مەملەكەت باسشىسى قاسىم-جومارت توقاەۆ ۇلتتىق قۇرىلتايدا ازاماتتاردىڭ جەكەلەگەن ساناتتارى ءۇشىن قۇمار ويىندارعا قاتىستى شەكتەۋلەردى كۇشەيتۋدى تاپسىرعان ەدى. جەڭىل جولمەن اقشا تاپقىسى كەلىپ, تاپقان-تايانعانىن جەلگە ۇشىرىپ جاتقان جاندارعا تسيفرلىق دامۋ, يننوۆاتسيا جانە اەروعارىش ونەركاسىبى مينيسترلىگى, تۋريزم جانە سپورت مينيسترلىگىنىڭ تۋريزم يندۋسترياسى كوميتەتى, «ۇلتتىق اقپاراتتىق تەحنولوگيالار» اكتسيونەرلىك قوعامى بىرلەسە قۇمار ويىننىڭ قۇرىعىنان قۇتىلۋدىڭ ونلاين فورماتىن ۇسىندى.
جاڭا قىزمەتتى رەسىمدەۋ ءۇشىن «eGov mobile» موبيلدىك قوسىمشاسىندا «قىزمەتتەر», سودان كەيىن «سپورت» بولىمىنە ءوتۋ كەرەك. سودان سوڭ «قۇمار ويىندارعا نەمەسە ءباس تىگۋگە قاتىسۋدى شەكتەۋ جونىندەگى سەرۆيستى» تاڭدايسىز. اشىلعان بەتتە شەكتەۋ مەرزىمىنىڭ ۋاقىتىن انىقتاپ, «قىزمەتكە تاپسىرىس» تۇيمەسىن باسۋ قاجەت. ءارى قاراي جىلدام قول جەتكىزۋ كودىن نەمەسە بيومەتريانى پايدالانىپ قىزمەتكە قول قوياسىز. وسىلايشا, ءوتىنىم مارتەبەسىمەن تانىسا الاسىز. ايتا كەتەيىك, قۇمار ويىندارعا قاتىسۋىن شەكتەگىسى كەلەتىن ازاماتتار ءوتىنىمدى ەتسق ارقىلى بەرۋگە ءتيىس. ءۇشىنشى تۇلعالاردىڭ ءوتىنىم بەرۋىنە جول بەرىلمەيدى.
«ۇلتتىق اقپاراتتىق تەحنولوگيالار» اق باسقارما توراعاسى روستيسلاۆ كونياشكيننىڭ ايتۋىنشا, بۇل قىزمەت لۋدومانيامەن بايلانىستى جەكە ماسەلەلەردى ايتارلىقتاي تومەندەتەدى. وسىلايشا, كەز كەلگەن ازاماتقا, اسىرەسە قۇمار ويىندارمەن شەكتەن تىس اۋەستەنەتىن تۇلعالارعا بارلىق ليتسەنزيالانعان ويىن مەكەمەسى مەن بۋكمەكەرلىك كەڭسەلەردىڭ زاڭدى سايتتارىنا كىرۋگە توسقاۋىل قويىلادى.
