م.ءازىلحانوۆ سونداي-اق جالپىۇلتتىق بىرلىك پەن قوعامدىق كەلىسىمدى ساقتاۋ جولىنداعى تابىستى ەڭبەكتەرى ءۇشىن شىمكەنتتىك اسسامبلەيا مۇشەلەرىنە العىس ايتىپ, ەتنوساياسات اياسىندا بىرلەسە اتقارار جوبا-جوسپارلار جايىندا باياندادى. ەلدەگى تاتۋلىقتى كوزدىڭ قاراشىعىنداي قورعاۋ ءارى نىعايتۋ – مەملەكەتتىك ساياساتتىڭ ماڭىزدى بولىگى ەكەنىن اتاپ ءوتتى.
«پرەزيدەنت قاسىم-جومارت توقاەۆ اۋقىمدى جۇمىستىڭ نەگىزگى باعىت-باعدارىن ايقىنداپ بەردى. ۇلتتىق قۇرىلتايدىڭ ءۇشىنشى وتىرىسىندا ايتىلعان قۇندىلىقتاردى ىسكە اسىرۋدا اسسامبلەيانىڭ زور الەۋەتىن ءتيىمدى پايدالانۋدى جۇكتەدى. الەمدىك احۋال كۇردەلەنىپ تۇرعاندا «جۇرت بولىپ جۇمىلىپ, ۇلت بولىپ ۇيىسۋ» كەرەكتىگىن نىقتاپ شەگەلەدى», دەدى ول.
سەسسيادا شاھار باسشىسى, قالالىق قحا توراعاسى عابيت سىزدىقبەكوۆ يدەولوگيا حاقىندا مەملەكەت باسشىسىنىڭ بەرگەن تاپسىرمالارىن مەگاپوليستە ىسكە اسىرۋ جايىن پىسىقتاپ, تالقىلاپ, الداعى جۇمىستاردى جۇيەلەيتىنىن جەتكىزدى. پرەزيدەنت جۇكتەگەن مىندەتتەردىڭ ىشىندە قالا اكىمى اسسامبلەيا جۇمىسىن ەلىمىزدىڭ جاڭا گۋمانيتارلىق يدەولوگيالىق دوكتريناسىمەن ۇيلەستىرۋ, ينستيتۋتسيونالدىق الەۋەتىن نىعايتۋ سەكىلدى ماسەلەلەرگە ەرەكشە توقتالدى. مەگاپوليس باسشىسى اتالعان مىندەتتەر اياسىندا تۋىندايتىن كەشەندى جۇمىستاردى اتقارۋعا تەك اسسامبلەيا ەمەس, قالالىق دەڭگەيدەگى باسقارمالار, اۋدان اكىمدەرى, وقۋ ورىندارى, جاستار ۇيىمدارى مەن ازاماتتىق قوعام ينستيتۋتتارىنىڭ الەۋەتى تولىق قولدانىلاتىنىن ايتتى. قوعامدا اسسامبلەياعا قاتىستى ءتۇرلى پىكىر ايتىلىپ جۇرگەنىن جوققا شىعارماعان قالا باسشىسى: «حالقىمىزدىڭ بىرلىگىن نىعايتۋعا قىزمەت ەتەتىن بىرەگەي ينستيتۋت رەتىندە ەلىمىزدە مەكەن ەتەتىن بارشا ەتنوستى ءبىر ارناعا ۇيىستىرىپ وتىرعان وسى اسسامبلەيا. سوندىقتان ۇيىم اياسىندا جۇرگىزىلگەن مەملەكەتتىك ەتنوساياساتتىڭ ناتيجەسىندە قوعامدا تۇراقتىلىق پەن ەتنوسارالىق تاتۋلىق بەرىك ورنادى», دەدى. اكىم ءوز بايانداماسىندا بيىل كوكتەمگى تاسقىن سەلدەن زارداپ شەككەن سولتۇستىك, باتىس ايماقتارداعى تۇرعىندارعا قولۇشىن سوزۋ ءۇشىن اسسامبلەيا 1500 توننادان استام ازىق-ت ۇلىك پەن ەڭ قاجەتتى زاتتار جونەلتكەنىن, ونىڭ ىشىندە شىمكەنتتىك ەتنومادەني بىرلەستىكتەردىڭ ۇلەسى 120 توننا گۋمانيتارلىق كومەكتى قۇراعانىن اتاپ ءوتتى. «سۋ تاسقىنى كەزىندە ەل بىرلىگى ءىس جۇزىندە كورىندى. قينالعان جۇرتشىلىققا حالقىمىز جۇمىلا كومەك بەردى. بۇل جاعداي بىرلىگىمىزدى بەكەمدەپ, ىشكى تاتۋلىقتىڭ ءوز تۇعىرىندا ەكەنىن دالەلدەدى», دەدى ول.
جيىندا سونداي-اق قالالىق اسسامبلەيا توراعاسىنىڭ جاڭا ورىنباسارلارى تاعايىندالدى. ۇيىمنىڭ جانىنداعى كەڭەستىڭ ۇسىنىسىمەن تاحيربەك نيشانباەۆ پەن تيمۋر كازمين وسى قىزمەتكە تاڭداپ الىندى. جيىندا سونىمەن بىرگە ج.تاشەنەۆ اتىنداعى ۋنيۆەرسيتەتتىڭ پرورەكتورى عالىمجان بيتۇرسىن, قازاقستان وزبەكتەرى ەتنومادەني بىرلەستىكتەرى «دۋستليك» قاۋىمداستىعىنىڭ توراعاسى يكرامجان حاشيمجانوۆ, شىمكەنت قالاسىنىڭ ACCESS بىتىرۋشىلەرى «ASAA» جاستار قوعامدىق بىرلەستىگىنىڭ جەتەكشىسى, بەلسەندى ۆولونتەر دانارا سارانوۆا, شىمكەنت قالالىق ءماسليحاتىنىڭ دەپۋتاتى اسحات نۇرلىباەۆ, «اسسامبلەيا جاستارى» ۇيىمى قالالىق وكىلدىگىنىڭ بەلسەندىسى تيمۋر ينكيجينو ءسوز سويلەپ, ۇسىنىس-پىكىرلەرىن ورتاعا سالدى.
ماسەلەن ع.بيتۇرسىن ەتنوس جاستارى اراسىندا پاراساتتى, ادال ازاماتتاردى تاربيەلەۋگە باسا ءمان بەرۋ كەرەكتىگىنە توقتالدى. سونداي-اق ول پرەزيدەنت ۇلتتىق قۇرىلتايدا اتاپ وتكەن جاستاردى بۇزاتىن بەس كەسەلمەن كۇرەسۋ ءۇشىن بەس نەگىزگى مىندەتتى ورىنداۋ كەرەكتىگىن العا تارتتى. ولار اتاپ ايتقاندا جاستاردىڭ قۇقىقتىق, قارجىلىق, ءدىني ساۋاتىن ارتتىرۋ, جاستاردى عىلىم مەن ونەرگە, سپورتقا باۋلىپ ءوسىرۋ. ەتنوستار اراسىندا كونستيتۋتسيالىق تەڭدىك قاعيداتىن دارىپتەۋ. ءوسىپ كەلە جاتقان جاستى قوسىمشا ءتىل بىلۋگە, سالت-ءداستۇردى جەتىك مەڭگەرۋگە تاربيەلەۋ. سوڭعىسى جاستاردى قۇرايتىن ەتنوس وكىلدەرى اراسىندا شىنايى تاتۋلىق پەن دوستىقتى قالىپتاستىرۋ. سپيكەردىڭ ايتۋىنشا, بۇلار عالامدىق جاھاندانۋ ۇدەرىسىنە وسكەلەڭ ۇرپاقتىڭ جۇتىلىپ كەتپەۋى ءۇشىن كەرەك.
ي.حاشيمجانوۆ وزبەك ەتنومادەني بىرلەستىگىنىڭ اتقارعان جۇمىسىنا توقتالدى. «ەجەلدەن تۋىستاس قازاق پەن وزبەك جۇرتى تۇراندى مەكەن ەتىپ, قيىنشىلىقتى دا, قۋانىشتى دا بىرگە كوردى. باۋىرلاس حالىقتار ىرگەلەس جاتقان كورشى عانا ەمەس, ەتجاقىن اعايىن حالىق. ءبىزدىڭ تاريحي تاعدىرىمىز دا, ارمان-مۇراتىمىز دا ورتاق. تۋىستىعىمىز ءتىل جاقىندىعىنان تامىر تارتىپ, داستۇرىمىزبەن جالعاسىپ, سالت-سانامىزبەن قابىسىپ كەلەدى», دەگەن ول ەكى ەل اراسىنداعى ستراتەگيالىق ارىپتەستىك وسىدان 31 جىل بۇرىن ورداباسىداعى ەلدىك جيىندا قابىلدانعان «ماڭگىلىك دوستىق تۋرالى» كەلىسىممەن نىقتالعانىن ايتتى.
ي.حاشيمجانوۆتىڭ ايتۋىنشا, داستارقان كيەلى ۇعىم, بەرەكەنىڭ باستاۋى. وسى مادەنيەتتىڭ وزەگى بولعان قۇندىلىقتى دارىپتەۋ باعىتىندا «دۋستليك» قاۋىمداستىعى 13 جىلدان بەرى «دوستىق داستارقانى» جوباسىن ىسكە اسىرىپ كەلەدى. 2022 جىلدان باستاپ «شىمكەنت پالاۋى» دەگەن اتقا اۋىسقان جوبانىڭ ماقساتى – اس ءىشىپ, ىدىس بوساتۋ ەمەس, ەلدەگى بىرلىك پەن دوستىقتىڭ كورىنىسىن گاستروفەستيۆال ارقىلى ناسيحاتتاۋ.
سەسسيا سوڭىندا قحا توراعاسىنىڭ ورىنباسارى بىرقاتار بەلسەندى ازاماتتى اسسامبلەيا ناگرادالارىمەن ماراپاتتادى. ايتا كەتەيىك, بۇگىندە قالالىق قحا جانىندا 17 ەتنومادەني بىرلەستىك پەن 7 قۇرىلىم قوعامدىق قازاقستاندىق ءپاتريوتيزمدى دارىپتەۋ باعىتىنداعى جوبالارعا جۇمىلدىرىلعان.
شىمكەنت
