فوتو: primeminister.kz
«ۆەتنام – قازاقستاننىڭ ازياداعى ماڭىزدى سەرىكتەستەرىنىڭ ءبىرى. قازاقستان پرەزيدەنتىنىڭ بىلتىر تامىزداعى ۆەتنامعا رەسمي ساپارىنىڭ قورىتىندىسى بويىنشا ءبىز ەكىجاقتى قارىم-قاتىناسىمىزدىڭ جوعارى بەلسەندىلىگىن اتاپ وتەمىز: تاۋار اينالىمى 85%-عا ءوسىپ, شامامەن $1 ملرد-قا جەتتى. ەلدەرىمىز اراسىندا اپتاسىنا 13 اۋە رەيسى ورىندالادى. ۇشۋ گەوگرافياسىن كەڭەيتۋگە دايىنبىز», دەپ اتاپ ءوتتى س.جۇمانعارين.
سونىمەن قاتار ۆيتسە-پرەمەر ۆەتنامدىق كومپانيالاردى ترانسكاسپي حالىقارالىق كولىك باعىتىنىڭ مۇمكىندىكتەرىن زەرتتەۋگە شاقىردى. بۇل ۆەتنامدىق ەكسپورتقا تەڭىز باعىتتارىنا قاراعاندا شىعىستان باتىسقا قاراي 3-4 ەسە جىلدام جۇرۋگە مۇمكىندىك بەرەدى, بۇل شىعىنداردى ايتارلىقتاي ازايتادى.
ء«بىز تحكب ازيا مەن ەۋروپا اراسىنداعى ەڭ وڭتايلى باعىت دەپ ەسەپتەيمىز. سونداي-اق ليانيۋنگان تەڭىز پورتىنداعى قازاقستان-قىتاي تەرمينالىنىڭ, سيان قۇرعاق پورتىنىڭ قۋاتىن ىسكە قوسۋدى ۇسىنامىز», دەدى ول.
كەزدەسۋ بارىسىندا تاراپتار سيرەك كەزدەسەتىن مەتالداردى ءوندىرۋ جانە وڭدەۋ سالاسىنداعى ىنتىماقتاستىق مۇمكىندىكتەرىن تالقىلادى. ۆەتنام دەلەگاتسياسىنا ەلەكتروموبيلدەرگە ارنالعان ليتي-يون باتارەيالارىن ءوندىرۋ ءۇشىن ەلىمىزدەگى ءىرى ليتي كەن ورىندارىنا نازار اۋدارۋ ۇسىنىلدى, بۇل قازاقستاننىڭ جوعارى تەحنولوگيالىق سەكتورىنىڭ وسۋىنە, ال ۆەتنامدىق اۆتووندىرۋشىلەرگە وزدەرىنىڭ باسەكەلەستىك ارتىقشىلىقتارىن ساقتاۋعا مۇمكىندىك بەرەدى.
