فوتو: سكرينشوت ۆيدەو, azattyq-ruhy.kz
Azattyq-ruhy سايتىنىڭ جازۋىنشا, كارينا ماماشتىڭ اجەسىنە ديپلوماتتىڭ تۋىسى قوڭىراۋ شالىپ, قورقىتقان, ۇرىپ-سوعۋ تۋرالى ءوتىنىشىن الىپ كەتۋدى تالاپ ەتكەن.
«بۇگىن مەنىڭ اجەمە گۇلنار اپا حابارلاستى. ول ساكەندى 3 جاسىنان باستاپ تاربيەلەگەن ەڭ ۇلكەن كەلىن. ول اجەمە كەش بولماي تۇرعاندا كارينا ارىزىن قايتىپ السىن دەگەن. ساكەننىڭ استانا مەن تۇتاس قازاقستان بويىنشا تانىستارى كوپ, ولار كارينانى ولتىرەدى نەمەسە مەرتىكتىرەدى دەپ قورقىتقان», دەيدى كارينا ماماش.
پوليتسيادا قورقىتۋ فاكتىسى بويىنشا جاڭا قىلمىستىق ءىس قوزعالدى.
«ەسىل اۋدانىنىڭ پوليتسيا باسقارماسى قاۋىپ-قاتەر فاكتىسى بويىنشا قىلمىستىق ءىس قوزعادى. تەرگەۋ ناتيجەلەرى بويىنشا پروتسەسسۋالدىق شەشىم قابىلدانادى», دەپ حابارلادى استانا قالاسىنىڭ پوليتسيا دەپارتامەنتى.
ەسكە سالايىق, قازاقستاننىڭ بىرىككەن اراب امىرلىكتەرىندەگى ەلشىسىنىڭ كەڭەسشىسى بولعان كۇيەۋىنەن قورعاۋدى سۇراعان كارينا ماماشتىڭ الاڭداتارلىق بەينەوتىنىشىنەن سوڭ قر ءسىم دەرەۋ ءوز قىزمەتكەرىن كەرى شاقىرتىپ الىپ, ونى جۇمىستان شىعاردى, ال پوليتسيادا قىلمىستىق ءىس قوزعالعان ەدى.
