ايتالىق, قالاداعى اباي اۋدانىندا بىرقاتار ەكولوگيالىق ءىس-شارا ۇيىمداستىرىلدى. سونىڭ ءبىرى تەمىرلان تاسجولىندا ورنالاسقان گۇلزار اينالاسى تاپ-تۇيناقتاي تازالاندى. وعان باس-اياعى جۇزدەن اسا تۇرعىن قاتىستى. ولاردىڭ ىشىندە كاسىپكەر, زيالى قاۋىم وكىلدەرى, جاستار, ەرىكتىلەر بار. «تازالىق – دەنساۋلىق كەپىلى» دەگەن ۇرانمەن وتكەن ءىس-شارادا اعاشتار بۇتالىپ, تۇپتەرى اكتەلىپ, وسكەن شوپتەر ورىلىپ, ەگىلگەن گۇلدەر سۋارىلىپ, قوقىستار سىرتقا شىعارىلدى.
ايەلدەر ىستەرى جونىندەگى گەندەرلىك كوميسسيا مۇشەسى, قوعام بەلسەندىسى ورىنشا تادجيباەۆا دا تابيعاتتى تازا ۇستاۋ, قورشاعان ورتانىڭ تازالىعىنا جاۋاپكەرشىلىكپەن قاراۋ – ءار ادامنىڭ مىندەتى, دەيدى. وسى رەتتە بارشا تۇرعىنداردان ەڭبەكتى باعالاۋدى, كولىكتە نەمەسە جاياۋ كەتىپ بارا جاتقاندا جول-جونەكەي قوقىس تاستاماۋدى سۇرايدى.
وسىلايشا, اباي اۋدانىندا وتكەن تازالىق ءىس-شاراسىنا 250-دەن اسا ادام قاتىستى. ءوز كەزەگىندە بۇل اكتسيا تەك تازالىق جۇمىستارىنا ەمەس, سونىمەن بىرگە تۇرعىنداردىڭ تابيعاتقا دەگەن جاناشىرلىق سەزىمىن وياتۋعا, سول ارقىلى قالانىڭ كەلەشەك سانيتارلىق جاعدايىن جاقسارتۋعا باعىتتالدى.
اۋقىمدى ءىس-شارا ءال-فارابي اۋدانىنا قاراستى ءا.جانگەلدين كوشەسى بويىنداعى №28, 30, 32 كوپقاباتتى تۇرعىن ءۇي اۋماقتارىندا جالعاسىن تاپتى. بۇل ءۇيدىڭ تۇرعىندارى تازالىق جۇمىستارىنا بىلەك سىبانا كىرىستى. ولار, اسىرەسە ءوز اۋلالارىنداعى اعاشتاردىڭ تۇپتەرىن اكتەپ, اينالاسىن بۇتاپ, شوپتەرىن وتاپ, ءىشى قوقىسقا تولىپ قالعان يرريگاتسيالىق ارىقتاردى تازالاپ, ويىن الاڭقايلارى مەن ورىندىقتاردى سىرلادى. حالىقپەن بىرگە اينالانى تازالاۋعا اۋدان ارداگەرلەرى دە شىقتى. ولارعا بەلسەندى جاستار قولعابىس كورسەتتى. كوممۋنالدىق قىزمەتكەرلەر يگى ىستەن شەت قالمادى.
ءىس-شاراعا قاتىسقان اۋداندىق ارداگەرلەر كەڭەسىنىڭ توراعاسى يسامۋدين ناشتاي ۇلى پرەزيدەنتىمىزدىڭ «تازا قازاقستان» اكتسياسىنىڭ ناۋقاندىق ءىس-شارا ەمەستىگىن, بۇعان ءاربىر قالا تۇرعىنى بەيجاي قاراماي تازالىق مادەنيەتىنىڭ وزىمىزدەن باستاۋ الۋ قاجەتتىگىن ەسكەرتتى. سونداي-اق تۇرعىنداردى ءوز اۋلالارىن تازا ۇستاۋعا شاقىرىپ, جاستاردىڭ تازالىق ادەبىن ساقتاۋعا باسا نازار اۋدارۋ كەرەكتىگىن ەسكە سالدى.
بۇل كۇنى قاراتاۋ اۋدانىنا قاراستى ء«نۇرسات» شاعىن اۋدانىنداعى «استانا» گۇلزارىندا 400-گە جۋىق تۇرعىننىڭ اتسالىسۋىمەن كەزەكتى تازالىق جۇمىستارى ءوتتى. تازالاۋ جۇمىستارى مۇندا دا ءوز جالعاسىن تاپتى. ادامدارمەن بىرگە ون شاقتى تەحنيكا جۇمىلدىرىلدى. ناتيجەسىندە, جالپى كولەمى 50 توننا قوقىس شىعارىلدى, 3 مىڭ مەترگە جۋىق قورشاۋلار بويالىپ, 500 كگ سىرلاۋ ماتەريالى پايدالانىلدى.
ايتا كەتۋ كەرەك, كوگالداندىرۋ بويىنشا سانيتارلىق جۇمىستار قاراتاۋ اۋدانىنىڭ بارلىق ەلدى مەكەنىندە كوكتەمنىڭ ءبىرىنشى كۇنىنەن باستاپ جۇرگىزىلىپ كەلەدى. ال بادام وزەنى جاعالاۋىنداعى تازالىق جۇمىستارىنا تۇران اۋدانىنىڭ تۇرعىندارى مەن كوممۋنالدىق سالا قىزمەتكەرلەرى, سونداي-اق ەكو-بەلسەندى جاستار كوبىرەك اتسالىستى. ويتكەنى شاھاردىڭ سولتۇستىك-باتىس اۋماعىن بويلاي اعاتىن بادام وزەنى شىمكەنتتىكتەردىڭ ءبىر ءسات تىنىعاتىن جەرى ءارى وزەن ماڭىن جاعالاي قونىستانعان ەلدى مەكەندەر ەگىندىك پەن باۋ-باقشالارىنا سۋدى وسى وزەننەن الادى. اكتسيا بارىسىندا ادامدار وزەن جاعالاۋىنا جينالىپ قالعان قوقىستاردى تازالادى. سۋدىڭ ارناسىمەن اعۋىنا كەدەرگى كەلتىرىپ تۇرعان تۇرمىستىق قالدىقتاردى الىپ تاستاپ, سۋ كوزدەرىن ارشىدى. وسى تازالىق ءىس-شاراسى بارىسىندا قالاداعى «قاسىرەت» مەموريالى اينالاسى مەن ورتالىق ساياباقتىڭ ىشىندەگى ەسكەرتكىش ماڭايى ارام شوپتەر مەن قوقىستان تازالانىپ, اباتتاندىرىلدى.
شىمكەنت
