جاسى جەتپىستەن اسسا دا, تراكتورعا, ءۇي مەن ءتۇزدىڭ شارۋاسىنا اجەي ءالى تىڭ. ەڭبەك جولىن مەحانيزاتور بولىپ باستاعان اجەيدىڭ كوك تراكتورىنا دەگەن قۇرمەتى ەرەكشە. اۋىل اكىمى ديزەل وتىنىن قۇيىپ بەرسە بولدى, كەز كەلگەن ءوتىنىشىن جەرگە قالدىرمايدى. كوك شىققالى بەرى رەسپۋبليكالىق ەكو-اكتسيانىڭ بەلورتاسىندا ءجۇر. تراكتورىنىڭ جۇك تاسيتىن تىركەمەسىمەن كۇل-قوقىستى اۋىل شەتىندەگى پوليگونعا تاسىپ بەردى.
بۇعان قوسا رىمتاي اجەي – اۋىل تۇرعىندارى اراسىندا وتەتىن «تازا اۋلا» بايقاۋىنىڭ جىل سايىنعى جەڭىمپازى. قار ەرىگەن بەتتە اۋلاسىن ەلدەن بۇرىن تازارتىپ قوياتىنى – اۋىلعا دەگەن قۇرمەتى, تابيعاتقا دەگەن جاناشىرلىعى.
– رىمتاي اجەي – اۋىلدىڭ قادىرلى اناسى. اۋىلعا تىلەكشى, جاناشىر جان. ەڭبەككە ەرتە جاسىنان ارالاسقان. تىنىم تاپپايدى. دالانىڭ شارۋاسىندا دا ءوزى جۇرەدى. اۋىلدان تەحنيكا تابىلماي قالىپ جاتسا, بىردەن رىمتاي اجەيدىڭ كومەگىنە جۇگىنەمىز. جانار-جاعارمايىن قۇيىپ بەرەمىز. كوك تراكتورىمەن كوپ شارۋامىزدى ءبىتىرىپ بەرەدى. مىنە, ءبىر ايدان استى, ەكولوگيالىق سەنبىلىككە ەڭبەگىن ءسىڭىرىپ ءجۇر. قىسى-جازى كومەگىن ايامايدى, ەڭبەگىن پۇلدامايدى. وسىنداي ۇلكەندەرىمىز بار كەزدە اۋىلدىڭ بەرەكە-بىرلىگى ارتا تۇسەدى, – دەيدى اۋىل اكىمى نۇرلان ابجانوۆ.
رىمتاي ابەنقىزى – اقشاتاۋ اۋىلىنىڭ تۋماسى. ەڭ العاش 19 جاسىندا جۇمىسقا مەحانيزاتور بولىپ ورنالاسقان ول تالدى اۋىلىندا تراكتورىمەن جەر جىرتىپ, ءشوپ شاۋىپ, مال بورداقىلاۋ الاڭدارىندا ەڭبەك ەتكەن.
رىمتاي اجەيدىڭ كۇيەۋى عازيز يمانبەكوۆ تە مەحانيزيتور بولىپتى. ولار قىردا بىرگە جارىسىپ ەڭبەك ەتكەن. بۇل تۋرالى كەيىپكەرىمىز ەستەلىگىندە بىلاي دەيدى.
– ۇيدەن شىعاردا ەكەۋمىز ەكى تراكتورمەن قىرعا قاراي جارىسىپ باراتىنبىز. دەگەنمەن مەنەن وزىپ كەتسە, الاڭداپ ارتىنا قارايلاپ قوياتىن ەدى. جاز بويى ەكى تراكتورمەن قاتار ءجۇرىپ, ءشوپ شاباتىن ەدىك. كۇز كەلگەندە قويشىلاردى كوشىرەمىز. تەحنيكا بولعان سوڭ, بۇزىلماي قويمايدى. توقتاي قالىپ, سايمان-ساۋىتىمىزدى الىپ شىعىپ, جوندەۋگە كىرىسىپ كەتەتىن ەدىك. كۇيەۋىم ەڭبەكتەن قاشپايتىن ەدى. بارلىعىن ادال ءارى تازا ىستەيتىن, – دەيدى اسىل اجەي.
رىمتاي ابەنقىزى تاعدىر سىناعىنا سىنبادى. تەمىردەي توزىمدىلىك تانىتتى. قۇداي بەرگەن ەكى ۇلى, ارتىنشا اسىل جارى دۇنيەدەن وزدى. بىراق مويىمادى. ىشىندەگى قايعى-مۇڭىن ەڭبەككە جۇمسادى. ەرىك-جىگەرىن تىكتەدى. قازىر ەكى قىزى, التى نەمەرەسىنىڭ تىلەۋىن تىلەپ وتىر.
اۋىل اناسى قارا جۇمىستى تالعامايدى. ءبىر كەزدەرى قۇرىلىسقا دا قاتىسىپ, اۋىلداعى ۇيلەردى جوندەگەن. ءتۇزدىڭ كەز كەلگەن شارۋاسى ءالى دە قولىنان كەلەدى.
ءالدى اجەي ءبىر كەزدەرى بوزكىلەمدە دە بەلدەسكەن. شەت اۋدانىنىڭ 80 جىلدىق مەرەيتويىندا ايەلدەر اراسىنداعى كۇرەسكە قاتىسىپ, اۋىر سالماق دارەجەسىندە ءوزىنىڭ 58 كيلو سالماعىمەن ءبىراز قارسىلاسىنىڭ جاۋىرىنىن جەرگە تيگىزگەنىن ەل-جۇرت ءالى كۇنگە دەيىن اڭىز ەتىپ ايتادى.
ەڭبەك ادامى رىمتاي ابەنقىزى دەپۋتات تا بولعان. حالىق قالاۋلىسى رەتىندە اقشاتاۋ اۋلىنا قاتىنايتىن جولدىڭ سالىنۋىنا ۇلەسىن قوسقان.
اسىل اجەيدىڭ مىناداي پايىمى بار: «اۋىلدى تۇلەتۋ – ۇلتتى ۇلى ەتۋ». ءسوز سوڭىندا وسىنى بويتۇمار ەتىپ العان اۋىل اناسىنىڭ عۇمىرى ۇزاق بولسىن دەمەكپىز.
قاراعاندى وبلىسى
