سۋرەتتەردى تۇسىرگەن – جەڭىس ىسقاباي
تالدىقورعاندا ەرەكشە ۇلگىدەگى «جەتىسۋ» كاسىبي ۆولەيبول كلۋبىنا ارنالعان جاتتىعۋ بازاسى جىل سوڭىندا پايدالانۋعا بەرىلەدى. ونىڭ جانىنان بوي كوتەرگەن سپورتشىلار باسپاناسى دا بىتۋگە جاقىن. دەمەۋشىلەر قاراجاتى ەسەبىنەن كلۋب سپورتشىلارىنا بار جاعداي جاسالىنباق. ونىڭ ۇستىنە سول اتىمتاي جومارت ازاماتتار حالىقارالىق تالاپتار مەن ستاندارتتارعا ساي كەلەتىن ۇستەل تەننيسى ورتالىعىن دا ەل يگىلىگىنە ۇسىنباق نيەتتە. قۇرىلىس جۇمىستارىن كوزبەن كورگەن وبلىس اكىمى بەيبىت يساباەۆ قوس نىساننىڭ حالىققا قىزمەت ەتەرىنە سەنىم ءبىلدىردى.
اۋەلى ءوڭىر باسشىسى جاتتىعۋ بازاسىنا باردى, وندا جاقىن كۇندەردە «جەتىسۋ» كۆك ەرلەر مەن ايەلدەر كوماندالارىنىڭ نەگىزگى قۇرامى, سونداي-اق جاستار قۇرامى جاتتىعادى. ءبىر ەرەكشەلىگى, بۇل سپورتتىق جاتتىعۋ بازاسىنىڭ ەل ىشىندە بالاماسى جوق. وندا ايەلدەر مەن ەرلەر قۇرامىنىڭ جاتتىعۋىنا ارنالعان ەكى بولەك زال بار. سونداي-اق سپورتزالى, قاجەتتى اكىمشىلىك جانە سانيتارلىق-تۇرمىستىق ءۇي-جايلار, مەديتسينالىق, ماسساج بولمەلەرى بار.
ب.يساباەۆ مەردىگەر ۇيىمنىڭ وكىلدەرىمەن, «جەتىسۋ» كۆك ديرەكتورىمەن بىرگە نىساندى جايلاستىرۋ, سپورتتىق جابدىقتاردى ورنالاستىرۋ, ىرگەلەس اۋماقتى اباتتاندىرۋ ماسەلەلەرىن تالقىلاپ, سونداي-اق كلۋبتى دامىتۋ جوسپارلارى تۋرالى پىكىر الماستى. سونىمەن قاتار سپورتتى كوممەرتسيالاندىرۋ, تيىسىنشە كلۋب جۇيەسىنە كەزەڭ-كەزەڭىمەن كوشۋ جۇرگىزىلىپ جاتقانىن اتاپ ءوتتى.
«قابىلدانعان شارالار مەن دەمەۋشىلىك قولداۋدىڭ ارقاسىندا ءبىزدىڭ «جەتىسۋ» كاسىبي ۆولەيبول كلۋبىندا جاتتىعۋ وتكىزۋگە ارنالعان جەكە سپورتتىق بازا مەن كلۋبتىڭ ۆولەيبولشىلارىنا ارنالعان تۇرعىن ءۇي سالىنىپ جاتىر. كەلەسى جىلى ۆولەيبولعا بەيىمدەلگەن مەكتەپ اشۋدى جوسپارلاپ وتىرمىز. جالپى, ءبىلىم بەرەتىن مەكتەپتەردەن ۆولەيبولعا تالانتى بار بالالار ىرىكتەلەدى. بۇل مەكتەپتە ولار ۆولەيبولمەن بەلسەندى اينالىسادى. وسىلايشا, ءوز ويىنشىلارىمىزدى ۇيرەتىپ, ءوز چەمپيوندارىمىزدى تاربيەلەپ شىعارامىز», دەدى ب.يساباەۆ.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, جاتتىعۋ بازاسىنىڭ عيماراتىن سالۋ مەن بەزەندىرۋ باعىتىنداعى قۇرىلىس-مونتاجداۋ جۇمىستارىنىڭ باسىم بولىگى ءىس جۇزىندە اياقتالعان. بۇدان بۇلاي جاتتىعۋ زالدارىن جايلاستىرۋعا ەرەكشە نازار اۋدارىلادى. بۇل زالداردا ەڭ ماڭىزدىسى جوعارى ساپالى سپورتتىق ەدەن جابىنى توسەلەدى, سونداي-اق ىرگەلەس اۋماق اباتتاندىرىلادى.
«جەتىسۋ» كۆك ديرەكتورى نياز جانتىلەۋوۆتىڭ ايتۋىنشا, سپورتشىلارعا ارنالعان شاعىن وتباسىلىق تۇرعىن ءۇي 40-45 ورىنعا ەسەپتەلگەن. جەرتولەسى بار تورتقاباتتى عيماراتتىڭ 2 كىرەبەرىسى بولادى. ولاردىڭ بىرىندە 12 ءبىر بولمەلى جانە 3 ەكى بولمەلى, ال ەكىنشىسىندە جەكە ۆاننا بولمەلەرى بار 26 بولمە بار. سونداي-اق قاجەتتى سانيتارلىق-تۇرمىستىق ءۇي-جايلار قاراستىرىلعان. وبلىس اكىمى وسىنداي مۇمكىندىكتەردەن كەيىن كلۋب ءوزىنىڭ ويىن دەڭگەيىن كوتەرۋى كەرەكتىگىنە ەرەكشە ەكپىن ءتۇسىردى.
ودان كەيىن ب.يساباەۆ تولىقتاي دەمەۋشىلىك قاراجات ەسەبىنەن سالىنىپ جاتقان, حالىقارالىق تالاپتار مەن ستاندارتتارعا ساي كەلەتىن ۇستەل تەننيسى ورتالىعىنا باردى. نىساندا تەمىربەتون جۇمىستارى اياقتالۋعا جاقىن. ازىرگە قۇرىلىسقا 25-كە جۋىق ادام جۇمىلدىرىلعان, الداعى ۋاقىتتا جۇمىسشىلار سانى ارتتىرىلادى. جاتتىعۋلار مەن جارىستار وتەتىن زالدىڭ جالپى اۋدانى 1 600 شارشى مەتر, 150 ورىندىق تريبۋناسى بار.
ورتالىققا 16 تەننيس ۇستەلى ورناتىلادى, حالىقارالىق جارىستار كەزىندە تەك 9 ۇستەل عانا قالدىرىلادى. وبلىستىق دەنە شىنىقتىرۋ جانە سپورت باسقارماسىنىڭ باسشىسى ۇلان رىسقۇلدىڭ ايتۋىنشا, عيماراتتىڭ ەكىنشى قاباتىنىڭ پايدالى الاڭىن نەعۇرلىم ءتيىمدى پايدالانۋ ءۇشىن شاحمات كلۋبىن اشۋ كوزدەلىپ وتىر. وبلىس اكىمى جاڭا سپورت نىسانىنىڭ اۋماعىن اباتتاندىرۋ ماسەلەلەرىنە ەرەكشە نازار اۋداردى. كوگالداندىرۋ, تۇراق ورىندارىن ورنالاستىرۋدىڭ جوسپارلارى تالقىلاندى.
بەيبىت وكسىكباي ۇلى وڭىردەگى جاڭا سپورت نىساندارى رەزەرۆتىك بيۋدجەت پەن دەمەۋشىلىك قاراجات ارقىلى بوي كوتەرگەنىن اتاپ ءوتتى.
«مۇنداي نىسانداردى سالۋعا ءبىز الەۋمەتتىك نىسانداردى نەمەسە تۇرعىن ۇيلەردى سالۋعا كوزدەلگەن بيۋدجەت قاراجاتىن پايدالانبايمىز, دەمەۋشىلەردى تارتامىز. مادەنيەت پەن سپورت سالالارىن دامىتۋ جايى ۇنەمى نازارىمىزدا بولۋى كەرەك. بۇل – ازاماتتاردىڭ رۋحاني جانە فيزيكالىق دەنساۋلىعىن نىعايتۋعا اسەر ەتەتىن الەۋمەتتىك ساياساتتىڭ ماڭىزدى بولىگى», دەدى ول.
اتاپ وتسەك, دەمەۋشىلەر وڭىردەگى الەۋمەتتىك وسال توپ ساناتىنداعى تۇرعىندارعا ءۇي سالۋعا دا كومەك قولىن سوزدى. ماسەلەن, «سامۇرىق-قازىنا» اق قاراجاتى ەسەبىنەن تالدىقورعاندا ارقايسىسى 60 پاتەرلىك بەسقاباتتى 7 ءۇي سالىنىپ جاتىر. ارقايسىسىنىڭ سالىنۋ ساتىسى – ازىرگە ءار دەڭگەيدە. «قازاقسترويەكسكليۋزيۆ» كومپانيالار توبىنىڭ باس ينجەنەرى يسميحان كاريموۆتىڭ ايتۋىنشا, ءار ۇيدە 30 ءۇش بولمەلى, 15 ءبىر جانە ەكى بولمەلى پاتەر بار.
بەس كوپقاباتتى ءۇيدىڭ قۇرىلىسى تامىز ايىندا اياقتالادى, ال قالعان ەكەۋى جىلىتۋ ماۋسىمى باستالعانعا دەيىن بىتۋگە ءتيىس. مەردىگەر ۇيىممەن جانە قالالىق اكىمدىك وكىلدەرىمەن بىرگە ۇيلەردىڭ قاسبەتتەرىنىڭ ءتۇس ۇيلەسىمى مەن قاپتايتىن ماتەريالدارىن تاڭداۋ, اۋلالاردى اباتتاندىرۋ ماسەلەلەرىن تالقىلاعان وبلىس اكىمى ب.يساباەۆ قۇرىلىس-مونتاجداۋ جۇمىستارىن مەرزىمىندە, ساپالى جۇرگىزۋ ءبىرىنشى كەزەكتەگى مىندەت ەكەنىن ايتتى.
جەتىسۋ وبلىسى
