اۋقىمدى جانە ماعىنالى جيىننىڭ الدىندا ءار باعىتتا بىرنەشە سەكتسيالىق وتىرىستار وتكىزىلىپ, قۇرىلتاي مۇشەلەرىنىڭ ءتۇرلى تاقىرىپتاعى پىكىرلەرى تىڭدالدى. ادامنىڭ قۇقىقتارىن قورعاۋ, وتباسىلىق زورلىق-زومبىلىقتارعا توسقاۋىل قويۋ, ءماسليحاتتاردىڭ ءرولىن ارتتىرۋ, جەرگىلىكتى قوعامدىق كەڭەستەردى ناعىز حالىقتىڭ وكىلدى ورگاندارىنا اينالدىرۋ تۋرالى ناقتى پىكىرلەر ايتىلدى. مەملەكەت باسشىسى قاسىم-جومارت توقاەۆ قۇرىلتايدا كوپشىلىك كۇتكەندەي ەلىمىزدىڭ بولاشاعى, تاۋەلسىزدىگىمىزدىڭ باياندىلىعى جولىندا جاسالۋعا ءتيىس ءبىرشاما باستامانى اتاپ ءوتتى.
دىنىمىزگە, تىلىمىزگە قاتىستى ءبىراز ماسەلە اشىق ايتىلدى. اتا-بابالارىمىزدىڭ تاريحىمەن بىرگە جالعاسىپ كەلە جاتقان دىنىمىزدەن اينىماي ءمازھابىمىزدىڭ ماقساتىن بۇزباي, ۇلتتىق ناقىشتارىمىزعا لايىق كيىم ۇلگىسىنەن تايماي يسلام ءدىنىنىڭ تالاپتارىنا بەرىك بولۋعا بولاتىندىعىن جەتكىزدى. شىندىعىندا دا ءار ادامنىڭ يمانى – جۇرەگى مەن تىلەگىندە. سونىمەن بىرگە مىڭداعان جىلدار بويى حالقىمىزدىڭ داستۇرىمەن بىرگە جاساپ كەلە جاتقان سۇننيتتىك حانافي ءمازھابىن ۇستانۋدان تايماۋ كەرەكتىگىن ايتقان پرەزيدەنت سوپىلىق ىلىممەن بىرگە قازىرگى قازاق ەلىنە يسلامدى تاراتىپ, ورنىقتىرعان ياساۋي بابامىزدىڭ رۋحاني قۇندىلىقتارىن دارىپتەۋدىڭ تاريحي ءمانى زور ەكەندىگىن, ونىڭ كەسەنەسىنە الەمگە ايگىلى جادىگەر رەتىندە ەرەكشە كوڭىل ءبولۋ كەرەكتىگىن, ءتىپتى جاتقان جەرىندەگى كوك تاستىڭ جابۋىن يسلام وركەنيەتىنە لايىق ەتىپ, قايتا جاساپ شىعۋ تۋرالى تاپسىرماسى ەلدى ەلەڭ ەتكىزەتىن جاڭالىق بولدى دەپ ەسەپتەيمىز.
ال قازاق ءتىلى قازىرگى زامانعا لايىق ەكونوميكا, ءوندىرىس, تەحنيكا مەن تەحنولوگيا تىلىنە اينالۋعا بارىنشا مۇمكىندىگى بار ەكەندىگىن دە پرەزيدەنت ناقتى ايتتى. ء«تىلىمىزدىڭ قولدانۋ اياسىن كەڭەيتە ءتۇسۋ مەملەكەتتىك ساياساتتىڭ باستى باعىتى بولىپ قالا بەرەدى. بۇل – ءبىز ءۇشىن مىزعىماس ۇستانىم. ەلىمىزدە قازاق تىلىنە دەگەن سۇرانىس جىل وتكەن سايىن ارتىپ كەلەدى. قازاق ءتىلى بيزنەستىڭ, عىلىم مەن تەحنيكانىڭ تىلىنە اينالا باستادى. بۇل ءۇردىستى ودان ءارى دامىتۋدىڭ ەڭ ءتيىمدى ءارى توتە جولى – اعارتۋشىلىق. قازىر ءىرى كىتاپ دۇكەندەرىندە قازاق تىلىندەگى تۋىندىلاردىڭ ۇلەسى ارتا ءتۇستى. سوڭعى كەزدە باسپاگەرلەردىڭ جاڭا بۋىنى الەمدىك بەستسەللەرگە اينالعان شىعارمالاردى اۋدارىپ ءجۇر. كوپتەگەن كىتاپتى شىعارىپ جاتىر», دەپ اتاپ كورسەتتى.
مەملەكەت باسشىسىنىڭ باستامالارىنىڭ اراسىنان ءبىزدىڭ حالقىمىز, اسىرەسە جاستارىمىز ءۇشىن بەس جامان ادەتتەن قۇتىلىپ, التى قۇندىلىققا ۇمتىلۋ قاجەتتىگى تۋرالى ايتقان باعدارلامالىق سوزدەرىن ەرەكشە اتاپ وتكىم كەلەدى. ۇكىمەت پەن مەملەكەتتىك ورگاندارعا وزدەرىنىڭ جۇمىستارىن دا, باعدارلامالاردى دا وسىعان سايكەستەندىرۋ تۋرالى تاپسىرمالار دا بەردى.
پرەزيدەنت اتاپ وتكەن 5 جامان ادەتتى ايتار بولساق, ولار – ناشاقورلىق, لۋدومانيا, تۇرمىستىق زورلىق-زومبىلىق, ۆانداليزم, ىسىراپشىلدىق. ال 6 ۇلتتىق قۇندىلىق رەتىندە تاۋەلسىزدىك پەن وتانشىلدىقتى, بىرلىك پەن ىنتىماقتى, ادىلدىك پەن جاۋاپكەرشىلىكتى, زاڭ جانە ءتارتىپتى, ەڭبەكقورلىق پەن كاسىبي بىلىكتىلىكتى جانە جاسامپازدىق پەن جاڭاشىلدىقتى ايتتى.
وسى قاعيدالاردىڭ بارلىعى پرەزيدەنتىمىزدىڭ ءوزى كوتەرىپ جۇرگەن «ادال ادام» فورمۋلاسىنىڭ قاعيداتتارىنا تولىق سايكەس كەلەدى, ادىلەتتى قازاقستان قۇرۋدىڭ نەگىزىن قالايدى.
ءالي بەكتاەۆ,
سەنات دەپۋتاتى
