فوتو: amanatpartiasy.kz
باعدارلاما پيلوتتىق رەجيمدە قوستاناي وبلىسىنىڭ ايسارى اۋىلىندا ىسكە قوسىلدى. قوستاناي وبلىسى حالقىنىڭ 38 پايىزى اۋىلدىق جەرلەردە تۇرادى, كوپتەگەن اۋىلدار ينفراقۇرىلىمدى جاڭعىرتۋدى قاجەت ەتەدى. 140-تان استام اۋىل ساپالى سۋ, ال 150-گە جۋىعى جوعارى جىلدامدىقتى ينتەرنەتسىز قالدى. جولدار, جارىقتاندىرۋ, مەكتەپتەر مەن مەديتسينالىق مەكەمەلەردىڭ جاعدايى ناشار.
− «جارقىن اۋىل» جوباسى اۋىلدىق ەلدىمەكەندەردىڭ ءال-اۋقاتىن ساپالى جاقسارتۋعا ارنالعان. دەمەۋشىلەر ەسەبىنەن تۇرعىن ۇيلەر سالىنادى, بالالار جانە سپورت الاڭدارى ورناتىلادى, ساياباقتار داميدى, دەمالىس ورتالىقتارى اشىلادى جانە ت.ب. جوبا 400-دەن استام اۋىلدى قامتيتىن بولسا, وبلىس كاسىپكەرلەرى جالپى سوماسى 10 ملرد تەڭگەگە قولداۋ كورسەتۋگە دايىن ەكەندىكتەرىن جەتكىزدى. قوستاناي وبلىسىنىڭ اكىمى بىزگە ايتارلىقتاي قولداۋ كورسەتتى. بۇل پارتيا مەن جەرگىلىكتى اتقارۋشى ورگاندار اراسىنداعى سينەرگەتيكانىڭ ايقىن مىسالى. «جارقىن اۋىل» بۇكىل ەلگە ۇلگى بولادى دەپ ويلايمىز, − دەدى «امانات» پارتياسى قوستاناي وبلىستىق فيليالىنىڭ توراعاسى المات دوسمۇحامەدوۆ.
وسىلايشا, پارتيانىڭ اۋداندىق فيليالدارى اكىمدىكتەرمەن, كاسىپكەرلەرمەن مەموراندۋمعا قول قويىپ, جوبانىڭ تۇراقتىلىعى مەن اشىقتىعىن قامتاماسىز ەتەدى. ناتيجەسىندە اۋىل تۇرعىندارى ساپالى سۋمەن, جولدارمەن, جوعارى جىلدامدىقتى ينتەرنەتپەن قامتىلىپ, الداعى ءۇش جىلدا اۋىلداردىڭ كەلبەتى جاقسارادى.
ءبىرىنشى كەزەكتە «جارقىن اۋىل» جوباسى اياسىندا قوستاناي اۋدانى ايسارين اۋىلدىق وكرۋگىندە ءۇش كوشە جانە جەرگىلىكتى ستاديون قايتا جوندەۋدەن وتەدى. سونداي-اق ايسارى-پولوۆنيكوۆكا سۋ قۇبىرى سالىنىپ, مەديتسينالىق جانە اكۋشەرلىك پۋنكتتەر اشۋ جۇمىستارى قولعا الىندى. كوزدەلگەن بارلىق جۇمىستار 1 قازانعا دەيىن اياقتالادى.
قىرمىزى جۇماعاليقىزى,
ەۇۋ ستۋدەنتى
