قالالىق دەمەسەڭىز, جوعارى دەڭگەيدە ۇيىمداستىرىلعان جاس كۇيشىلەر بايقاۋى رەسپۋبليكا كولەمىن قامتىدى دەسە, ارتىق ەمەس. بايقاۋعا قاتىسۋشى دومبىراشىلاردىڭ دەنى ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتى مەن كوللەدجدەر ستۋدەنتتەرى جانە ونەر مەكتەپتەرىنىڭ وقۋشىلارى. سايىس ارقا كۇيشىلىك ونەرىنەن بولعاندىقتان, شەرتپە كۇيدىڭ تۇما باسىندا تاتتىمبەت تۇرعان سوڭ, قاراعاندىداعى كۇيشى اتىنداعى ونەر كوللەدجىنەن ونەرپازدار كەلىپ قاتىستى. باس-اياعى جيىرما ءۇش جاس دومبىراشى بايقاۋ شارتى بويىنشا ءبىرىنشى كەزەكتە ەكى كۇيدەن ورىنداپ شىقتى. مۇندا تاتتىمبەت, توقا, يتاياق, قىزداربەك, ابديلەردىڭ شىعارماشىلىعىمەن قوسا, سيرەك ورىندالاتىن سارمانتايدىڭ احمەتجانىنىڭ «58» اتتى قاسىرەت كۇيى, ساكەننىڭ اكەسى سەيفوللانىڭ «قوسباسارى», اققىزدىڭ تۋىندىلارى تارتىلدى. استانا قالاسى اكىمدىگىنىڭ «بىرلەسكەن مۇراجايلار ديرەكتسياسى», ساكەن سەيفۋللين مۋزەيى ۇيىمداستىراردا ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ كۇيشىلەرىمەن كەڭەسىپ پىشكەنى بايقالادى. قاتىسۋشى ونەرپازدار بىرىنەن ءبىرى وتەدى. تاتتىمبەت پەن توقا سىندى نەبىر ەرەن كۇيشىلەردىڭ سيرەك ورىندالاتىن شىعارمالارىن ورىنداپ وتىردى. تالاپتى جاستاردىڭ ونەرىن باعالاۋشى قازىلار القاسىنىڭ توراعاسى – مادەنيەت قايراتكەرى, «حالىق كۇيشىسى» مەدالىنىڭ يەگەرى, كۇيشى-كومپوزيتور احات بايبوسىنوۆ, قۇرامىندا – قازاقستاننىڭ ەڭبەك سىڭىرگەن قايراتكەرى, پروفەسسور جانعالي ءجۇزباي, قازاقستاننىڭ ەڭبەك سىڭىرگەن قايراتكەرى, قازاق ۇلتتىق ونەر ۋنيۆەرسيتەتىنىڭ دومبىرا كافەدراسىنىڭ مەڭگەرۋشىسى ابىلعازى احماديەۆ, مادەنيەت سالاسىنىڭ ۇزدىگى, رەسپۋبليكالىق تاتتىمبەت كونكۋرسىنىڭ باس جۇلدەگەرى قايرات ايتباەۆ, مادەنيەت سالاسىنىڭ ۇزدىگى, قازاق ۇلتتىق ونەر ۋنيۆەرسيتەتىنىڭ وقىتۋشىسى ەربولات ساپۋانوۆ, تاتتىمبەت ونەر كوللەدجىنىڭ ۇستازى, رەسپۋبليكالىق شەرتپە كۇي كونكۋرسىنىڭ باس جۇلدەگەرى ماديار سۇلەيمەنوۆ بار.
«ساكەننىڭ مەرەيتويىمەن قاتار بايقاۋ 31 مامىر – ساياسي قۋعىن سۇرگىن جانە اشارشىلىق قۇرباندارىن ەسكە الۋ كۇنى قارساڭىنا دا كەلەدى. سەبەبى كۇيشىلەردىڭ كوبى 1928-1930 جىلداردىڭ باسىندا اتىلىپ كەتتى. ونىڭ ۇستىنە ساكەن كۇيدى وتە قاتتى جاقسى كورىپ, قاستەرلەگەن. كەيىنگى ۇرپاققا اماناتتاعان. قازاقتىڭ نايزاسى قانداي وتكىر بولسا, دومبىراسى ودان كەم تۇسپەگەن. حالىق كۇي تىڭداپ رۋحتانعان. ايتپەسە, «ابىلاي حان اتتى اسكەرىنىڭ مارشىن» قالدىرىپ, اماناتتاماس ەدى», دەپ قۇتتىقتاۋ ءسوزىن تاريح عىلىمدارىنىڭ دوكتورى, ساكەن مۋزەيىنىڭ ديرەكتورى مارات ابسەمەتوۆ سويلەدى.
نە كەرەك, جاس دومبىراشىلاردىڭ كوبى قازاقتىڭ كۇي ونەرىن شەبەر مەڭگەرگەنگە ۇقسادى. جەتكىنشەك جاستار مايىستىرىپ دومبىرا شەرتكەندە جانىڭ كىرەدى. سونىمەن قاتار مۇراجايدىڭ شاعىن زالىندا دومبىرا ءۇنى داۋىس زورايتقىشسىز-اق كۇمبىرلەپ تاماشا ەستىلەدى. وتكەندە ءبىر ونەرتانۋشىلار كۇي كونتسەرتىن ۇلكەن زالداردان گورى كيىز ءۇي سىندى كىشىرەك ورىنداردا وتكەرسە, شىرايى سوندا كىرەدى دەگەن ءسوزدىڭ دالەلىن وسى بايقاۋ كورسەتكەندەي. كۇيشى قازىلار دا «مىنا جەر تاماشا ەكەن, ءاربىر قاعىس انىق ەستىلەدى», دەپ وتىرعاندارىن ەستىپ قالدىق. دەمەك دومبىرانىڭ داۋسى دا كۇي تالعايدى دەگەن ءسوز.
سونىمەن قازىلار القاسىنىڭ شەشىمىمەن بايقاۋدىڭ باس جۇلدەسىن نۇربولات تاپالوۆ ەسىمدى ونەرپاز جەڭىپ الدى. جۇلدەلى ءبىرىنشى ورىندى بەكزادا دوستياروۆا يەلەندى. ەكىنشى, ءۇشىنشى ورىن تەمىرلان كۋبات پەن سەيدالى باۋىرجانعا بۇيىردى. جەڭىمپازدارعا ديپلوم جانە اقشالاي سىيلىقتار تاپسىرىلدى.
استانا قالاسى سارىارقا اۋداندىق اكىمدىگى, ساكەن سەيفۋلليننىڭ ناعاشى قارىنداسى اسىلگۇل ءابىش, كاسىپكەر ەرۋباي يساتاەۆ ءىس-شاراعا دەمەۋشىلىك ەتكەنىن اتاپ وتكەن ءلازىم.
