فوتو: gov.kz
ماقسۇت يساحوۆقا قاتىستى ءىس قىلمىستىق كودەكستىڭ 367-بابى 4-بولىگى («اسا ءىرى مولشەردە پارا بەرۋ») بويىنشا قارالدى.
ايىپتالۋشى شىمكەنت قالاسى اكىمىنىڭ ورىنباسارى قىزمەتىن اتقارا ءجۇرىپ, قىلمىستىق كودەكستىڭ 362-بابى 4-بولىگىنىڭ 3) تارماعىمەن شىمكەنت قالاسى ۇلتتىق قاۋىپسىزدىك كوميتەتى دەپارتامەنتىندە اكىمشىلىكتىڭ لاۋازىمدى تۇلعالارىنا قاتىستى قوزعالعان ءىس بويىنشا شىمكەنت قالاسى بويىنشا ۇقك دەپارتامەنتىنىڭ ءبىرىنشى ورىنباسارى س-عا ءىستى قىسقارتۋ ءۇشىن 200 مىڭ دوللار كولەمىندە پارا بەرۋگە وقتالعان.
شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ماقسۇت يساحوۆتىڭ كىناسى كۋاگەرلەردىڭ جاۋابى, ساراپتامالاردىڭ قورىتىندىسى جانە ءىس-قاعازدارمەن دالەلدەندى.
«سوت ماقسۇت يساحوۆتى اسا ءىرى مولشەردە پارا بەرۋگە وقتالدى دەگەن ايىپ بويىنشا كىنالى دەپ تاۋىپ, قىلمىستىق كودەكستىڭ 55-بابى 2-بولىگى, 56-بابى 3-بولىگىن قولدانىپ, مەملەكەتتىك قىزمەتتە لاۋازىمدى قىزمەت اتقارۋ قۇقىعىنان ءومىر بويىنا ايىرىپ, 8 جىل 5 اي 7 كۇنگە باس بوستاندىعىنان ايىرۋ جازاسىن تاعايىندادى», دەلىنگەن قالالىق سوت حابارلاماسىندا.
ۇكىم زاڭدى كۇشىنە ەنگەن جوق. ءىستى قاراۋ بارىسىندا اكىمنىڭ بۇرىنعى ورىنباسارىن «قۇرمەت» وردەنىنەن ايىرۋ ۇسىنىسى دا ەنگىزىلدى.
