پالاتا سپيكەرى بىرىككەن ۇلتتار ۇيىمىمەن ىنتىماقتاستىقتى نىعايتۋ قازاقستاننىڭ سىرتقى ساياساتىنداعى ماڭىزدى باعىت ەكەنىن ايتتى. وتكەن 30 جىلدىڭ ىشىندە ناتيجەلى ەكىجاقتى بايلانىس ورناپ, بەرىك سەرىكتەستىك قالىپتاستى. سول ارقىلى بىرقاتار كەلىسىمدەرگە قول جەتكىزىلدى.
كەزدەسۋدە تاراپتار بىرلەسكەن جۇمىس ارقىلى ودم قاعيداسىن جانە 2021-2025 جىلدارعا ارنالعان ەلدىك باعدارلامانى ىسكە اسىرۋ ماسەلەلەرىنە ايرىقشا نازار اۋداردى. ماۋلەن اشىمباەۆ قازاقستان پرەزيدەنتى ورنىقتى دامۋ باعىتىنا باسا ءمان بەرەتىنىن اتاپ ءوتتى. سوعان سايكەس اتالعان سالادا وڭ وزگەرىستەردى كوزدەيتىن جۇيەلى شارالار قابىلدانىپ, كەشەندى جوبالار ازىرلەنىپ جاتىر.
«قازاقستان پرەزيدەنتى قاسىم-جومارت كەمەل ۇلى توقاەۆ بىرىككەن ۇلتتار ۇيىمىنىڭ سامميتىندە سويلەگەن سوزىندە ورنىقتى دامۋ ماقساتتارىن ىسكە اسىرۋ ءبىزدىڭ مەملەكەت ءۇشىن ۇلتتىق باسىمدىق ەكەنىن اتاپ ءوتتى. وسىعان بايلانىستى كوزدەگەن ناتيجەلەرگە قول جەتكىزۋ ءۇشىن ەلىمىزدە ماقساتتى شارالار قابىلدانىپ جاتىر. بۇل جۇمىسقا پارلامەنت دەپۋتاتتارى دا بەلسەندى قاتىسۋدا. سونىڭ اياسىندا بىلتىر مەملەكەت باسشىسىنىڭ تاپسىرماسىمەن ورنىقتى دامۋ سالاسىنداعى ۇلتتىق ماقسات-مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيا قۇرىلدى», دەدى پالاتا توراعاسى.
سۇحبات بارىسىندا اتالعان پارلامەنتتىك كوميسسيا قىزمەتىنىڭ ناتيجەلەرى دە ءسوز بولدى. سونداي-اق ازىرلەنىپ جاتقان جوبالار, ونىڭ ىشىندە سەناتتىڭ قوعامدىق جوبالىق كەڭسەسى, Maqsut Narikbayev University جانە اقمولا وبلىسىنىڭ اكىمدىگى بىرلەسىپ قولعا العان اكسەلەراتوردىڭ ماڭىزى تالقىلاندى.
ءوز كەزەگىندە كاتارجينا ۆاۆەرنيا بۇۇ دب ورنىقتى دامۋ ماقساتتارىن ىسكە اسىرۋدا جانە ونىڭ ءوسۋ قارقىنىن قولداۋ باعىتىندا قازاقستانمەن ىنتىماقتاستىقتى نىعايتۋعا مۇددەلى ەكەنىن ايتتى. سونداي-اق ول ينستيتۋتتارمەن جانە مۇددەلى تاراپتارمەن بايلانىس ورناتۋعا اشىق ەكەنىن جەتكىزدى.
