فوتو: اقوردا ءباسپاسوز قىزمەتى
كەزدەسۋ بارىسىندا ەكولوگيالىق مادەنيەتتى قالىپتاستىرۋ جانە قورشاعان ورتا پروبلەمالارىن شەشۋ ىسىنە ازاماتتاردى, ۇكىمەتتىك ەمەس ۇيىمدار مەن بيزنەستى كەڭىنەن تارتۋ ماسەلەلەرى تالقىلاندى.
قاسىم-جومارت توقاەۆ ەۆگەني مۇحامەدجانوۆتىڭ باستاماسىمەن جۇزەگە اسىرىلىپ جاتقان ECO Network جوباسىن وڭ باعالادى. مەملەكەت باسشىسى, ەڭ الدىمەن, ادامنىڭ مادەنيەتىن, ونىڭ قورشاعان ورتامەن قارىم-قاتىناسىن قالىپتاستىرۋدى, سونداي-اق تۇرمىستىق قالدىقتاردى بولەك سۇرىپتاۋ جانە قايتا وڭدەۋدى كوزدەيتىن «ەكوحاب», «جاسىل كەڭسە», «جاسىل مەكتەپ» باعىتتارى ەكومادەنيەتتى دارىپتەۋدىڭ ءتيىمدى تەتىگى رەتىندە جاپپاي تاراتۋعا لايىق تاجىريبە ەكەنىن اتاپ ءوتتى.
ەۆگەني مۇحامەدجانوۆتىڭ ايتۋىنشا, قازىردىڭ وزىندە ECO Network جوباسىنا قازاقستان بويىنشا جۇزدەگەن كومپانيا مەن وقۋ ورىندارى قوسىلعان. ولار بيزنەس پروتسەستەرىنە ەكوستاندارتتاردى ەنگىزىپ, ەكونوميكانى دەكاربونيزاتسيالاۋ ۇدەرىسىنە ەلەۋلى ۇلەس قوسىپ جاتىر.
پرەزيدەنت ەكولوگتىڭ باستامالارى جالپىۇلتتىق «تازا قازاقستان» ەكولوگيالىق اكتسياسىنىڭ يدەولوگياسىمەن ۇندەس ەكەنىنە نازار اۋداردى.
سونىمەن قاتار قاسىم-جومارت توقاەۆ ەۆگەني مۇحامەدجانوۆتىڭ «جاسىل الماتى» جوبالىق كەڭسەسىنىڭ جەتەكشىسى رەتىندە شاھاردىڭ ەكولوگيالىق ماسەلەلەرىن شەشۋدىڭ ءتيىمدى ءارى كرەاتيۆتى تاسىلدەرىن جۇزەگە اسىراتىنىنا سەنىم ءبىلدىردى.
