تەك سۋ قايتا باستاعان ساتتەن ەتنو-مادەني ورتالىقتاردىڭ وكىلدەرى, ۆولونتەرلەر, «اسسامبلەيا جاستارى», ساياسي پارتيالاردىڭ وكىلدەرى, مەملەكەتتىك جانە ازاماتتىق قىزمەتكەرلەر, مەكەمەلەر مەن ۇيىمداردىڭ جۇمىسكەرلەرى – ءبارى پەتروپاۆل قالاسىنىڭ الاڭدارىن كۇل-قوقىستان تازارتىپ, قىستان قالعان قالدىقتاردى ءۇيىپ, جۇك ماشينالارىمەن سىرتقا تاسىدى. كوشەلەر تارتىپكە كەلىپ, الاڭدار اباتتاندىرىلىپ, اۋلالار سىرلانىپ, ەسكى, قۋراعان بۇتاقتار كەسىلىپ, بارلىق دۇنيە جاڭارىپ قالدى. بۇل «تازا قازاقستان» اكتسياسىنىڭ «ونەگەلى ۇرپاق» باستاماسى اياسىنداعى شارۋالار ەدى.
سونىڭ ىشىندە ۇيلەرىن سۋ تاسقىنى باسىپ قالعان شاعىن اۋداندارداعى تازالىق جۇمىستارى قىزۋ جۇرگىزىلدى. مۇندا سۋمەن اعىپ كەلگەن قوقىستىڭ ۇشى-قيىرى جوق ەدى. مىنە, سول اۋدانداردا اپتا سايىن سەنبىلىكتەر ءۇزىلىسسىز بولىپ تۇردى. اتاپ ايتقاندا, تەرى زاۋىتى اۋدانىندا – 3, زارەچنىي كەنتىندە – 2, ويقالادا – 3, قىزىلجار اۋدانىنىڭ شەكاراسىندا ورنالاسقان تەپليچنىي كەنتىندە – 1 جانە رەچپورت ايماعىندا 1 رەتتەن سەنبىلىك وتكىزىلدى. وبلىس اۋداندارىنان الىنعان اقپاراتتارعا قاراعاندا, قىزىلجار اۋدانىنىڭ سۋ باسقان 18 اۋلىندا, ەسىل اۋدانىنىڭ 2 اۋلىندا, تايىنشا اۋدانىنىڭ 8 اۋلىندا, ع.مۇسىرەپوۆ اۋدانىنىڭ 2 اۋلىندا, شال اقىن اۋدانىنىڭ 4 اۋلىندا حالىق سەنبىلىككە شىعىپ, كوشەلەر مەن اۋلالاردى قوقىستان تازارتۋمەن بىرگە اعاش ەگىپ, كوشەلەردى كوركەيتۋگە اتسالىستى.
قىزىلجاردىڭ سۋ باسپاعان اۋداندارىندا دا سەنبىلىكتەر وتكىزىلدى. سونىڭ ىشىندە «تۇڭعىش پرەزيدەنت پاركىندە», تۋحاچەۆسكي كوشەسىندە, دزەرجينسكي بۇرىلىسىندا بولعان سەنبىلىكتەرگە 400-دەي ادام قاتىستى. مۇنداعى جاستار اراسىندا ستۋدەنتتەر مەن ۆولونتەرلەر, اسكەري قىزمەتكەرلەر دە كوپ بولدى.
سەنبىلىكتەر كەزىندە جاستاردىڭ ءبىر-بىرىنە دەگەن ءازىل-قالجىڭى مەن دوستىق قارىم-قاتىناستارى ولاردى ءبىر-بىرىنە جاقىنداستىرا ءتۇستى. ء«بىز بىرگەمىز» اكتسياسىنىڭ اياسىندا وتكىزىلگەن سەنبىلىكتەرگە وبلىستىڭ 15 مىڭداي ادامى قاتىسىپ, 2 مىڭنان ارتىق اعاش كوشەتتەرى وتىرعىزىلدى. وسى سەنبىلىكتەردە 30 مىڭ توننا قوقىس 700-دەي تەحنيكانى پايدالانىپ, قالا مەن ەلدى مەكەندەردىڭ سىرتىنا تاسىلدى. سونداي-اق 7 مىڭنان اسا اعاشتىڭ ءتۇبى اكتەلىپ, تازا كۇيگە ەنگىزىلدى. بۇعان قوسا ء«مولدىر بۇلاق» باستاماسىن قولداعان تۇرعىندار اۋا رايىنىڭ ءالى سالقىن ەكەنىنە قاراماي اۋىلداردىڭ ماڭىنداعى سۋ توعاندارىن, كولدەردى تازالاۋعا دا بەلسەنە اتسالىسقان.
ء«بىز بىرگەمىز» اكتسياسىنىڭ ماقساتى سۋ تاسقىنىنىڭ زارداپتارىن جويۋ, ءارتۇرلى ەتنوس وكىلدەرىنىڭ بىرلىگىن نىعايتۋ, ءوزارا كومەك پەن دوستىقتى ناسيحاتتاۋ بولسا, سونىڭ ءبارى ءبىزدىڭ وبلىستا ايقىن كورىنىس تاپتى. سەنبىلىكتەر ءوتىپ جاتقان جەرلەرگە دالالىق پەشتەر ورناتىلىپ, كوك ءتۇتىن كولبەي ۇشىپ, قازانداردا ۇلتتىق دامدەر ءپىسىرىلىپ, ءيسى مۇرىندى جاراتىن ءدامدى تاعامداردىڭ دايىندالىپ جاتقانى دا جۇمىس ىستەپ جۇرگەن حالىقتىڭ كوڭىل حوشىن ارتتىرا ءتۇستى. ونىڭ ۇستىنە جەرگىلىكتى ونەرپازداردىڭ كۇشىمەن اسەم اندەر مەن كوڭىلدى كۇيلەر دە توگىلىپ جاتتى. مۇنداي جەرلەردە جۇمىس ىستەۋگە جاستاردىڭ دا ىنتاسى ارتا تۇسكەنى كورىنىپ تۇردى.
ءبىز بولعان مامليۋت اۋدانىنىڭ ورتالىعىندا دا وسىنداي جۇمىستار قىزۋ جۇرگىزىلىپ جاتىر ەكەن. بۇل – پەتروپاۆل قالاسىنان 40 شاقىرىمداي جەردە ورنالاسقان ەلدى مەكەن. تۇرعىن سانى كوپ بولماسا دا, بۇل دا قالانىڭ ساناتىندا. بارلىق مەكەمە-ۇيىمنىڭ الدىن, كوشەنى, اۋلانى تازالاپ, سىرلاپ جاتقان حالىق ءجۇر. قالا اكىمى ەركىن سامارحان ۇلى دا سەنبىلىككە شىققان. «بۇگىن تۇرعىنداردىڭ بارلىعى قالانى تازارتۋعا زور ىنتامەن شىقتى. قالانىڭ تازالىعى الدىمەن وزدەرىنە كەرەك ەكەنىن حالىق تۇسىنە باستاعان سياقتى», دەدى ول.
سولتۇستىك قازاقستان وبلىسى
