فوتو: تاجكۋرانوۆ م.
بايگە-مارافوننىڭ جالپى جول قاشىقتىعى 500 شاقىرىمدى قۇرايدى. بايگە پاۆلوداردا باستالىپ, اقمولا وبلىسىندا جالعاسادى. 23 مامىر كۇنى مارافون استانا قالاسىندا اياقتالادى.
جورىق باعدارلاماسىنا سايكەس, كوماندالار مارافون-بايگەنىڭ العاشقى 100 شاقىرىمىن باعىندىرىپ, ءبىرىنشى كەزەڭنىڭ مارەسى ەكىباستۇز ماڭىندا اياقتالدى.
العاشقى كەزەڭ قورىتىندىسى بويىنشا, شىعىس قازاقستان وبلىسىنىڭ كومانداسى جەڭىمپاز اتاندى. ماڭعىستاۋ وبلىسىنىڭ شاباندوزدارى مارە سىزىعىنا ەكىنشى بولىپ كەسسە, سولتۇستىك-قازاقستان وبلىسىنىڭ كومانداسى ۇشتىكتى تۇيىندەدى.
العاشقى كەزەڭدە بىردەن الماتى, قىزىلوردا وبلىستارى مەن شىمكەنت قالاسىنان كەلگەن كوماندالار جارىستان ءتۇرلى سەبەپپەن شىعىپ قالدى.
«اتتاردىڭ شاما-شارقىن باعامداعان شاباندوزدار سايگ ۇلىكتەرىن قيناماي, دەر كەزىندە جارىستى توقتاتقاندارى جاقسى شەشىم بولدى», دەدى باس تورەشى نادەجدا كۋپتسوۆا.
بۇگىن باستالاتىن 2-كەزەڭدى 16 كوماندا جالعاستىرادى.
100 كم قاشىقتىقتى كوماندالار مىنا مەرزىمدە ءجۇرىپ ءوتتى:
- شقو - 5 ساع. 47 مين.
- ماڭعىستاۋ وبلىسى - 5 ساع. 49 مين.
- سقو - 5 ساع. 51 مين.
- جامبىل وبلىسى - 5 ساع. 52 مين.
- جەتىسۋ وبلىسى - 5 ساع. 55 مين.
- الماتى قالاسى - 6 ساع. 09 مين.
- اقمولا وبلىسى - 6 ساع. 23 مين.
- پاۆلودار وبلىسى - 6 ساع. 29 مين.
- قوستاناي وبلىسى - 6 ساع. 30 مين.
- استانا قالاسى - 6 ساع. 35 مين.
- اباي وبلىسى - 6 ساع. 35 مين.
- تۇركىستان وبلىسى - 6 ساع. 39 مين.
- قاراعاندى وبلىسى - 6 ساع. 40 مين.
- ۇلىتاۋ وبلىسى - 6 ساع. 55 مين.
- بقو - 6 ساع. 57 مين.
- كوماندا «رەكورد».
العاشقى ءۇش جەڭىمپاز 5-ءشى دۇنيەجۇزىلىك كوشپەندىلەر ويىندارى الدىندا 3-7 قىركۇيەك ارالىعىندا وتەتىن حالىقارالىق مارافون-بايگەگە قاتىسۋعا ليتسەنزيا الادى. حالىقارالىق كەزەڭگە شەت مەملەكەتتەردەن كەمىندە 15 كوماندا قاتىسادى دەپ جوسپارلانىپ وتىر (تۇركيا, ساۋد ارابياسى, موڭعوليا, ۆەنگريا, تۇرىكمەنستان, يران, وزبەكستان جانە ت.ب.).
ال مارافون جۇمىسىنا 2 حالىقارالىق جانە 3 ەل سۋدياسى, سونداي-اق 2 حالىقارالىق جانە 3 جەرلەس مال دارىگەرى قاتىسىپ جاتىر. ولار جوعارى ستاندارتتاردى ساقتاۋ مەن جىلقىلاردىڭ دەنساۋلىعىن باقىلايدى.
ايتا كەتەيىك, وتكەن ەكى جىل قاتارىنان ەلىمىزگە ەسىمى بەلگىلى اۋەسقوي ۆەلوشاباندوز راببيم بوراشوۆ اتتىلى شاباندوزدارمەن بىرگە استانادان تۇركىستانعا دەيىنگى 1200 جانە 1300 شاقىرىمدى باعىندىرعان ەدى. سپورتشى بۇل جولى دا 5 كۇندىك الامانعا قاتىسىپ, 500 شاقىرىمدى باعىندىرۋدى مەجەلەپ وتىر.
500 شاقىرىمدىق بايگە-مارافونىن ۇلتتىق سپورت قاۋىمداستىعى مەن «AMANAT» پارتياسى, پاۆلودار وبلىستىق اكىمدىگى, قر تۋريزم جانە سپورت مينيسترلىگى بىرلەسىپ وتكىزىپ جاتىر.
