ەكونوميكانىڭ باسىم سالالارىنداعى ىنتىماقتاستىقتى ارتتىرۋ كەلەشەگى تالقىلاندى.
ولجاس بەكتەنوۆ مالايزيا ەلىمىزدىڭ وڭتۇستىك-شىعىس ازياداعى نەگىزگى ساۋدا-ەكونوميكالىق ارىپتەستەردىڭ ءبىرى ەكەنىن اتاپ ءوتتى. ءبىر جىل ىشىندە ەكىجاقتى تاۋار اينالىمى $150 ملن-نان شامامەن $245 ملن-عا دەيىن ءوستى. ماقسات – ەكونوميكالاردىڭ قولدا بار الەۋەتىن اشۋ جانە ەكىجاقتى ساۋدا كورسەتكىشىن پاندەمياعا دەيىنگى $650 ملن-نان اسىرۋ.
ء«بىزدىڭ مەملەكەتتەرىمىزدىڭ اراسىنداعى تىعىز ساياسي ديالوگ ءوزارا سەرىكتەستىكتىڭ بەرىك نەگىزىن قالايدى. ەلىمىزدىڭ پرەزيدەنتى قاسىم-جومارت توقاەۆ پەن ءسىزدىڭ كەزدەسۋىڭىز ەكىجاقتى قارىم-قاتىناستاردىڭ دامۋىنداعى ماڭىزدى تاريحي كەزەڭ بولدى. قازاقستان ۇكىمەتى جوعارى دەڭگەيدە قابىلدانعان بارلىق ۋاعدالاستىقتى ىسكە اسىرۋعا دايىن ەكەنىن بىلدىرەدى», دەپ اتاپ ءوتتى و.بەكتەنوۆ.
ۇكىمەت باسشىسى قازاقستاننىڭ مالايزياعا ەكسپورتتى ءارتاراپتاندىرۋ نيەتى تۋرالى مالىمدەپ, مالايزيالىق كاسىپكەرلەردى قىزمەت كورسەتۋ, وڭدەۋ ونەركاسىبى, قارجى, ءبىلىم بەرۋ, جەر قويناۋىن پايدالانۋ, اۋىل شارۋاشىلىعى جانە قۇرىلىس سالالارىنداعى سەرىكتەستىگىن نىعايتۋدىڭ جاڭا مۇمكىندىكتەرىن بىرلەسىپ زەردەلەۋگە شاقىردى. بۇگىندە قازاقستاندا مالايزيالىق كاپيتالدىڭ قاتىسۋىمەن 48 كومپانيا جۇمىس ىستەيدى. جالپى سوماسى $410 ملن-نان استام 17 بىرلەسكەن ينۆەستيتسيالىق جوبا ىسكە اسىرىلىپ كەلەدى.
ءوز كەزەگىندە مالايزيا پرەمەر-ءمينيسترى انۋار يبراگيم مەملەكەتارالىق ءىس-قيمىلدىڭ وڭ ديناميكاسىن اتاپ ءوتتى. كەيىنگى جىلدارى ەكى ەل اراسىنداعى تاۋار اينالىمىنىڭ ءوسىمى 30%-دان استى. مالايزيا قازاقستانمەن تۋريزم, ءبىلىم بەرۋ, ەنەرگەتيكا سالالارىندا, سونداي-اق وتاندىق حالال ونىمدەردى جەتكىزۋ سالاسىندا ىنتىماقتاستىقتى نىعايتۋعا نيەتتى. بۇدان باسقا, الەۋەتى باسىم باعىتتار بويىنشا بىرلەسكەن جوبالار سانىن كوبەيتۋ قاجەتتىگى اتاپ ءوتىلدى.
دوڭگەلەك ۇستەلگە قاتىسۋشىلارعا قازاقستاندا ەلىمىزدىڭ ينۆەستيتسيالىق تارتىمدىلىعىن ارتتىرۋ جونىندەگى جۇيەلى شارالاردىڭ ىسكە اسىرىلۋى تۋرالى ايتىلدى. ينۆەستورلارعا سالىق جانە كەدەندىك جەڭىلدىكتەر بەرىلەدى, كونسالتينگتىك جانە ينفراقۇرىلىمدىق قولداۋ كورسەتىلىپ كەلەدى.
دوڭگەلەك ۇستەل اياسىندا ەلىمىزدىڭ جانە مالايزيالىق بيزنەس وكىلدەرى ناقتى كەلىسسوزدەر جۇرگىزدى. مالايزيا پارلامەنتىنىڭ سەناتورى, ۇلتتىق كاسىپكەرلەر جانە يندۋستريا پالاتاسىنىڭ (NCCIM) پرەزيدەنتى لوۋ كيان چۋان قازاقستان مالايزيانىڭ ورتالىق ازيا ايماعىنداعى ماڭىزدى ءارى ەڭ ۇلكەن ستراتەگيالىق سەرىكتەسى ەكەنىن اتاپ ءوتتى.
دوڭگەلەك ۇستەل الاڭىندا ينۆەستيتسيالىق بايلانىستاردى تەرەڭدەتۋ جانە جاڭا نارىقتاردى بىرلەسىپ يگەرۋ تۋرالى ۋاعدالاستىققا قول جەتكىزىلدى جانە جالپى سوماسى $350 ملن-نان اساتىن كەلىسىمدەر مەن مەموراندۋمدارعا قول قويىلدى. يسلام قارجىسىن جانە ساۋدانى دامىتۋ, سونداي-اق ازىق-تۇلىك ونەركاسىبى, تاۋ-كەن سالالارىنا ينۆەستيتسيالار تارتۋ, التىن وڭدەۋ جانە ترانسفورماتور مەن اۆتوموبيل مايىن بىرلەسىپ ءوندىرۋ سالالارىندا ىنتىماقتاستىق ورناتۋ جوسپارلانعان.
ۋاعدالاستىقتاردى جۇزەگە اسىرۋ ەكى ەلدىڭ تابىستى ىنتىماقتاستىعىن كەڭەيتۋ جولىنداعى ماڭىزدى قادام بولماق.
