ءوندىرىسىنىڭ ءورىسىن كەڭەيتىپ وتىرعان ءتۇرلى سەرىكتەستىك باسشىلارى جەرگىلىكتى جۇرتتى جۇمىسپەن قامتىپ قانا قويماي, اۋدان ەكونوميكاسىن ارتتىرۋعا ايتارلىقتاي ۇلەس قوسىپ جاتىر. ولار جەرگىلىكتى حالىقپەن ءتىل تابىسىپ, ءىسىن دوڭگەلەتىپ وتىر. جۇمىسىن شيرەك عاسىر بۇرىن باستاعان, ۇزاق جىلدار بويى توقتاۋسىز جۇمىس ىستەپ تۇرعان «اقتاس» جشس اكتاس جانە شاعال ءوندىرىسىن جىل وتكەن سايىن ارتتىرىپ كەلەدى.
تيمۋر بايگەلديەۆ باسقاراتىن سەرىكتەستىك قىزمەتكەرلەرى تىنىمسىز ەڭبەك ەتىپ, ناپاقاسىن ايىرىپ جۇرگەنىنە دە ءبىراز جىلدىڭ ءجۇزى بولدى. ءتۇرلى كەزەڭدى باستان وتكەرسە دە, سەرىكتەستىك باسشىلارى جۇمىستى ىلكى ساتكە دە توقتاتقان ەمەس. مۇنىڭ ءوزى تاباندىلىق پەن جانكەشتىلىكتىڭ ۇلگىسىندەي كورىنەدى.
«سەرىكتەستىك جۇمىسىن جانداندىرۋ ماقساتىندا قولدان كەلگەنشە جۇمىس اتقارىپ جاتىرمىز. البەتتە, ءار جۇمىستىڭ وزىنە ءتان قيىندىعى بولاتىنى انىق. اكتاس پەن شاعال ءوندىرۋ دە تۇسىنە بىلگەنگە وڭاي شارۋا ەمەس. مۇنى جۇمىسشىلار دا جاقسى بىلەدى. ءبىز ءوز تاراپىمىزدان ولارعا قولدان كەلگەنشە قولداۋ كورسەتىپ ءجۇرمىز. قازىرگى كەزدە ءبىزدىڭ ۇجىمدا 120 ادام ەڭبەك ەتىپ جاتىر. ولاردىڭ ورتاشا جالاقىسى 180 مىڭ تەڭگەنى قۇرايدى», دەيدى جشس باس ديرەكتورىنىڭ ورىنباسارى كونستانتين افونين سەرىكتەستىك قىزمەتكەرلەرىنىڭ الەۋمەتتىك تۇرعىدان قامتىلۋى تۋرالى وي ءبولىسىپ.
دەرەككە سەنسەك, «اقتاس» جشس جىلىنا 1 ميلليون توننا اكتاس جانە 200 مىڭ توننا شاعال وندىرۋگە قاۋقارلى ەكەن. ارينە, ول ءۇشىن سەرىكتەستىك تولىق قۋاتىندا جۇمىس ىستەۋى كەرەك. سۇرانىس بولسا, بۇل مەجەنى باعىندىرۋ قيىن ەمەس.
جىل باستالعالى كوپ ۋاقىت وتكەن جوق. ايتسە دە, وسى ۋاقىتقا دەيىن «اقتاس» جشس 384,1 مىڭ توننا اكتاس پەن 20,9 مىڭ تەكشە مەتر شاعال ءوندىرىپتى. بۇل كورسەتكىشتى ارتتىرۋعا ءالى دە مۇمكىندىك مول دەپ بىلەمىز.
قورداي اۋدانىنا قاراستى قاراسۋ اۋىلدىق وكرۋگىندە توقتاۋسىز جۇمىس ىستەپ جاتقان سەرىكتەستىك ءونىمىن نەگىزىنەن قىرعىز رەسپۋبليكاسىنداعى «كانت تسەمەنت زاۋىتى» اق تۇراقتى تۇردە تۇتىنادى. شيكىزاتقا قىزىعۋشىلىق تانىتاتىن باسقا دا تۇتىنۋشىلار جوق ەمەس.
جامبىل وبلىسى,
قورداي اۋدانى
