فوتو: aqmeshit-aptalygy.kz
«كىتاپ وقىمايتىن ادامنىڭ وقي المايتىن ادامنان ايىرماشىلىعى جوق» دەگەندەي, قازىر قوعامنىڭ دەنى ساۋاتتى, الايدا كوركەم ادەبيەتتى وقيتىنداردىڭ قاراسى از. راس, قۇرمەتىن كورسەتىپ, ءىلتيپاتىن ءبىلدىرىپ تۇرادى, بىراق ەكى-ءۇش پاراقتان كەيىن شىدامى تاۋسىلادى دا, نازارى باسقا جاققا اۋىپ, جانارى جىلتىراقتى ىزدەي باستايدى. سوندىقتان ادام مەن كىتاپتىڭ اراسىنا سىنا قاعىپ, دوستىعىنا جارىقشاق تۇسىرگەن – الەۋمەتتىك جەلى دەسەك قاتەلەسپەيمىز. ۇلكەن-كىشىنى بۇعاۋلاپ الىپ, جوق, باۋراپ الىپ, ۆيرتۋالدى الەمگە كوشىرىپ جىبەرگەن جاڭا تەحنولوگيالار كىتاپتىڭ مىڭ جىلدىق سالتاناتىنا ءبىرشاما بوگەسىن قويدى. البەتتە ينتەرنەتتىڭ يگىلىگىن جوققا شىعارمايمىز, دەگەنمەن عالامتوردىڭ بەرەرى قانشا بولسا, الارى دا سونشا. قازىر بالالاردىڭ بەينە ويىندارعا اۋەستىگى اتا-انالاردىڭ نەگىزگى ۋايىمىنا اينالدى. «الەۋمەتتىك جەلى جەتكىنشەكتىڭ مىنەز-قۇلقىنا, تانىم-تۇسىنىگىنە, مەنتالدى ءھام فيزيكالىق ساۋلىعىنا تەرىس اسەر ەتىپ جاتىر», دەپ شىر-پىر بولادى قايران اكە-شەشە. ۇلكەندەردىڭ ءوزى دە كۇندىز-ءتۇنى WhatsApp اقتارىپ, Instagram قوپارىپ, ۆيرتۋالدى الەمگە قاشان ءارى قالاي شومىپ كەتكەنىن بايقاماي قالدى. بىراق ءاربىر اتا-انا بالاسىنىڭ كوزى مەن قۇلاعىن, ساناسى مەن رۋحىن قورعاۋعا مىندەتتى ەكەنىن ۇمىتپاعانى ءلازىم. سەبەبى عالامات جەتىستىك رەتىندە جارنامالانىپ جاتقانىمەن, بەينە ويىندار تۇگىلى, يۋتۋبتاعى مۋلتفيلمدەر دە اقىل قوسپايدى, قيالدى بايىتپايدى, سوزدىك قورىن دامىتپايدى, سىني ويلاۋعا باۋلىمايدى. بۇرىن دا, قازىر دە, ينتەللەكتۋالدىق ورەنى كوتەرەتىن, مىنەزدى بەرىك قىلاتىن, ەرەسەك تارتقان شاعىندا جاقسى ورتا تابۋىنا سەپتەسەتىن – كىتاپ قانا, كوركەم ادەبيەت قانا, كلاسسيكالىق ەڭبەكتەر عانا. كوزى قاراقتى ەشبىر ادام بۇل اقيقاتتى جوققا شىعارا المايدى. ەندەشە, بالاڭىزدىڭ ينتەرنەتتە وتىراتىن ۋاقىتىن شەكتەۋدە تۇرعان ەشبىر سوكەتتىك جوق. وسى ماقساتتا بيىل وقۋ-اعارتۋ مينيسترلىگى دە بالالاردىڭ جازعى دەمالىسىن قىزىقتى ءارى پايدالى وتكىزۋگە ارنالعان «سەنىڭ قۋانىشقا تولى جازعى دەمالىسىڭ» اتتى Guidebook كىتاپشاسىن ازىرلەدى. اتالعان ادىستەمە توعىز بولىمنەن تۇرادى: «جاز كىتاپپەن بىرگە», «سەنىڭ قاۋىپسىز جازىڭ», «تانىمدىق جاز», «سەنىڭ ءومىر سالتىڭ – سالاماتتى ءومىر سالتى», «جاز – ونەردىڭ, شىعارماشىلىقتىڭ جانە سۇلۋلىقتىڭ قىزىقتى الەمى», «جاز – ءوزىن-ءوزى دامىتۋ ۋاقىتى», «سەنىڭ العاشقى جەكە كۇندەلىگىڭ», ء«وز قولىڭمەن جازعى سىيلىق جاسا», «جازعى ويىندار». تاراۋلاردىڭ اتاۋىنان-اق وقۋشىلارعا پايدالى كىتاپشا ەكەنىن اڭعارامىز. اتالعان مينيسترلىككە قاراستى تاربيە جۇمىسى جانە قوسىمشا ءبىلىم دەپارتامەنتى ديرەكتورىنىڭ ورىنباسارى ستەللا يبراەۆا ادىستەمەلىك جيناق جونىندە: «بالالاردىڭ جاس ەرەكشەلىكتەرى ەسكەرىلە وتىرىپ, 1–4, 5–9, 10–11 سىنىپ وقۋشىلارى ءۇشىن «سەنىڭ قۋانىشقا تولى جازعى دەمالىسىڭ» Guidebook جيناعىنىڭ ءۇش نۇسقاسى ازىرلەندى. ونىڭ ءاربىر پاراعىندا QR-كودتار ورنالاستىرىلعان, سول ارقىلى وقۋشى بەرىلگەن تاقىرىپتار تۋرالى اقپارات الا الادى. مۇندا ورتالىق مەملەكەتتىك ورگاندارمەن بەكىتىلگەن بالالارعا ارنالعان جازعى ساۋىقتىرۋ ورتالىقتارىنىڭ دا ءتىزىمى بەرىلگەن», دەدى. Guidebook-ءتىڭ ەلەكتروندى نۇسقاسىن وقۋ-اعارتۋ مينيسترلىگىنىڭ, سونداي-اق وڭىرلىك ءبىلىم باسقارمالارى مەن ءبىلىم ۇيىمدارىنىڭ رەسمي سايتتارىنان الۋعا بولادى.
بۇل كىتاپشانى ايتىپ وتىرعان سەبەبىمىز, مىڭ شاقىرىمدىق جول العاشقى قادامنان باستالاتىنى سەكىلدى, وسىنداي شاعىن ءارى تانىمدىق شىعارمالار ارقىلى بالالاردىڭ كىتاپقا دەگەن ىنتاسى ارتا تۇسەدى. كەيىن وسە كەلە كوركەم ادەبيەتتى, كلاسسيكالىق ەڭبەكتەردى قۇنىعىپ وقيتىن دەڭگەيگە جەتەدى. وسىلايشا, بۇگىن جەتىم قوزىداي شەتتە, قاراۋسىز قالعان كىتاپ كۇندەردىڭ كۇنىندە وزىنە لايىق ورىندى قايتا تابادى.
