«ماسس-مەديا تۋرالى» جانە وعان ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ماسس-مەديا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدار مەملەكەتتىك ەمەس بۇقارالىق اقپارات قۇرالدارىنا گرانت بەرۋ ارقىلى مەملەكەتتىك اقپاراتتىق ساياساتتى قارجىلاندىرۋ تەتىكتەرىن جەتىلدىرۋ, جاريالانعان ماتەريالعا تالاپ قويۋدىڭ ەسكىرۋ مەرزىمىن ءبىر جىلعا بەلگىلەۋ, مەملەكەتتىك تىلدەگى تەلە جانە راديوباعدارلامالار كولەمىن 50%-دان 60%-عا دەيىن ۇلعايتۋ جانە شەتەلدىك باعدارلامالاردى رەترانسلياتسيالاۋ ۇلەسىن 20%-دان 10%-عا دەيىن تومەندەتۋ كوزدەلىپ وتىر. سونىمەن قاتار قوعامنىڭ ادامگەرشىلىك تۇرعىسىندا دامۋىنا زيان كەلتىرۋ مەن جالپى ادامزاتتىق, ۇلتتىق, مادەني جانە وتباسىلىق قۇندىلىقتارعا نۇقسان كەلتىرۋگە وراي زاڭدارداعى جاڭالىقتاردا ۋاكىلەتتى ورگاننىڭ قۇزىرەتىنە بۇقارالىق اقپارات قۇرالدارىنىڭ مونيتورينگى جونىندەگى فۋنكتسيالار ەنگىزۋ, سونداي-اق ءجۋرناليستىڭ كاسىبي قىزمەتىنىڭ قۇقىقتىق كەپىلدىكتەرىن قامتاماسىز ەتۋ جانە باق ساۋالدارىن قاراۋ مەرزىمدەرىن 7-دەن 5 جۇمىس كۇنىنە دەيىن قىسقارتۋ دا بار.
پارلامەنتشىلەر سونىمەن قاتار «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ماسس-مەديا ماسەلەلەرى بويىنشا وزگەرىستەر ەنگىزۋ تۋرالى» زاڭدى دا قارادى. زاڭ اكىمشىلىك قۇقىق بۇزۋشىلىق تۋرالى كودەكستىڭ كەيبىر نورمالارىن «ماسس-مەديا تۋرالى» زاڭنىڭ ەرەجەلەرىنە سايكەس كەلتىرۋ ماقساتىندا ازىرلەنگەن بولاتىن. اتاپ ايتقاندا, اقپاراتتىق حابار تاراتۋ ساپاسىن قامتاماسىز ەتۋدى جانە مەديا كونتەنتتى رەتتەۋ سالاسىنداعى زاڭنامالىق شارالاردى نىعايتۋدى كوزدەيتىن وزگەرىستەر ەنگىزىلەدى.
سەناتورلاردىڭ ايتۋىنشا, زاڭداردى قابىلداۋ نورماتيۆتىك بازانى تۇجىرىمدامالىق تۇرعىدا قالىپتاستىرۋعا مۇمكىندىك بەرەدى جانە بۇقارالىق ۇلتتىق زاڭناما مەن اقپارات قۇرالدارىنا قۇقىق قولدانۋ تاجىريبەسىن ودان ءارى جەتىلدىرۋگە ىقپال ەتەدى.
كوميتەت مۇشەلەرى تالقىلاۋ قورىتىندىسى بويىنشا زاڭداردى پالاتا وتىرىسىنا قاراۋعا جىبەرۋ تۋرالى شەشىم قابىلدادى.
