گوسپيتال ەكىنشى دۇنيەجۇزىلىك سوعىس ارداگەرلەرىمەن قاتار, چەرنوبىل اپاتىنىڭ زاردابىن جويۋعا قاتىسۋشىلار مەن اۋعان سوعىسىنا قاتىسۋشىلارعا, بەيبىتشىلىك ورناتۋ ماقساتىندا ۇرىس قيمىلدارىنا قاتىسقان ەرىكتىلەرگە, سەمەي اۋماعىنداعى يادرولىق سىناقتاردان زارداپ شەككەندەرگە دە مەديتسينالىق قىزمەت كورسەتەدى. «مۇندا جىلىنا ءۇش مىڭنان استام ادام كەلىپ, ەم-دوم قابىلدايدى», دەيدى گوسپيتالدىڭ باس دارىگەرى دينارا امانبولقىزى ورازالينا.
گوسپيتالدا ەكسپرەسس-لابوراتوريا جۇمىس ىستەپ تۇر. ايتقاندايىن, كوروناۆيرۋس پاندەمياسى كەزىندە گوسپيتال ۇجىمى باستاما كوتەرىپ, قاتارىنان ءۇش رەت ينفەكتسيالىق اۋرۋحاناعا بەيىمدەلدى, دارىگەرلەر مەن كىشى مەديتسينا قىزمەتكەرلەرى ۋاقىتپەن ساناسپاي ۆيرۋس جۇقتىرعانداردى ەمدەپ, قانشاما ادامدى اجالدان امان الىپ قالدى.
يادرولىق اپات ايماعىنان كەلگەن 82 جاستاعى ساعىنتاي راحمانوۆ استاناداعى گوسپيتالعا ءبىرىنشى رەت جولى تۇسكەنىن, بولاشاقتا ءار ايماقتا وسىنداي گوسپيتال اشىلسا دەگەن پىكىرىن ءبىلدىردى. «گوسپيتال ۇنادى, مەكەمە باسشىلارىنا ريزامىن. بارلىق جاعداي جاسالعان. ءتورت مەزگىل تاماق بەرىلەدى, قاجەتتى ءدارى-دارمەكتەن دە تاپشىلىق جوق», دەپ اعىنان جارىلدى اقساقال.
شىعىس قازاقستان وبلىسىنداعى تارباعاتاي اۋدانىنا قاراستى قابانباي باتىر اۋىلىنىڭ تۋماسى, بۇل كۇندەرى وسكەمەن قالاسىندا تۇرىپ جاتقان بەيسەنبەك حامزين 1986 جىلى چەرنوبىل اپاتىنىڭ سالدارىن جويۋعا قاتىسىپتى. «اپاتتىڭ زاردابى وراسان. مەنىمەن بىرگە بولعانداردىڭ ءبىرازى قاتتى رادياتسيا الىپ, قايتىس بولدى. سۋ ىشەرلىگىم بار ەكەن. ءوزىمدى كۇتتىم, قاجەتتى ءدارى-دارمەكتى ۋاقتىلى قابىلداپ وتىردىم. الماتىداعى, استاناداعى گوسپيتالداردا بىرنەشە رەت ەم الدىم. مۇندا ءبارى كوڭىلدەگىدەي», دەيدى ب. حامزين.
شىمكەنت پەن تارازدان كەلگەن باتىربەك ەربوسىنوۆ پەن قۇرالبەك اسانوۆ تا وسىنداي پىكىردە. ولاردىڭ دا گوسپيتال باسشىلىعى مەن قىزمەتكەرلەرىنە العىستان باسقا ايتارلارى جوق.
وڭداسىن ەلۋباي,
ارداگەر جۋرناليست
استانا
