فوتو: gov.kz
- تاەكۆوندودان اسكەريلەر اراسىنداعى الەم چەمپيوناتىندا قازاقستان قۇراماسى 1 التىن مەن 3 كۇمىس مەدالعا قول جەتكىزدى. 53 كگ سالماقتا ونەر كورسەتكەن ياسمينا نارباەۆا فينالدا نەمىس سپورتشىسىن ۇتىپ, التىننان القا تاقسا, جاۆوحيرحون يسلاموۆ (58 كگ), امانبول بەگىمبەتوۆ (63 كگ), نۇراي باۋىرجانوۆا (49 كگ) اقتىق سىندا ۇتىلدى.
- لوندونداعى «ۋەمبلي» ستاديونىندا وتكەن ۋەفا چەمپيوندار ليگاسىنىڭ فينالىندا ءمادريدتىڭ «رەالى» مەن دورتمۋندتىڭ «بورۋسسياسى» شەبەرلىك بايقاستى. بۇل ماتچ 2:0 ەسەبىمەن كورولدىك كلۋبتىڭ پايداسىنا شەشىلدى. يسپاندىقتاردىڭ ساپىنداعى دانيەل كارۆاحال 74, ۆينيسيۋس جۋنيور 83-مينۋتتاردا نىسانانى ءدال كوزدەدى. ءسويتىپ, «رەال» ءوز تاريحىندا 15 رەت قارت قۇرلىقتىڭ ەڭ بەلدى كۋبوگىن يەلەندى.
- قازاقستاننىڭ كوركەم گيمناسشىسى ەلجانا تانيەۆا پاريج وليمپياداسى قارساڭىنداعى جاتتىعۋىن گەرمانيادا وتكىزۋدى ءجون كوردى. «الدا ەكى الەم كۋبوگى بار. بۇل جارىستار ەۋروپادا وتەدى. قازىرگى كەزدە ەلجانانىڭ باعدارلاماسىن جاڭارتىپ, كۇردەلەندىرۋدى كوزدەپ وتىرمىز. بۇل وزگەرىستەردىڭ قانداي ناتيجە بەرگەنىن جوعارىدا ايتىلعان حالىقارالىق باسەكەلەر بارىسىندا بايقاپ كورەمىز. كوپ ۇزاماي گەرمانيادا جاتتىعۋ جيىنىن وتكىزەمىز. ال اۋا رايىنا بەيىمدەلۋ ءۇشىن وليمپياداعا ءبىر اپتا قالعاندا يسپانياعا ساپار شەگۋدى جوسپارلادىق», دەيدى ۇلتتىق قۇرامانىڭ باس باپكەرى ءاليا يۋسۋپوۆا.
- 2028 جىلى لوس-اندجەلەستە الاۋى تۇتاناتىن وليمپيا ويىندارىنا حالىقارالىق بوكس قاۋىمداستىعىنا (IBA) مۇشە مەملەكەتتەردىڭ وكىلدەرى قاتىسپايدى. حالىقارالىق وليمپيادا كوميتەتى (حوك) وسىنداي قاتاڭ تالاپ قويدى. ولار «IBA-دا بىلىق كوپ. ولار تازا سپورتتىق قاعيداتتى ۇستانبايدى. وزدەرىن سىيلايتىن ۇلتتىق فەدەراتسيالار اتالعان ۇيىمنىڭ قۇرامىنان شىعۋعا ءتيىس» دەپ مالىمدەدى. بۇل جاعداي كوپتەگەن ەلدى تىعىرىققا تىرەپ وتىر. ويتكەنى قازىرگى كەزدە الەمنىڭ 200-دەن اسا مەملەكەتىنىڭ فەدەراتسيالارى IBA-نىڭ مۇشەسى. سولاردىڭ قاتارىندا قازاقستان دا بار.
- قازاقستان ۇلتتىق وليمپيادا كوميتەتىنىڭ (ۇوك) پرەزيدەنتى گەننادي گولوۆكين حالىقارالىق وليمپيادا كوميتەتىنىڭ (حوك) Olympism 365 كوميسسياسىنىڭ مۇشەسى بولىپ تاعايىندالدى. بۇل تۋرالى حوك پرەزيدەنتى توماس باح قازاقستان ۇوك-كە رەسمي حات جولداۋ ارقىلى حابارلادى. ول حاتتا ء«سىزدى كوميسسيا مۇشەسى ەتىپ تاعايىنداۋ مەن ءۇشىن ۇلكەن مارتەبە. كوميسسيا جۇمىسىنا قوساتىن ۇلكەن ۇلەسىڭىز ءۇشىن سىزگە الدىن الا العىس بىلدىرەمىن», دەپ جازىلدى.
- قازاقستاننىڭ حوككەيشىسى ءادىل بەكەتاەۆتىڭ سوققىسى چەحيادا وتكەن الەم چەمپيوناتىنىڭ قورىتىندىسى بويىنشا ەكىنشى ورىندى يەلەندى. ونىڭ قارسىلاستار قاقپاسىنا باعىتتاعان شايباسى ساعاتىنا 162,38 شاقىرىمدىق جىلدامدىقپەن جۇيىتكىگەن ەكەن. ال بۇل اتالىمدا ۆيكتور حەدمان وزدى. شۆەتسيالىق قورعاۋشىنىڭ سوققىسى ساعاتىنا 163,05 شاقىرىمدىق جىلدامدىقپەن زىمىرادى.
- اقش-تىڭ نيۋ-دجەرسي شتاتىنداعى نيۋارك قالاسىندا ارالاس جەكپە-جەكتەن UFC 302 ءتۋرنيرى ءوتتى. باستى جەكپە-جەكتە جەڭىل سالماقتاعى رەسەيلىك يسلام ماحاچەۆ امەريكالىق داستين پورەنى بەسىنشى راۋندتا «قىلقىندىرۋ» ادىسىمەن ۇتىپ, چەمپيوندىق اتاعىن ءساتتى قورعادى. وسى جەڭىستەن كەيىن داعىستاندىق فايتەر جارتىلاي ورتا سالماققا اۋىسۋعا نيەتتى ەكەنىن مالىمدەدى. ال بۇل سالماقتا قازاقتىڭ قايسار ۇلى شاۆقات راحمونوۆتىڭ ونەر كورسەتىپ ءجۇر.
- سپورتتىق گيمناستيكادان سلوۆەنيانىڭ كوپەر قالاسىندا وتكەن «Challenge Cup» دوداسىندا دياس تويشىبەك «ات» جاتتىعۋىندا كۇمىس مەدالدى يەلەندى. باس جۇلدەنى ۋكراينالىق يليا كوۆتۋن ولجالاسا, حورۆاتيالىق ماتەو جۋگەتس قولاعا قول سوزدى.
- ەلىمىزدىڭ تانىمال كاسىپقوي بوكسشىسى انگەلينا لۋكاس بانگكوكتاعى بوكس كەشىندە يندونەزيالىق حارما يەستيمەن جۇدىرىقتاسىپ, ونى ۇپاي سانىمەن ۇتتى. بۇل – وتانداسىمىزدىڭ ونىنشى جەڭىسى!
- شۆەيتساريانىڭ نونىندا فۋتزالدان 2026 جىلى جالاۋى جەلبىرەيتىن ەۋروپا چەمپيوناتىنىڭ ىرىكتەۋ ءتۋرنيرىنىڭ جەرەبەسى تارتىلدى. التىنشى توپقا تۇسكەن جەرلەستەرىمىز ارمەنيا, دانيا جانە البانياعا قارسى وينايدى. ىرىكتەۋ سىنى بيىلعى جىلدىڭ جەلتوقسانىندا باستالىپ, كەلەسى جىلدىڭ ساۋىرىندە اياقتالادى. ال سارى قۇرلىقتىڭ باستى دوداسى 2026 جىلعى 18 قاڭتار مەن 8 اقپان ارالىعىندا وتەدى.
