فوتو: استانا اكىمدىگى
استانا قالاسى اكىمدىگى ءدىن ىستەرى جونىندەگى باسقارمانىڭ قولداۋىمەن قۇرىلعان ينتەرنەت-راديودا قازاق حالقىنىڭ ءتول دۇنيەتانىمى مەن تۇرمىس-سالتى, ءداستۇرى ناسيحاتتالادى.
راديونىڭ اشىلۋ راسىمىنە جەرگىلىكتى مەملەكەتتىك ورگان, زيالى قاۋىم وكىلدەرى, عالىمدار مەن ونەر قايراتكەرلەرى كەلدى. قازاقستاننىڭ ەڭبەك سىڭىرگەن قايراتكەرى, ءانشى, اكتەر نۇرلان ونەرباەۆ پەن مەملەكەتتىك ەلتاڭبانىڭ اۆتورى, ساۋلەتشى جانداربەك مالىبەكوۆ لەنتا قيۋ راسىمىنە قاتىستى.
سونىمەن قاتار فيلولوگيا عىلىمدارىنىڭ دوكتورى, عالىم ايگۇل سىماقوۆا, داۋلەتكەرەي كاپ ۇلى, ءادىل احمەت سالتاناتتى شارانىڭ قوناعى بولدى.
«ALQA» راديوسىنىڭ باس رەداكتورى, قازاقستان جازۋشىلار وداعىنى مۇشەسى, اقىن سەرىك سەيىتمان راديونىڭ اتاۋىنا قاتىستى پىكىر ءبىلدىردى.
«الاش قايراتكەرلەرىمىز وسىدان 100 جىل بۇرىن «القا» دەگەن ادەبي ۇيىم قۇرعان بولاتىن. ءبىز وسى اتاۋدى جاڭعىرتۋ ماقساتىندا راديومىزدى «القا» دەپ اتادىق.
الداعى ۋاقىتتا باعدارلامالار قاتارى ارتا بەرەدى. ءبىزدىڭ ستۋديا القا قۇرىپ وتىرىپ, ماسەلە شەشەتىندەي, ەلدىڭ ەل بولۋى جونىندە سۇحبات قۇراتىن ورتالىققا اينالادى دەگەن ويدامىز», دەدى سەرىك سەيىتمان.
«ALQA»-دا «شەبەرلەر القاسى», «ونەر القاسى», «ساحناگەرلەر القاسى» سياقتى باعدارلامالار ەفيرگە شىعادى. ءارى باعدارلامالاردى جۋرناليستەر ەمەس, ونەردىڭ ءار سالاسىنا قاتىستى كاسىبي ماماندار جۇرگىزەتىن بولادى.
«راديو استانا قالاسى اكىمدىگى ءدىن ىستەرى جونىندەگى باسقارماعا قارايدى, سوندىقتان دىننەن الىس بولمايدى. تەرىس اعىمدار بەلەڭ الماۋى ءۇشىن ولارمەن كۇرەس جۇرگىزۋ ەلىمىزدىڭ ءاربىر پاتريوتىنىڭ, مەملەكەتتىك قۇرىلىمنىڭ نەگىزگى مىندەتى. ال ولارعا توسقاۋىل بولاتىن كۇش – ءبىزدىڭ ءداستۇرلى دۇنيەتانىمىمىز. سوندىقتان راديومىزدا قازاقتىڭ دۇنيەتانىمىنان الىس كەتپەيتىن, ءداستۇر, تاريح, مادەنيەت تاقىرىبىنداعى باعدارلامالار دايىندالادى», دەدى سەرىك سەيىتمان.
