فوتو: primeminister.kz
ۆيتسە-پرەمەر اتالعان وتىرىستىڭ وتكىزىلۋى ورتالىق ازيا ەلدەرىنىڭ 2030 جىلعا دەيىنگى تۇراقتى دامۋ ماقساتتارىن جۇزەگە اسىرۋعا نيەتى جوعارى ەكەنىن تاعى ءبىر مارتە ايقىندايتىنىن اتاپ ءوتتى. ەلىمىزدە قابىلدانعان مىندەتتەمەلەردى ناتيجەلى ىسكە اسىرۋ ءۇشىن ۇكىمەت دەڭگەيىندە ۇيلەستىرۋشى كەڭەس جۇمىس ىستەيدى. سونىمەن قاتار پارلامەنتتە سەنات توراعاسىنىڭ جەتەكشىلىگىمەن تۇراقتى دامۋ باعىتىنداعى ۇلتتىق ماقساتتار مەن مىندەتتەردىڭ ورىندالۋىن باقىلاۋ جونىندەگى كوميسسيا قۇرىلعان بولاتىن.
وتكەن جىلدىڭ قىركۇيەك ايىندا پرەزيدەنت قاسىم-جومارت توقاەۆ بۇۇ سامميتىنە قاتىسىپ, الماتى قالاسىندا ورتالىق ازيا مەن اۋعانستان ءۇشىن تۇراقتى دامۋ ماقساتتارى جونىندەگى وڭىرلىك ورتالىق اشۋدىڭ قاجەتتىگىن اتاپ وتكەن بولاتىن.
«باس كەڭسەسى قازاقستاندا ورنالاسقان ورتالىق ازيا بويىنشا بۇۇ جاھاندىق كەلىسىمشارتىنىڭ حالىقارالىق كەڭسەسىنىڭ قۇرىلۋى وسى ايماقتاعى تۇرعىنداردىڭ ءال-اۋقاتىن جاقسارتۋ ماقساتىندا ەلدەر اراسىندا تاجىريبە الماسۋعا ۇلكەن مۇمكىندىك بەرەدى. قازاقستانداعى بيزنەس قاۋىمداستىقتىڭ تۇراقتى دامۋ ماقساتتارىن جۇزەگە اسىرۋدا قىزىعۋشىلىعى جوعارى. بىلتىر جاھاندىق كەلىسىمشارتقا 7 وتاندىق كومپانيا مۇشە بولسا, بۇگىندە ولاردىڭ قاتارى 71-گە جەتىپ وتىر. بۇل قادام مەملەكەت باسشىسىنىڭ ورتالىق ازيا مەن اۋعانستان ءۇشىن تۇراقتى دامۋ ماقساتتارى جونىندەگى بۇۇ-نىڭ وڭىرلىك ورتالىعىن اشۋ تۋرالى باستاماسىن جۇزەگە اسىرۋعا سەپ بولماق», دەپ اتاپ ءوتتى ت.دۇيسەنوۆا.
بۇۇ جاھاندىق كەلىسىمشارتى – بىرىككەن ۇلتتار ۇيىمىنىڭ 2000 جىلى كوتەرگەن ەرىكتى باستاماسى. ول بۇكىل الەمدەگى كاسىپورىندار مەن ۇيىمداردى تۇراقتى ءارى الەۋمەتتىك جاعىنان جاۋاپتى ساياسات ۇستانۋعا ىنتالاندىرادى. كەلىسىم نەگىزگى 4 باعىتتى قامتيدى: ادام قۇقىقتارى, ەڭبەك, قورشاعان ورتا جانە سىبايلاس جەمقورلىققا قارسى كۇرەس. تۇراقتى دامۋ ماقساتتارى بۇۇ جاھاندىق كەلىسىمشارتى ستراتەگياسىنا ەنگىزىلىپ, نەگىزگى باعىتى رەتىندە قولدانىلىپ جاتىر.
