فوتو:aikyn.kz
سۋ تاسقىنىنان زارداپ شەككەن ايماق تۇرعىندارىنىڭ دۇنيە-مۇلكىنە كەلتىرىلگەن زالالدى وتەۋ پروتسەسى ءالى دە جالعاسىپ جاتىر. بۇگىنگە دەيىن 30 538 وتباسى 100 اەك مولشەرىندە بىرجولعى تولەم الدى.
سۋ تاسقىنى سالدارىنان رەسپۋبليكا بويىنشا شامامەن 12 155 تۇرعىن ۇيگە, سونداي-اق 18 321 ساياجاي قۇرىلىسىنا زاقىم كەلدى, ونىڭ 5 353-ءى ازاماتتاردىڭ جالعىز باسپاناسى.
جاۋاپتى كوميسسيا 15 093 تۇرعىن ءۇي مەن ساياجاي قۇرىلىستارىنا ساراپتاما جاسادى. بۇل كورسەتكىش جالپى ساننىڭ – 84%. قورىتىندىعا سايكەس, 9 مىڭنان استام ۇي قالپىنا كەلتىرىلەدى, ال 4 315 ءۇي اپاتتى دەپ تانىلدى.
وڭىرلەردە 1 847 ءۇي مەن پاتەردىڭ قۇرىلىسى باستالدى, تاعى 3 417-سىن قايتالاما نارىقتان ساتىپ الۋ جوسپارلانىپ وتىر.
ۇكىمەت باسشىسى ولجاس بەكتەنوۆ اكىمدىكتەر مەن ونەركاسىپ مينيسترلىگىنە تاسقىن كەلتىرگەن ماتەريالدىق شىعىن ەسەبىن اياقتاۋعا 1 اپتا ۋاقىت بەردى.
«ازاماتتارىمىزدىڭ قيىن جاعدايىنا تۇسىنىستىكپەن جانە جان-جاقتى مۇقيات قاراڭىزدار. جۇمىستاردى كەشىكتىرمەي, بارىنشا تەزدەتۋ كەرەك», دەدى ولجاس بەكتەنوۆ.
