استانانىڭ تابيعاتى جاعاجاي تۋريزمىنە جايلى دەپ ايتا المايمىز. شىلدە, تامىزدا كۇن ادەتتەگىدەن قاتتى جىلىنباسا, باسقا مەزگىلدەردە اۋا رايى قوڭىرسالقىن, ال قىسى قاتال. ايتكەنمەن, قوناقتار سول ەكى ايدى ءتيىمدى پايدالانىپ, قالا مەن جاقىن اۋىل-دارعا اعىلادى. استاناعا كەلىپ, كوكشەنىڭ, بۋرابايدىڭ تابيعاتىن تاماشالاۋعا قالاتىندار بار. رەسمي مالىمەتتەرگە ۇڭىلسەك, بىلتىر استاناعا تۋريستەر الدىڭعى جىلدىڭ سايكەس كەزەڭىمەن سالىستىرعاندا 12,3%-عا (1 324 047) كوپ كەلگەن. مۇندا ىشكى تۋريستەردىڭ ۇلەسى – 1 036 921 ادام بولسا, شەتەلدىك تۋريستەردىڭ سانى – 287 126. ءبىزدىڭ بىلۋىمىزشە, بۇل – استاناعا ساپارلاپ, قوناقۇي جالداعان تۋريستەردىڭ ۇلەسى. بەيرەسمي بىرنەشە كۇنگە كەلىپ-كەتكەن قوناقتاردىڭ اعىنىن دالمە-ءدال ايتۋ قيىن بولعانىمەن, رەسمي ستاتيستيكا دا شىندىققا جاقىنىراق بولسا كەرەك.
قالاداعى 257 قوناقۇيدەگى 9 439 بولمە 17,5 مىڭ توسەك-ورىنعا شاقتالعان. وسى قاتاردا 5 جۇلدىزدى – 8 قوناقۇي, 4 جۇلدىزدى – 11 قوناقۇي, 3 جۇلدىزدى – 5 قوناقۇي, كاتەگورياسىز 205 قوناقۇي بار. ۇلتتىق ستاتيستيكا بيۋروسىنىڭ دەرەگىنە سايكەس, بىلتىر 3-توقساندا استانا قوناقۇيلەرىنىڭ ورتاشا تولىمدىلىعى 30,1%-دى قۇراعان. قالادا تۋريستىك ينفراقۇرىلىمدى دامىتۋ شەڭبەرىندە «Red Bus» ەكسكۋرسيالىق اۆتوبۋستارى قاتىنايدى. مۇنداي اۆتوبۋستار اۋديوگيدتەرمەن جابدىقتالعان. ەكسكۋرسيا تۋريستەرگە 8 تىلدە قولجەتىمدى. قالانىڭ كورىكتى جەرلەرىنە ساپارلاۋدى ويلاعان تۋريستەرگە «Astana City Pass» تۋريستىك كارتاسىن ساتىپ الۋعا بولادى. بۇل الدىمەن قوناقتاردىڭ ۋاقىتىن ۇنەمدەۋگە كومەكتەسەدى. تۋريست كارتاسى قالاداعى 11 مادەنيەت نىسانىنا 70%-عا دەيىن جەڭىلدىكپەن بارۋعا مۇمكىندىك بەرەدى. كارتا قۇنى 24 ساعاتقا 9 990 تەڭگە, 72 ساعاتقا 13 990 تەڭگە شاماسىندا شىعادى.
استانا قالاسى بويىنشا اۋديوتۋرلار izi.TRAVEL حالىقارالىق پلاتفورماسىندا قولجەتىمدى. وندا ەلورداداعى 164 كورنەكتى نىسان بويىنشا ەكسكۋرسيا جۇكتەلگەن. تۋريستەرگە ارنالعان قىزمەتتى جاقسارتۋ ماقساتىندا visitastana.kz اقپاراتتىق جۇيەسى قۇرىلعان. Aviata.kz-پەن ينتەگراتسيالانعان سەرۆيستە اۋە بيلەتتەرىن ساتىپ الۋعا بولادى. قوناقۇيدى Booking حالىقارالىق سەرۆيسى ارقىلى الدىن الا جالداۋعا مۇمكىندىك بار. قالادا وتەتىن اۋقىمدى ءىس-شارالارعا دا وسى جۇيەدەن بيلەت الۋعا مۇمكىندىك بار. Visit Astana برەندىن قوناقتارعا مەيلىنشە تىنىتۋدى ويلاعان قالا اكىمدىگى «visitastana.kz» برەندتىك كيىم وندىرىسىنە جاردەمدەسۋگە نيەتتى ەكەنىن بايقاتىپ وتىر ەكەن.
قالاعا كەلگەن تۋريستەر ءجيى باراتىن نىسانداردىڭ قاتارىندا «بايتەرەك» مونۋمەنتى, ۇلتتىق مۇراجاي, «استانا وپەرا» مەملەكەتتىك وپەرا جانە بالەت تەاترى, ورتالىق مەشىت, «حان شاتىر», ەكسپو, كونگرەسس ورتالىعى, بەيبىتشىلىك جانە كەلىسىم سارايى, «Ailand» وتباسىلىق دەمالىس ورتالىعى, «استانا بالەت» تەاترى بار. استانادا جىل سايىن ورتا ەسەپپەن العاندا 2 مىڭعا جۋىق ءىس-شارا وتەدى. قالا جىلدان-جىلعا ورتالىق ازيانىڭ ىسكەرلىك حابى رەتىندە دامىپ كەلەدى. تۋريستەر ءجيى كەلەتىن ەلدەردىڭ قاتارىندا رەسەي, قحر, تۇركيا, گەرمانيا, وزبەكستان, اقش تۇر. بىلتىر تەمىرجول اعىنى شامامەن 5,5 ملن ادامدى قۇراپ, جولاۋشىلاردىڭ 4%-عا كوبەيگەنى بايقالعان. بۇل – قالىپتى جاعداي, نەگىزگى ءوسىم اۋە كولىگىمەن تاسىمالدا تىركەلگەن. ويتكەنى بۇگىندە 30 باعىت بويىنشا الەمنىڭ 13 ەلىنە 23 اۆياكومپانيا تىكەلەي قاتىنايدى. 79 ەلمەن ۆيزاسىز رەجىم بەكىتىلگەن. وسىنىڭ ەسەسىنە حالىقارالىق رەيستەر جانداندى.
استانا قالاسى ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭاباەۆ ىسكەرلىك, وقيعالىق ءتۋريزمنىڭ دامىپ كەلە جاتقانىن مالىمدەدى.
– قوناقتاردىڭ قاۋىپسىزدىگىن قامتاماسىز ەتۋ ءۇشىن ەلوردانىڭ تۋريستىك پوليتسياسى سەرۆيستىك قىزمەتى قۇرىلدى. تۋريستىك سالانى دامىتۋ تۋرالى تۇجىرىمداماعا سايكەس, استانا ەلدىڭ ساياسي, اكىمشىلىك, ىسكەرلىك جانە مادەني ورتالىعى سانالادى. وسىعان بايلانىستى ەلوردادا ىسكەرلىك تۋريزم باسىم باعىت بولىپ بەلگىلەندى. ءبىز ىسكەرلىك تۋريزم يندۋسترياسىن دامىتۋ ماقساتىندا سالالىق قاۋىمداستىقتار مەن كورپوراتيۆتىك سەكتور وكىلدەرىمەن ارىپتەستىك باعدارلامانى ىسكە اسىرامىز. وعان 90-نان اسا كومپانيا قاتىسادى دەپ وتىرمىز. ەلوردا برەندىن ىلگەرىلەتۋگە ىقپال ەتەتىن ءىس-شارالاردى ۇيىمداستىرۋشىلاردى قولدايتىن باعدارلاما ىسكە اسىپ كەلەدى, – دەدى م.جاڭاباەۆ.
استانادا تۋريستىك قىزمەتتىڭ ساپاسىن ىلگەرىلەتۋ ماقساتىندا ۇيلەسكەن جۇمىستار بيىل دا جالعاسادى. مىسالى, استانانى دامىتۋ ورتالىعى «Visit Astana» سەرىكتەستىك باعدارلاماسىن ىسكە اسىرادى. قازىردىڭ وزىندە باعدارلامانىڭ 60-تان اسا سەرىكتەسى بار بولسا, ولاردىڭ قاتارىنا ساپالى قىزمەت كورسەتەتىن قوناقۇيلەر, مەيرامحانالار, تۋروپەراتورلار كىرەدى.
ەلوردا ءتۋريزمىن دامىتۋدىڭ تاعى ءبىر باسىم باعىتى مەديتسينالىق تۋريزم ەكەنىن ايتتىق. بۇگىندە قالادا JCI حالىقارالىق ساپا ستاندارتىمەن اككرەديتتەلگەن 7 كلينيكا جۇمىس ىستەيدى. استانادا كارديوحيرۋرگيا, نەيروحيرۋرگيا, ستوماتولوگيا, پلاستيكالىق حيرۋرگيا جانە ونكولوگيالىق اۋرۋلاردى ەمدەۋگە مۇمكىندىك مول. نەگىزگى ارتىقشىلىعى – شەتەلدىك كلينيكالارمەن سالىستىرعاندا مەديتسينالىق قىزمەتتەردىڭ قۇنى تومەن ءارى ساپالى. كلينيكالار زاماناۋي جابدىقتارمەن جانە جوعارى بىلىكتى ماماندارمەن قامتىلعان. وسى كول-كوسىر جۇمىستىڭ ەسەسىنە قازىر مەديتسينالىق ءتۋريزمدى دامىتۋ جاعى جولعا قويىلىپ, «قازاقستاندىق مەديتسينالىق تۋريزم قاۋىمداستىعى» قۇرىلدى. قازىر قاۋىمداستىق قۇرامىندا 46 كلينيكا مەن مەديتسينالىق ۇيىم بار ەكەن. بۇل قاتار جىلدان-جىلعا تولىعادى دەگەنگە ءۇمىت باسىم.
بيىل استانا تورىندە V دۇنيەجۇزىلىك كوشپەلىلەر ويىنى وتەدى. بۇل ەندى وقيعالىق ءارى سپورتتىق تۋريزمگە جاقىن. الامانعا الەمنىڭ جۇزدەگەن ەلىنەن 4 مىڭعا جۋىق ويىنشى قاتىسادى دەگەن بولجام بار. وسىعان دەيىن ەلدە دۇنيەجۇزىلىك كوشپەلىلەر ويىنىنىڭ ۇيىمداستىرۋ كوميتەتى قۇرىلىپ, كوميتەت قۇرامىنا مەملەكەتتىك ۋاكىلەتتى ورگانداردىڭ باسشىلارى, وبلىس, رەسپۋبليكالىق ماڭىزى بار قالالاردىڭ اكىمدەرى, ۇلتتىق كومپانيالاردىڭ, كاسىپورىنداردىڭ, قوعامدىق ۇيىمداردىڭ باسشىلارى كىردى. مادەنيەت جانە سپورت مينيسترلىگىنىڭ قولداۋىمەن دۇنيەجۇزىلىك كوشپەلىلەر ويىنىن دايىنداۋ جانە وتكىزۋ ديرەكتسياسى قۇرىلدى. ۇيىمداستىرۋ كوميتەتى دۇنيەجۇزىلىك كوشپەلىلەر ويىنى ديرەكتسياسىنىڭ ۇسىنىسى بويىنشا دۇنيەجۇزىلىك كوشپەلىلەر ويىنى تۋرالى ەرەجە بەكىتتى. تۇركى حالىقتارىنىڭ باسىن قوساتىن دوداعا سپورتشىلاردان بولەك تۋريستەردىڭ دە كەلەتىنى بەلگىلى. مۇنداي اۋقىمدى ويىنداردى ەلىمىز جىلدا وتكىزە بەرمەيتىنىن ەسكەرسەك, ءبىر مەزگىلدە بىرنەشە مىڭ ءتۋريستى قابىلداۋعا اسقان دايىندىق, جاۋاپكەرشىلىك قاجەت. ەرتەڭ وسى كوشپەلىلەر ويىنىن جەلەۋ ەتىپ كەلگەن قوناقتار اراعا تاعى از-ماز ۋاقىت سالىپ, ەلىمىزدىڭ كورىكتى جەرلەرىن تاماشالاۋ ءۇشىن قايتا ساياحاتتاۋى مۇمكىن عوي. سوندىقتان كوشپەلىلەر ويىنىنا كەزەكتى ءىس-شارا دەپ ەمەس, ءتۋريزمدى ىلگەرىلەتۋدىڭ تاعى ءبىر مۇمكىندىگى رەتىندە قاراۋىمىز قاجەت.
