فوتو: سقو پد ءباسپاسوز قىزمەتى
ۇلتتىق جوبا اۋىل تۇرعىندارىنا مەديتسينالىق كومەك كورسەتۋ دەڭگەيىن ارتتىرۋ ماقساتىندا مەملەكەت باسشىسىنىڭ 2022 جىلعى 1 قىركۇيەكتەگى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىندا ايتىلعان تاپسىرمالارىن ورىنداۋ اياسىندا ىسكە اسىرىلىپ جاتىر.
ونىڭ شەڭبەرىندە 655 مەديتسينالىق-سانيتاريالىق العاشقى كومەك (مساك) نىساندارىن سالۋ جانە ورتالىق اۋداندىق اۋرۋحانالاردى جاڭعىرتۋ كوزدەلگەن.
جوبالار جوبالاۋ-سمەتالىق قۇجاتتامانىڭ (جسق) ازىرلىگىنە قاراي وڭىرلەردىڭ اكىمدىكتەرىنەن بەرىلگەن وتىنىمدەرگە سايكەس قارجىلاندىرىلادى. وسىعان بايلانىستى ۇكىمەت رەزەرۆىنەن 39 ملرد 987 ملن تەڭگەدەن استام قاراجات اۋىلدىق ەلدى مەكەندەردە جسق دايىن 297 العاشقى مەديتسينالىق كومەك نىسانىن سالۋعا باعىتتالادى. ولاردىڭ ىشىندە مەديتسينالىق پۋنكتتەر, فەلدشەرلىك-اكۋشەرلىك پۋنكتتەر جانە دارىگەرلىك امبۋلاتوريالار بار.
سونىمەن قاتار بولىنگەن قاراجاتتىڭ ءبىر بولىگى:
-
ارقالىق وڭىرلىك اۋرۋحاناسى پەرزەنتحاناسىنىڭ عيماراتىنداعى كۇردەلى جوندەۋ جۇمىستارىن اياقتاۋعا;
-
ستەپنوگورسك كوپسالالى قالالىق اۋرۋحاناسىنىڭ ەكى بلوگىن كۇردەلى جوندەۋگە;
-
اتباسار كوپسالالى اۋدانارالىق اۋرۋحاناسىنىڭ باس عيماراتىن كۇردەلى جوندەۋگە;
-
بالقاش قالاسىنىڭ ورتالىق اۋرۋحاناسىن كۇردەلى جوندەۋ جۇمىستارىن باستاۋعا;
-
بالقاش قالاسىنىڭ كوپسالالى اۋرۋحاناسىنىڭ انگيوگرافيالىق وتا جاسايتىن باس كورپۋسىنا قوسىمشا عيمارات سالۋعا جانە انگيوگرافيالىق قوندىرعىنى ورنالاستىرۋعا;
-
شيەلى كوپسالالى ورتالىق اۋداندىق اۋرۋحاناسىنىڭ عيماراتىنا قوسىمشا بلوكتى جاپسارلاس سالا وتىرىپ, كۇردەلى جوندەۋگە جانە سول جەردە 30 توسەك-ورىنعا ارنالعان جۇقپالى اۋرۋلار بولىمشەسىنىڭ قۇرىلىسىنا اۋدارىلادى.
