فوتو: تۇرار قازانعاپوۆ
بۇگىن, 7 ماۋسىم كۇنى قازاقستان مۇسىلماندارى ءدىني باسقارماسى الداعى قۇربان ايتقا قاتىستى ماڭىزدى مالىمدەمە جاسادى.
يسلام دىنىندە قاسيەتتى كۇندەر, تۇندەر جانە ايلار قاماري جىل ساناۋى نەگىزىندە انىقتالادى. مۇنداي جىل ساناق اي فازاسىنىڭ وزگەرۋىنە قاراي ەسەپتەلەدى. جاڭا ايدىڭ ء(ھيلالدىڭ) كورىنۋىمەن جاڭا اي باستالادى. قاماري اي كەيدە 29 نەمەسە 30 كۇن بولادى.
«زۋل-حيججا ايىن انىقتاۋ ءۇشىن زۋل-قاعدا ايىنىڭ 29-ىندا ايدى باقىلايدى. كۇن باتقان كەزدە جاڭا اي كورىنسە, كەلەسى كۇنى زۋل-حيججا ايى باستالعان بولىپ سانالادى. ەگەر اۋا بۇلتتى بولىپ, اي كورىنبەسە, زۋل-قاعدا ايىن 30 كۇنگە تولىقتىرادى. وسىعان وراي, 2024 جىلى 6 ماۋسىمدا جاڭا ايدىڭ كورىنۋىنە بايلانىستى بيىل زۇلحيججا ايى 7 ماۋسىمدا باستالىپ, اراپا 15 ماۋسىمعا, ال قۇربان ايت 16 ماۋسىمعا ساي كەلەدى», دەلىنگەن حابارلامادا.
قمدب زۋل-حيججا ايىنىڭ العاشقى ون كۇنىندە بارىنشا ىقىلاسپەن عيبادات ەتىپ, كوبىرەك ىزگى ىستەر مەن جاقسى امالدار جاساۋعا تىرىسۋ كەرەك ەكەنىن ەسكە سالدى. ويتكەنى, حاديستەردە سول ۋاقىتتا ورىندالعان يگى ىستەردىڭ ساۋابى ەسەلەنىپ جازىلاتىنى ايتىلعان.
«قۇربان ايت نامازىنان كەيىن ءۇش كۇن ىشىندە جاعدايى كەلگەن مۇسىلمانعا قۇرباندىق شالۋ – مىندەت. اللا تاعالا قاسيەتتى قۇراندا: «راببىڭنىڭ رازىلىعى ءۇشىن ناماز وقى جانە قۇرباندىق شال» («كاۋسار» سۇرەسى, 2-ايات) دەپ بۇيىرعان», دەلىنگەن ءمۇفتيات مالىمدەمەسىندە.
بۇعان دەيىن ەل ازاماتتارى 17 ماۋسىم كۇنى قوسىمشا ءبىر كۇن دەمالاتىنى حابارلانعان ەدى. ويتكەنى قۇربان ايتتىڭ ءبىرىنشى كۇنى ءدال وسى كۇنگە سايكەس كەلگەن. بىراق قمدب مەرەكەنىڭ ءبىر كۇن بۇرىن – 16 ماۋسىمدا باستالاتىنىن حابارلادى.
«بۇگىن قمدب قۇربان ايت 16 ماۋسىمعا سايكەس كەلەتىنىن مالىمدەدى. دەمالىس كۇندەرىنە ساي كەلەتىن ءدىني مەرەكەلەر جىلجىتىلمايدى. سوندىقتان دەمالىس كۇنى اۋىسپايدى, 17 ماۋسىم - جۇمىس كۇنى بولىپ قالا بەرەدى», دەپ ءتۇسىندىردى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى.
