كوللاجدى جاساعان – الماس ماناپ, «EQ»
قنردا-نىڭ حابارلاۋىنشا, باستاما نەسيە مولشەرلەمەسىن تومەندەتۋگە, سونداي-اق شەتەلدىك بانكتەردىڭ جۇمىس ىستەپ تۇرعان ەنشىلەس ۇيىمدارىنىڭ بەلسەندىلىگىن ارتتىرۋعا مۇمكىندىك بەرە الادى. ال قارجىگەرلەر قاۋىمداستىعى بۇل ىستەگى «جاڭا ويىنشىلاردىڭ» پايدا بولۋى باسەكەلەستىكتى ارتتىرىپ قانا قويماي, وتاندىق بيزنەستى ءتيىمدى قارجىلاندىرۋعا جول اشادى دەپ ەسەپتەيدى.
جالپى, كاسىپكەرلەر عانا ەمەس, تۇتىنۋشىلار دا وزدەرىنە ءتيىمدى بانكتىك ۇسىنىستاردى تاڭداۋ مۇمكىندىگىنە يە بولاتىن كورىنەدى. سونىمەن قاتار ەكىنشى دەڭگەيلى بانكتەر جاڭا, اناعۇرلىم ىڭعايلى قارجىلىق شەشىمدەردى, ونىمدەر مەن قىزمەتتەردى دامىتۋعا ينۆەستيتسيا سالۋعا ىنتالاندىرادى. ءيا, ايتىلىپ جاتقان بولجام مەن پايىم كوپ. ال شىندىعىنا كەلگەندە, ءبىزدىڭ نارىق شەتەلدىك ءىرى ينۆەستورلاردىڭ قىزىعۋشىلىعىن وياتۋعا قاۋقارلى ما؟
قارجىگەرلەر قاۋىمداستىعىنىڭ توراعاسى ەلەنا باحمۋتوۆانىڭ ايتۋىنشا, ىشكى جالپى ءونىمنىڭ نەگىزىن ءوندىرۋشى سەكتور قۇرايتىنىن ۇمىتپاعان ءجون.
«بۇل سەكتور قازاقستان بانكتەرىنەن ەشقاشان ءىرى كولەمدى نەسيە الماعان. ينۆەستورلىق جوبالار راسىندا, شەتەلدىك بايلانىستاردىڭ ورناۋىمەن نەمەسە شەتەلدىك بانكتەردەگى نەسيەمەن قارجىلاندىرىلادى. ونىڭ سەبەبى – ەكىنشى دەڭگەيلى بانكتەردىڭ كاپيتالداندىرۋىمەن قامتاماسىز ەتىلە الماعان ەلەۋلى سومالاردا. سوندىقتان شەتەلدىك «جاڭا ويىنشىلاردىڭ» ەلىمىزگە دەگەن كوزقاراسى وزگەرىپ, قىزىعۋشىلىعى ارتۋى ابدەن مۇمكىن. جالعىز ۋايىم – ستاندارتتى قاداعالاۋدىڭ ساقتالۋى», دەيدى.
قاۋىمداستىقتىڭ مالىمدەۋىنشە, قازىر ماجىلىستە ەنشىلەس جانە رەزيدەنت ەمەس بانكتەردىڭ فيليالدارىن اشۋ ماسەلەسى قاراستىرىلىپ جاتىر. زاڭ جوباسىن ازىرلەۋشىلەر ەل ازاماتتارىنىڭ شەتەلدىك قارجى ينستيتۋتتارىندا قولجەتىمدى وپەراتسيالاردى جۇزەگە اسىرۋىنا مۇمكىندىك بەرۋدى ۇسىنادى: مىسالى, تولەم كارتالارىن شىعارۋ, سونداي-اق ارنايى باعدارلامالىق قامتاماسىز ەتۋلەردى دايىنداۋ.
جالپى, وتاندىق بانك سەكتورىندا شەتەلدىك بانكتەر بارشىلىق. بىراق سوڭعى ەكى جىلدا ەلىمىزدە بىردە-ءبىر جاڭا فيليال اشىلماعان.
«رەزيدەنت ەمەس بانك فيليالدارىنىڭ جۇمىسىنا ارنالعان زاڭنامالىق نەگىز بەن ولاردىڭ اتقارا الاتىن ءتۇرلى وپەراتسيالارىنىڭ كەڭ ءتىزىمى 2021 جىلدان باستاپ بار. تالاپتاردى ىرىقتاندىرۋ, سونداي-اق رۇقسات ەتىلگەن قىزمەت تۇرلەرىن كەڭەيتۋ, ونىڭ ىشىندە جەكە تۇلعالاردىڭ دەپوزيتتەرىن قابىلداۋ مەن تولەم قىزمەتتەرىن كورسەتۋ شەتەلدىك بانكتەردى وتاندىق نارىققا ىنتالاندىرىپ, تارتۋى مۇمكىن دەپ سانايمىز», دەدى ە.باحمۋتوۆا.
قاۋىمداستىق توراعاسى ەل نارىعى ءۇشىن شەتەلدىك بانكتەردىڭ سانى ەمەس, ساپاسى ماڭىزدى ەكەنىن ايتتى. دەمەك باسىمدىق بانكتەردىڭ ەلىمىزگە اكەلەر جاڭا مۇمكىندىكتەرىنە قويىلادى.
قارجىلىق تالداۋشى ارمان بەيسەمباەۆتىڭ پىكىرىنشە, كەلەتىن شەتەلدىك بانكتەر كورپوراتيۆتىك نەسيە سەگمەنتىنە نازار اۋدارۋى مۇمكىن, ويتكەنى ونىڭ كولەمى سوڭعى ەكى جىلدا تۇتىنۋ نەسيەلەرىنەن الدەقايدا ازايىپ كەتتى. وتاندىق قارجى ينستيتۋتتارى كاسىپكەرلىك سەكتوردى ءتيىستى دەڭگەيدە قارجىلاندىرىپ جاتقان جوق.
قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا شەتەلدىك بانكتەردىڭ كەلۋى باسەكەنى كۇشەيتەدى دەپ ەسەپتەيدى. قارجى ساراپشىسى راسۋل رىسمامبەتوۆ وتاندىق بانكتەردىڭ شەتەلدىكتەرمەن باسەكەگە تۇسۋگە دايىندىعىنا قاتىستى پىكىرىندە «ەلىمىزگە شەتەلدىك بانكتەردىڭ كەلۋىنەن تۇتىنۋشى پايدا تابۋى كەرەك» دەپ پايىمداعان.
اسەم جاناتوۆا,
ەۇۋ جۋرناليستيكا جانە ساياساتتانۋ فاكۋلتەتىنىڭ 2-كۋرس ستۋدەنتى
