كوللاجدى جاساعان – زاۋرەش سماعۇل ,«EQ»
«بولاشاق» شاعىن اۋدانىنداعى وسى قۇرىلىسقا «قازاقستان حالقىنا» قورى دەمەۋشىلىك جاسايدى. قور ءباسپاسوز قىزمەتىنىڭ مالىمەتىنە قاراعاندا, ەلىمىزدىڭ 6 ايماعىندا دا وسىنداي جاڭا ءۇي قۇرىلىسى ءجۇرىپ جاتىر.
«قازىر 6 وبلىستاعى 21 ەلدى مەكەندە 649 تۇرعىن ءۇيدىڭ قۇرىلىسى باستالدى. ماسەلەن, سولتۇستىك قازاقستان وبلىسىندا – 200, باتىس قازاقستاندا – 114, اقتوبەدە – 80, قوستانايدا – 88, اقمولا وبلىسىندا 87 ءۇيدى سالۋ قولعا الىندى. بۇل وڭىرلەردەگى قۇرىلىسى ءجۇرىپ جاتقان ءبىر ءۇيدىڭ ورتاشا قۇنى – 27,4 ملن تەڭگە. ال اتىراۋ وبلىسىنىڭ قۇلسارى قالاسىندا 80 تۇرعىن ءۇيدىڭ قۇرىلىسىن جۇرگىزۋگە 2 ملرد 640 ملن تەڭگە ءبولىندى. مۇندا 1 ءۇيدى سالۋعا جۇمسالاتىن قارجى 31 ملن 975 مىڭ تەڭگەنى قۇرايدى», دەپ حابارلادى قوردىڭ ءباسپاسوز قىزمەتى.
تيپتىك ۇلگىدەگى جاڭا ۇيلەردىڭ ارقايسىسىنىڭ اۋدانى – 100 شارشى مەتر. قۇلسارىدا جاڭا تۇرعىن ۇيلەرمەن بىرگە ەكى مىڭ ورىندىق Binom مەكتەبىن, 300 ورىندىق بالاباقشا نىسانىن سالۋ جوسپارلانعان. سونداي-اق شاعىن اللەيالار سالىنادى.
«تۇرعىن ۇيلەردىڭ اۆتورلىق ديزاينىن «Etalon project group» جشس دايىندادى. بۇل سەرىكتەستىك ديزايننىڭ ساقتالۋىنا باقىلاۋ جۇرگىزەدى. ال تەحنيكالىق قاداعالاۋ «ZAF-سترويسەرۆيس» جشس-عا جۇكتەلىپ وتىر», دەپ ءمالىم ەتتى قوردىڭ ءباسپاسوز قىزمەتى.
اتىراۋ وبلىستىق قۇرىلىس باسقارماسىنىڭ باس مامانى ەرنار قادىربايدىڭ ايتۋىنشا, «قازاقستان حالقىنا» قورى تۇرعىن ۇيلەردى سالۋعا جەرگىلىكتى مەردىگەرلەردى ۇسىنىپتى. سوعان سايكەس «ورلان», «ارمانداستار-اتىراۋ» جانە «كازكومسەرۆيس» جشس-عا سەنىم ارتىلىپ وتىر. بۇل كومپانيالاردىڭ ارقايسىسىندا 50-گە جۋىق مامان جۇمىس ىستەيدى.
«Sergek Group» كومپانيالار توبىنىڭ باس ديرەكتورى اسەت احمەتوۆتىڭ ايتۋىنا قاراعاندا, قۇلسارىدا سۋ تاسقىنىنان زارداپ شەككەندەرگە ارناپ سالىنىپ جاتقان تۇرعىن ءۇي قۇرىلىسىنىڭ بارىسىن Sergek جۇيەسى ارقىلى باقىلاۋعا بولادى. قازىر اقمولا, اقتوبە, باتىس قازاقستان, قوستاناي, سولتۇستىك قازاقستان جانە اتىراۋ وبلىسىنداعى قۇرىلىس الاڭدارىنا 55 بەينەكامەرا ورناتىلعان. كامەرالاردىڭ ونلاين ترانسلياتسياسىن gov.kz سايتىندا تاۋلىك بويى قاراۋعا بولادى.
«ونەركاسىپ جانە قۇرىلىس مينيسترلىگى سۋ تاسقىنىنان زارداپ شەككەن ەلدى مەكەندەردە تۇرعىن ءۇيدى قالپىنا كەلتىرۋ جۇمىستارىن باقىلاۋ جانە ۇيلەستىرۋ ءۇشىن احۋالدىق ورتالىق قۇردى. بۇل ورتالىقتا زالالدى وتەۋ تۋرالى بارلىق ءوتىنىش, ءار اۋىل مەن اۋدان ورتالىعىنداعى, قالالارداعى قۇرىلىس بارىسى باقىلاۋعا الىندى. ونلاين بەينەمونيتورينگ قۇرىلىس پەن جوندەۋ جۇمىستارىن جەدەل تارتىپپەن باقىلاۋعا, مەرزىمنەن كەشىككەن قالعان جاعدايدا تەزىرەك ارەكەت ەتۋگە مۇمكىندىك بەرەدى. ءبىز ءۇشىن اشىق جۇمىس فورماتى ماڭىزدى بولىپ وتىر. ويتكەنى ءبىز تۇرعىنداردىڭ باسپانانى قالپىنا كەلتىرۋگە بايلانىستى جۇمىستاردان حاباردار بولعانىن قالايمىز», دەيدى ونەركاسىپ جانە قۇرىلىس ءمينيسترىنىڭ ورىنباسارى ءجاننات ءدۇبىروۆا.
ال «سامۇرىق-قازىنا» ءال-اۋقات قورىنا قارايتىن كومپانيالار قۇلسارى قالاسىنا 7 ميلليارد تەڭگە ءبولدى. بۇل قارجى قۇلسارى قالاسىنىڭ ينفراقۇرىلىمىن قالپىنا كەلتىرۋ ماقساتىندا بىرىڭعاي قايىرىمدىلىق وپەراتورى «Samruk-Kazyna Trust» ارقىلى «اتىراۋ» الەۋمەتتىك دامىتۋ كورپوراتيۆتىك قورىنا اۋدارىلدى. بۇل يگى ءىس «قازمۇنايگاز» ۇك» اق قولداۋىمەن جۇزەگە اسىرىلادى.
«جالپى, وسىعان دەيىن «سامۇرىق-قازىنا» اق كومپانيالارى توبى ەلىمىزدەگى سۋ تاسقىنىنىڭ زاردابىن جويۋعا 15 ملرد تەڭگە بولگەن بولاتىن. سونىمەن بىرگە پورتفەلدىك كومپانيالار وڭىرلەردە تۇرعىنداردى تاسىمالداۋعا ارنايى تەحنيكا ءبولىپ, گۋمانيتارلىق كومەك كورسەتتى. قوردىڭ بىرىڭعاي قايىرىمدىلىق وپەراتورى – «Samruk-Kazyna Trust» قورىنا ەنشىلەس كاسىپورىنداردىڭ سەرىكتەستەرىنەن كومەك رەتىندە قارجى اۋدارۋ جالعاسىپ جاتىر. ونىڭ ىشىندە مۇناي-گاز سەكتورىنداعى رۋمىندىق «Rompetrol», اتوم ونەركاسىبى سالاسىنداعى «Cameco», «CGN» جانە «Marubeni» جاپوندىق كومپانيالارى بار», دەپ اقپارات تاراتتى «سامۇرىق-قازىنا» ءال-اۋقات قورى.
جىلىوي اۋدانىنىڭ اكىمى جۇمابەك قاراجانوۆتىڭ دەرەگىنە سۇيەنسەك, قۇلسارى قالاسىندا كوپقاباتتى ۇيلەردىڭ قاسبەتى مەن شاتىرىن جوندەۋ باستالدى. مۇنداعى 100-گە جۋىق ءۇي 30 جىل بۇرىن پايدالانۋعا بەرىلگەن. الايدا سودان بەرى ۇيلەردىڭ سىرتقى كەلبەتىنە جاڭعىرتۋ جۇرگىزىلمەي كەلگەن.
«بۇل جۇمىستاردى 4 كاسىپورىن اتقارادى. قازىر مەردىگەرلەر 1 جانە 3-شاعىن اۋدانداعى كوپقاباتتى 13 ءۇيدى جوندەۋگە كىرىستى. مەردىگەرلەرگە 100-گە جۋىق ادام جۇمىسقا تارتىلدى», دەدى جۇمابەك قاراجانوۆ.
اتىراۋ وبلىسى
