قازىرگى كەزدە گەرمانيانىڭ ەڭ ءىرى ءارى كورىكتى 10 قالاسى فۋتبولشىلاردىڭ جارىسىن قابىلداۋعا ءازىر. بۇل باسەكەلەر بەرليندەگى «وليمپياشتاديون» (74 475 كورەرمەنگە ەسەپتەلگەن), دورتمۋندتاعى «سيگنال يدۋنا پارك» (65 851), ديۋسسەلدورفتاعى «مەركۋر پيل ارەنا» (51 500), فرانكفۋرتتاعى «دويچە بانك پارك» (48 000), گەلزەنكيرحەندەگى «فەلتينكس-ارەنا» (54 750), گامبۋرگتەگى «فولكسپاركشتاديون» (51 500), كەلندەگى «رەين ەنەرگي» (46 195), لەيپتسيگتەگى «رەد بۋلل ارەنا» (42 259), ميۋنحەندەگى «اليانتس ارەنا» (70 000) جانە شتۋتگاردتاعى «محپ-ارەنا» ستاديوندارىندا وتەدى. توپتىق تۋرنيردە مىنا كوماندالار ءوزارا شەبەرلىك بايقاسادى:
«ا» توبى – گەرمانيا, شوتلانديا, ماجارستان, شۆەيتساريا.
«ۆ» توبى – يسپانيا, حورۆاتيا, يتاليا, البانيا.
«س» توبى – سلوۆەنيا, دانيا, سەربيا, انگليا.
«D» توبى – پولشا, نيدەرلاند, اۋستريا, فرانتسيا.
«ە» توبى – بەلگيا, سلوۆاكيا, رۋمىنيا, ۋكراينا.
«F» توبى – تۇركيا, گرۋزيا, پورتۋگاليا, چەحيا.
ءار توپتان ۇزدىك شىققان ەكى كوماندا جانە ءۇشىنشى ورىن العاندار اراسىندا ەڭ كوپ ۇپاي جيعان ءتورت ۇلتتىق قۇراما پلەي-وففتا كۇش سىناسۋ مۇمكىندىگىنە يە بولادى. بۇل باسەكەلەر 29 ماۋسىمدا باستالادى. شيرەك فينالدىق سايىستار 5-6 شىلدەدە وتسە, جارتىلاي فينالدى 9-10 شىلدەدە تاماشالايمىز. ال جارىس جەڭىمپازى 14 شىلدەدە بەرليندەگى «وليمپياشتاديوندا» انىقتالادى.
ەۋروپا چەمپيوناتى 1960 جىلدان بەرى ۇيىمداستىرىلىپ كەلەدى. فرانتسيادا وتكەن تۇساۋكەسەر تۋرنيردە كسرو قۇراماسى توپ جارعانىن كوزى قاراقتى كورەرمەندەر ۇمىتا قويعان جوق. ول كەزدە نەبارى 4 كوماندا كۇش سىناسقان ەدى. جارتىلاي فينالدا كەڭەس وداعىنىڭ چەحوسلوۆاكيانى 3:0 ەسەبىمەن ۇتسا, يۋگوسلاۆيا الاڭ يەلەرىنەن باسىم ءتۇستى – 5:4. جەڭىسكە جەتكەن قوس كوماندا پاريجدەگى «پارك دە پرەنس» ستاديونىندا وتكەن فينالدىق سىندا ءوزارا شەبەرلىك بايقاستى. بۇل ماتچتىڭ 43 مينۋتىندا ميلان گاليچ ەسەپ اشقانىمەن, ەكىنشى كەزەڭ باستالعان بەتتە سلاۆا ماترەۆەلي تارازى باسىن تەڭەستىردى. قوسىمشا ۋاقىتتىڭ 13 مينۋتىندا ۆيكتور پونەدەلنيك جەڭىس دوبىن سوقتى – 2:1. قولا مەدالدى چەحوسلوۆاكيا يەلەندى. ءۇشىنشى ورىن ءۇشىن تارتىستا ولار فرانتسيانى ۇتتى – 2:0.
«پارك دە پرەنس» پەن مارسەلدەگى «ۆەلودرومنىڭ» جاسىل الاڭدا جاسىنداي جارقىلداعان لەۆ ياشين, ۆلاديمير دۋركوۆيچ, لاديسلاۆ نوۆاك, يوزەف ماسوپۋست, يگور نەتتو, دراگوسلاۆ شەكۋلاراتس, سلاۆا مەترەۆەلي, ميلان گاليچ, بورا كوستيچ, ۆالەنتين يۆانوۆ جانە ۆيكتور پونەدەلنيك سىندى دۇلدۇلدەر «ەۋرو-1960» دوداسىنىڭ شارتتى قۇرامىنا ەندى.
جالپى, ەۋروپا چەمپيوناتىنىڭ جالاۋى 16 مارتە جەلبىرەدى. سول ارالىقتا گەرمانيا قۇراماسى (گفر-دى قوسا العاندا) ەڭ كوپ ولجاعا كەنەلدى. نەمىستەر 3 التىن, 3 كۇمىس جانە 3 قولا مەدالدى ولجالادى. سونداي-اق يسپانيا (3+1+1), يتاليا (2+2+1), فرانتسيا (2+1+1), رەسەي (كسرو-نىڭ قوسا العاندا, 1+3+1), پورتۋگاليا (1+1+3), چەحيا (چەحوسلوۆاكيانى قوسا العاندا, 1+1+3), نيدەرلاند (1+0+4), دانيا (1+0+2), گرەكيا (1+0+0), سەربيا (يۋگوسلاۆيانى قوسا العاندا, 0+2+0), انگليا (0+1+2), بەلگيا (0+1+1), ماجارستان (0+0+1), تۇركيا (0+0+1), ۋەلس (0+0+1) جانە شۆەتسيانىڭ (0+0+1) فۋتبولشىلارى دا تابىسقا جەتتى. اتالعان جارىستا بارلىعى 10 مەملەكەتتىڭ ءانۇرانى شىرقالىپ, 17 ەلدىڭ تۋى كوكتە جەلبىرەدى.
سوڭعى ەۋروپا چەمپيوناتى 2021 جىلدىڭ 11-ماۋسىم مەن 11-شىلدەسى ارالىعىندا قارت قۇرلىقتىڭ 11 مەملەكەتىندە ءوتتى. ولار – انگليا, ازەربايجان, گەرمانيا, دانيا, يسپانيا, يتاليا, نيدەرلاند, ماجارستان, رەسەي, رۋمىنيا جانە شوتلانديا. بۇل «ەۋرو» دوداسىنىڭ 60 جىلدىعىنا وراي ارنايى ۇيىمداستىرىلعان پيلوتتىق شارا ەدى. وسى تۋرنيردە العاش رەت VAR جۇيەسى پايدالانىلدى. جارىس جولىنا شىققان 24 كوماندانىڭ ادەتتەگىدەي 16-سى پلەي-وففقا جولداما الدى. سولاردىڭ تەڭ جارتىسى شيرەك فينالدا وينادى. بۇل كەزدەسۋلەردىڭ ناتيجەلەرى مىناداي: شۆەيتساريا – يسپانيا 1:1 (پەنالتيدەن – 1:3), بەلگيا – يتاليا 1:2, چەحيا – دانيا 1:2 جانە ۋكراينا – انگليا 0:4.
جارتىلاي فينالدا يتاليا مەن يسپانيا اراسىنداعى ماتچتا جەڭىمپاز انىقتالعان جوق. پەنالتي سوعۋ بارىسىندا اپەننين تۇبەگى تۇلەكتەرىنىڭ اسىعى الشىسىنان ءتۇستى – 4:2. انگليا دانيانى قوسىمشا ۋاقىتتا ۇتتى – 2:1. لوندونداعى ايگىلى «ۋەمبلي» ستاديونىندا وتكەن فينالدىق سايىستا يتاليالىقتار مەن اعىلشىندار ءبىر-ءبىرىن الا-المادى. نەگىزگى جانە قوسىمشا ۋاقىت 1:1 ەسەبىمەن اياقتالدى. «فۋتبول لوتورەياسىندا» تاعى دا «سكۋادرا ادزۋررا» باعى جاندى – 3:2. ءسويتىپ, يتاليا قۇراماسى ءوز تاريحىندا ەكىنشى رەت ەۋروپا چەمپيونى اتاندى.
«ەۋرو-2020» دوداسىنىڭ قورىتىندىسى بويىنشا چەمپيوندار كومانداسىنىڭ 21 جاستاعى قاقپاشىسى دجانلۋيدجي دوننارۋمما ەڭ ۇزدىك ويىنشىعا تيەسىلى ارنايى سىيلىقتى يەلەندى. مەرگەندەر كوشىن پورتۋگاليالىق كريشتيانۋ رونالدۋ مەن چەحيالىق پاتريك شيك باستادى. ولار قارسىلاستار قاقپاسىن 5 رەتتەن ءدال كوزدەدى. جاستار بۋىنى وكىلدەرى اراسىندا 17 جاستاعى يسپانيالىق جارتىلاي قورعاۋشى پەدري ەڭ شەبەر فۋتبولشى دەپ تانىلدى.
اتالعان جارىسقا قاتىسۋشىلار مىناداي مولشەردە سىياقى الدى: باس جۇلدە -10 ميلليون, كۇمىس جۇلدەگەر – 7 ميلليون, جارتىلاي فينال – 5 ميلليون, شيرەك فينال – 3,25 ميلليون, 1/8 فينال – 2 ميلليون, توپتىق تۋرنيردەگى ءار جەڭىسى ءۇشىن – 1,5 ميلليون, تەڭ ويناعانى ءۇشىن – 750 مىڭ جانە ءار قاتىسۋشى كومانداعا – 9,25 ميلليون ەۋرودان.
