتىم, Astana Hub-تا اكسەلەراتوردان ءوتىپ, ءونىمدى پىسىقتاپ, ساتۋدى باستادىق. قاجىرلى ەڭبەك پەن كۇش-جىگەردىڭ ارقاسىندا وسى جولى ىرىكتەۋدەن سۇرىنبەي وتتىك. ەندى ءبىز الەمدەگى ءىرى يننوۆاتسيالىق قاۋىمداستىقتىڭ – ستەنفورد ۋنيۆەرسيتەتىنىڭ ءبىر بولىگى بولامىز. بۇل – جۇمىسىمىزدىڭ ماڭىزىن ايشىقتايتىن ەلەۋلى جەتىستىك, حالىقارالىق دودادا باسەكەگە تۇسە الاتىنىمىزدىڭ كورسەتكىشى. StartX-ءتىڭ باستى ارتىقشىلىعى – اينالاداعى ادامدار, مادەنيەت, درايۆەر, يننوۆاتسيا مەن الەمدى وزگەرتۋگە دەگەن ۇمتىلىس», دەدى ول.
2020 جىلى اتالعان ستارتاپتى بولات سۇلتانقۇلوۆ كوروناۆيرۋستى دياگنوستيكالاۋ ماقساتىندا قۇرعان. ال 2023 جىلى بۇل جوبا جاساندى ينتەللەكت ارقىلى جاڭاشا تۇرلەندى. جوبانىڭ نەگىزگى ماقساتى – بيوفارماتسەۆتيكالىق كومپانيالار مەن عالىمدارعا دياگنوستيكالىق سىناق جۇيەلەرىن قۇرۋ جانە ونكولوگيالىق, اۋتويممۋندى اۋرۋلاردى زەرتتەپ, ەمدەۋ ءۇشىن نانودەنەلەردى جىلدام الۋعا مۇمكىندىك بەرۋ. ال نانودەنەلەر ونكولوگيالىق اۋرۋلارعا ارنالعان جاڭا ءدارى-دارمەكتەردى جاساۋدا قولدانىلادى.
اتالعان جوبانىڭ تەڭ قۇرىلتايشىسى داۋكەن سەيتقالي ستۋدەنت كەزىنەن-اق جاساندى ينتەللەكت تاقىرىبىنا قىزىعۋشىلىق تانىتقان. الايدا 2016 جىلى جاساندى زەردە قازىرگىدەي تانىمال ەمەس ەدى. سوندا دا ول نەيروندىق جەلىلەر, ماشينالىق وقىتۋ كۋرستارىندا ءبىلىمىن شىڭداي تۇسەدى. كەيىن 2019 جىلى داۋكەن Cerebra-دا باس ينجەنەر بولىپ جۇمىسقا ورنالاسىپ, ەكى جارىم جىلدان سوڭ كانادالىق «healthtech» ستارتاپىندا دا تاجىريبە جيناقتاعاننان كەيىن ءوز جوباسىن قۇرۋعا شەشىم قابىلدايدى.
«مەن ارقاشان بيولوگيا مەن جاساندى ينتەللەكتىنى بىرىكتىرۋگە قىزىعۋشىلىق تانىتتىم. ماعان بيولوگيا سالاسىندا جاقسى ءبىلىمى بار سەرىكتەس كەرەك بولدى. ءدال سول ۋاقىتتا جاساندى ينتەللەكتىنىڭ كومەگىمەن نانودەنەلەر مەن انتيدەنەلەر تىزبەگىن قۇرۋ جوباسىندا ىزدەنىپ جۇرگەن بولات سۇلتانقۇلوۆپەن جولىقتىم. وسىلايشا, «Arlan Biotech» جوباسى قولعا الىندى. سوڭعى جىلدارى بيوتەحنولوگيا باعىتىندا جاساندى ينتەللەكتىنى دامىتۋ بەلسەندى دامىپ كەلەدى, نارىق تاراپىنان دا قىزىعۋشىلىق بار. مامان رەتىندە دامۋدىڭ كوپتەگەن مۇمكىندىكتەرىن كورىپ تۇرمىن, ال باستى ماقسات — جەكە ادامنىڭ گەنەتيكالىق فاكتورلارى مەن ەرەكشەلىكتەرىن ەسكەرەتىن جەكە مەديتسيناعا كوشۋ», دەيدى د. سەيتقالي.
ستارتاپتىڭ نەگىزىن قالاۋشى بولات سۇلتانقۇلوۆ بيومەديتسينالىق ينجەنەريا ماماندىعى بويىنشا NU PhD دارەجەسىن العان. ال ونىڭ سەرىكتەسى داۋكەن سەيىتقالي NU ينجەنەريا جانە تسيفرلىق عىلىمدار مەكتەبىن بىتىرگەن. ولاردىڭ ستارتاپىنا NU الەۋمەتتىك دامۋ قورى, «Young Researchers Alliance» جانە «Jas Ventures» قارجىلاي قولداۋ كورسەتكەن.
