فوتو: قازاقستان بوكس فەدەراتسياسى
باس باپكەر «ەلوردا كۋبوگى ءىىى» حالىقارالىق ءتۋرنيرى بۇعان دەيىن 6 سالماق دارەجەسىندە پاريج وليمپياداسىنا قاتىسۋ مۇمكىندىگىن بەرەتىن ليتسەنزيانى جەڭىپ العان بوكسشىلاردىڭ تاجىريبەسىن تولىستىرىپ, شەبەرلىگىن شىڭداۋ ءۇشىن ۋاقىتىنان بۇرىن ۇيىمداستىرىلىپ وتىرعانىن ايتتى.
«بيىلعى «ەلوردا كۋبوگى ءىىى» حالىقارالىق ءتۋرنيرى – وليمپياداعا قاتىساتىن بوكسشىلاردىڭ فيزيكالىق, تەحنيكالىق دايىندىعىن سوڭعى رەت تەكسەرۋ ءۇشىن ۋاقىتىنان ەرتە وتكىزىلىپ جاتىر. وليمپياداعا قاتىساتىن جىگىتتەرگە ءوز پايداسىن تيگىزەدى دەپ ويلايمىز. قولىندا جولداماسى بار جىگىتتەردى ءبىر تەكسەرىپ الىپ, كەم-كەتىكتى, تاجىريبەنى دۇرىستاۋ ءۇشىن وسى تۋرنيرگە ءبارى قاتىسىپ جاتىر. بيىلعى ءتۋرنيردىڭ دەڭگەيى ورتاشا دەۋگە بولادى. بىلتىر بۇدان دا كوپ مەملەكەت قاتىسقان. ايدىڭ سوڭىندا تايلاندتا وليمپيادا ليتسەنزياسى ساراپقا سالىناتىن باسەكە وتەدى. كوپ ەل سول جارىسقا باسىم دەن قويىپ وتىر. جارىسقا وزبەكستان, ءۇندىستان, يران, جاپون, قىرعىزستان مەملەكەتتەرىنىڭ مىقتى بوكسشىلارى كەلدى. ودان بولەك قىتاي مەن ازەربايجاننان وليمپياداعا ليتسەنزيا العان بوكسشىلار دا باق سىناپ جاتىر. ولار دا شەبەرلىگىن شىڭداۋ ماقساتىندا كەلدى استاناعا. ءبىزدىڭ بوكسشىلار دا تەك ءوز ەلىمىزدىڭ بوكسشىلارىمەن دايىندالىپ قويماي, شەتەلدىڭ بوكس مەكتەبىنەن وتكەن قارسىلاستارمەن كۇش سىناسادى. وزدەرىنىڭ كەم-كەتىگىن كورەدى. باپكەرلەر, ءبىز, وسى جارىستان كەيىن جەكپە-جەكتەردى سارالاپ, كىمگە نە جەتىسپەي تۇرعانىن انىقتاۋ ءۇشىن جۇمىس ىستەيمىز», دەدى مىرزاعالي ايتجانوۆ.
استانادا ءوتىپ جاتقان بايراقتى بوكس باسەكەسىنەن كەيىن دە وليمپيادالىق قۇرام تورتجىلدىقتىڭ باستى دوداسىنا دايىندىقتى استە باسەڭدەتپەيدى. سەبەبى, الدا اۋقىمدى 2 وقۋ جاتتىعۋ جيىنى جوسپارلانىپ وتىر. ونىڭ العاشقىسى شەتەلدە وتسە, كەيىنگىسى تۇركىستان وبلىسىندا ۇيىمداستىرىلادى.
«بۇل تۋرنيردەن كەيىن تۇركيادا 10 كۇندىك تىنىقتىرۋ, ونىمەن قوسا جاتتىعۋ جيىنى وتەدى. جىگىتتەر تەڭىزگە ءتۇسىپ قانا قويماي, قۇمدا جۇگىرەدى. ءار كۇنگە بەلگىلەنگەن ءتۇرلى جاتتىعۋدى دا جوسپارلى تۇردە جاسايمىز. ودان كەيىنگى وقۋ-جاتتىعۋ جيىنى تاۋدا تۇركىستان وبلىسىنداعى «الما-تاۋ» بازاسىندا بولادى. جالپى دەنە دايىندىعىن پىسىقتايمىز. سول بازادا 21 كۇن ەڭ ۇلكەن جۇمىستاردى, دايىندىقتى اتقارامىز. بوكسشىلارىمىزدىڭ رينگتە فۋنكتسيونالدىق ازىرلىگى مىقتى بولۋ ءۇشىن, سوندا اۋقىمدى جاتتىعۋ جيىنىن وتكىزەمىز. وسى جيىنعا بىزبەن بىرلەسە ازەربايجان جانە تاعى 2-3 ەل ءوتىنىش ءبىلدىرىپ وتىر. بارلىعى دۇرىس بولعان جاعدايدا بىرىككەن وقۋ-جاتتىعۋ جيىنىن وتكىزەمىز. ول جەردە شەبەرلىك, تاكتيكالىق ءارى ارنايى قارسىلاستارعا قارسى زەرتتەۋ جۇمىستارىن جۇرگىزەمىز», دەدى باس باپكەر.
بوكستان يتاليانىڭ بۋستو-ارسيتسيو قالاسىندا وتكەن ليتسەنزيالىق تۋرنيردە 63,5 كگ سالماق دارەجەسىندە قازاقستان قۇراماسىنىڭ قورجىنى بوس كەلدى. الايدا, كوماندا تولىق قۇراممەن پاريجگە بارۋ ءۇشىن سوڭعى مۇمكىندىك تايلاندتا سىنالادى. بۇل باسەكەدە دە مۇحامەدسابىر بازارباي ۇلى جولدامانى جەڭىپ الۋعا كۇش سالادى. وعان ەكىنشى مۇمكىندىك ەلدە وتكەن سپاررينگتىك جەكپە-جەكتەردە باسىم بولعانى ءۇشىن بەرىلىپ وتىر. مىرزاعالي ايتجانوۆ مۇحامەدسابىر بازارباي ۇلىنىڭ جاۋاپتى جارىسقا دايىندىعى قالاي ءوتىپ جاتقانىن ايتتى.
«بۇعان دەيىن 6 بوكسشىمىز وليمپيادا جولداماسىن قانجىعالادى. تەك 63,5 كگ سالماق دارەجەسىندە جولداما بۇيىرماعان ەدى. تايلاندتا مۇحامەدسابىر بازارباي ۇلى وعان قول جەتكىزەدى دەپ سەنەمىز, ۇمىتتەنەمىز. مۇحامەدسابىر بازارباي ۇلى ليتسەنزيالىق تۋرنيرگە دايىندالىپ, وقۋ-جاتتىعۋ جۇمىستارىن جالعاستىرىپ جاتىر. 21 مامىر كۇنى تايلاندقا ۇشادى. سول جەردە بار كۇشىن سالىپ, ەلىمىزگە ليتسەنزيامەن ورالادى دەگەن ويدامىز», دەدى مىرزاعالي قۇلان ۇلى.
