فوتو: قر قورعانىس مينيسترلىگى
بەلارۋس مەملەكەتىنەن كەلگەن ارىپتەسىن قازاقستان قورعانىس ءمينيسترى گەنەرال-پولكوۆنيك رۋسلان جاقسىلىقوۆ قارسى الدى.
ايتا كەتەيىك, بيىل بەلارۋس رەسپۋبليكاسى شانحاي ىنتىماقتاستىق ۇيىمىنا مۇشەلىككە قابىلداۋ راسىمدەرىن اياقتادى. وسىعان بايلانىستى قازاقستاننىڭ قورعانىس ءمينيسترى بەلارۋس ەلىنىڭ تولىققاندى مۇشە مارتەبەسىن الۋى ۇيىمعا جاڭا سەرپىن بەرەتىنىنە سەنىم ءبىلدىردى.
كەزدەسۋ بارىسىندا گەنەرال-پولكوۆنيك رۋسلان جاقسىلىقوۆ پەن گەنەرال-لەيتەنانت ۆيكتور حرەنين جاۋىنگەرلىك دايىندىق, بىرلەسكەن وقۋ-جاتتىعۋلار, اسكەري-سپورتتىق جارىستار وتكىزۋ ماسەلەلەرىن تالقىلادى.
«قازاقستان بەلارۋس رەسپۋبليكاسىمەن قارىم-قاتىناستى دامىتۋعا ەرەكشە ءمان بەرەدى. تمد, ۇقشۇ جانە باسقا دا حالىقارالىق ۇيىمدار شەڭبەرىندە قازاقستان مەن بەلارۋس قورعانىس جانە قاۋىپسىزدىك ماسەلەلەرىندە ءوزارا بەلسەندى ءىس-ارەكەت جاسايدى. قورعانىس سالاسىنداعى ىنتىماقتاستىقتىڭ بۇل ءتۇرى قازاقستان مەن بەلارۋس اراسىنداعى سەنىم مەن دوستىق قاتىناستاردى نىعايتۋعا, وعان قوسا وڭىردەگى قاۋىپسىزدىك پەن تۇراقتىلىقتى قامتاماسىز ەتۋگە ىقپال ەتەدى», دەدى گەنەرال-پولكوۆنيك ر. جاقسىلىقوۆ.
تاراپتاردىڭ ايتۋىنشا, ىنتىماقتاستىقتىڭ نەگىزگى باعىتتارىنىڭ ءبىرى – اسكەري ءبىلىم بەرۋ. بەلارۋس اسكەري جوعارى وقۋ ورىندارىندا قازاقستان وفيتسەرلەرى مەن كۋرسانتتارى ءبىلىم الىپ ءجۇر. جۋىردا بەلارۋس رەسپۋبليكاسىنىڭ اسكەري اكادەمياسىندا قازاقستان رەسپۋبليكاسىنىڭ اسكەري ونەر اۋديتورياسى اشىلماق.
قورعانىس ءمينيسترى گەنەرال-پولكوۆنيك رۋسلان جاقسىلىقوۆ ارىپتەسىنە بەلارۋس سۋۆوروۆشىلارى العاش رەت قاتىساتىن «ايبىن» X حالىقارالىق اسكەري-پاتريوتتىق جاستار جيىنىن وتكىزۋ باستاماسىن قولداعانى ءۇشىن العىسىن ءبىلدىردى.
قورعانىس مينيسترلەرى ەكىجاقتى ىنتىماقتاستىق جوسپارىن ىسكە اسىرۋدىڭ جوعارى قارقىنىن اتاپ ءوتىپ, قازاقستان مەن بەلارۋس قارۋلى كۇشتەرىنىڭ اسكەري اۋەايلاقتارىندا اسكەري اۋە كەمەلەرىن قابىلداۋدى, اۋەايلاقتىق-تەحنيكالىق قامتاماسىز ەتۋدى جانە كۇزەتۋدى ۇيىمداستىرۋ تۋرالى كەلىسىمگە قول قويدى. ساپار اياسىندا ۆيكتور حرەنين قازاقستان رەسپۋبليكاسىنىڭ ۇلتتىق قورعانىس ۋنيۆەرسيتەتىندە بولدى. وندا جوعارى وقۋ ورنىنىڭ وقۋ-ماتەريالدىق بازاسىمەن تانىسىپ, بەلارۋس اسكەري ونەر اۋديتورياسىن ارالادى.
