شىمكەنت قالاسىندا گەنەرال-لەيتەنانت سۇلتان كامالەتدينوۆ كەڭەس وداعىنىڭ باتىرى سابىر راحىموۆ اتىنداعى «جاس ۇلان» رەسپۋبليكالىق مەكتەبىندە بولدى. باس شتاب باستىعى پەداگوگتار مەن تاربيەلەنۋشىلەردى وقۋ ورنىنىڭ الدا كەلە جاتقان 40 جىلدىعىمەن قۇتتىقتاپ, داڭقتى جاۋىنگەرلىك داستۇرلەردى لايىقتى جالعاستىرۋعا تىلەكتەستىگىن جەتكىزدى.
اسكەري بولىمدەردە قورعانىس ءمينيسترىنىڭ ءبىرىنشى ورىنباسارى اسكەري ينفراقۇرىلىم نىساندارىنىڭ جاي-كۇيىن, اسكەري بولىمدەردىڭ تەحنيكالىق جاراقتاندىرىلۋىن جانە وقۋ-جاۋىنگەرلىك پروتسەستى ۇيىمداستىرۋدى زەردەلەدى. ول سونداي-اق جوندەۋ شەبەرحانالارىن ارالاپ كوردى. باس شتاب باستىعى الداعى وقۋ-جاتتىعۋلارعا دايىن بولۋى كەرەك قارۋ-جاراق پەن اسكەري تەحنيكانىڭ جاعدايىنا ەرەكشە نازار اۋداردى.
ارىس گارنيزونىندا باس شتاب باستىعى ينجەنەرلىك وق-دارىلەردى ساقتاۋ شارتتارىن, 44859 اسكەري ءبولىمىنىڭ تەحنيكالىق اۋماعىن تازارتۋ جونىندەگى ءىس-شارالاردىڭ ورىندالۋ بارىسىن جانە ارنايى جابدىقتالعان پوليگوندا جارىلىس قاۋپى بار قالدىقتاردى جويۋ جۇمىستارىنىڭ جۇرگىزىلۋىن تەكسەردى. ول وق-ءدارى فراگمەنتتەرىن تازارتۋ جانە كادەگە جاراتۋ جۇمىستارىن جۇرگىزۋ كەزىندە قاۋىپسىزدىك شارالارىن قاتاڭ ساقتاۋ قاجەتتىگىن ەرەكشە اتاپ ءوتتى.
اسكەري بولىمدەردە بولعان كەزدە گەنەرال-لەيتەنانت سۇلتان كامالەتدينوۆ جاس ساربازداردى قابىلداۋدى ۇيىمداستىرۋ, كازارمالىق-تۇرعىن ءۇي قورىمەن جانە ساربازدار ءۇشىن جاسالعان الەۋمەتتىك-تۇرمىستىق جاعدايلارمەن تانىستى. ول مەرزىمدى قىزمەت ساربازدارىنىڭ وقۋ ساپاسىنا جانە ولاردىڭ اسكەري ەسەپتىك ماماندىق الۋىنا ەرەكشە نازار اۋداردى. كوپتەگەن اسكەرگە شاقىرىلۋشىلار كوللەدجدى بىتىرگەننەن كەيىن اسكەرگە كەلەدى. سوندىقتان باس شتاب باستىعى قىزمەت بارىسىندا ولاردىڭ بىلىمدەرىن پايدالانۋ قاجەتتىلىگىن اتاپ ءوتتى.
جەكە قۇراممەن بولعان كەزدەسۋلەردە قورعانىس ءمينيسترىنىڭ ءبىرىنشى ورىنباسارى گەنەرال-لەيتەنانت سۇلتان كامالەتدينوۆ 2024 وقۋ جىلىنىڭ جازعى كەزەڭىنە قارۋلى كۇشتەردى دايىنداۋدىڭ نەگىزگى ءىس-شارالارى مەن كوماندالىق قۇرامعا قويىلاتىن تالاپتارعا توقتالدى. ول سونداي-اق اسكەرلەردىڭ جاۋىنگەرلىك دايىندىق ساپاسىن ارتتىرۋ بويىنشا بىرقاتار ناقتى تاپسىرمالار بەردى.
