بۇعان قوسا كوكپار بارىسىندا جىگىتتەر اراسىندا سەركەنى ءبىرىنشى بولىپ كوتەرىپ الۋدان جەكپە-جەك ات جارىسى ۇيىمداستىرىلدى. ءسويتىپ, بۇل بايقاۋدا شىمكەنت قالاسىنىڭ اتىنان جەبە اتتى تۇلپارىمەن سىنعا تۇسكەن شاباندوز ەلدار جارىلقاپ قارسىلاس شاق كەلتىرمەي ەل چەمپيونى اتاندى. باسەكە جەڭىمپازىنا جۇلدەگە 1 ملن تەڭگە تابىستالدى. شىمكەنتتىك شاباندوزداردى رەسپۋبليكالىق كوكپار دوداسىنا باستاپ كەلگەن كوماندا جەتەكشىسى – قالانىڭ ۇلتتىق جانە ات سپورتى تۇرلەرى بويىنشا كەشەندى سپورت كلۋبىنىڭ ديرەكتورى دانيار مىڭباەۆ.
سەركەگە تالاستا ەپتىلىگىمەن كوزگە تۇسكەن ماڭعىستاۋلىق شاباندوز تەمىرلان سەيىتبەك سايان اتىمەن جارىستىڭ كۇمىس جۇلدەگەرى اتاندى. كوكپار فەدەراتسياسى تاراپىنان ەكىنشى ورىن جەڭىمپازىنا 500 مىڭ تەڭگە جۇلدە بەرىلدى.
ال ۇزدىك ۇشتىكتى تۇيىندەگەن – تۇركىستان وبلىسىنىڭ شاباندوزى ابىلايحان نىشانبەك. ول تىزگىندەگەن تۇلپارىنىڭ اتى – كوكسەرەك. جەڭىمپاز سايگۇلىگىمەن بىرگە 300 مىڭ تەڭگە قارجىلاي سىياقى الدى.
ءوز كەزەگىندە فەدەراتسيا كوكپاردان جەكپە-جەك اتتار بويىنشا جارىستا بەسىنشى ورىنعا دەيىن جۇلدە قاراستىردى. سونىڭ ناتيجەسىندە ءتورتىنشى ورىن يەسى الماتى وبلىسىنان كەلگەن اقجازىق اتتى تۇلپاردى ەرتتەگەن شاباندوز ەلدار جيەنقۇلوۆقا, بەسىنشى ورىنعا تابان تىرەگەن استانالىق اقجال اتتى ات مىنگەن شاباندوز جالعاس بورانوۆقا 100 مىڭ تەڭگەدەن قارجىلاي جۇلدە تاپسىرىلدى.
بارلىق جەڭىمپاز بەن جۇلدەگەردى ۇلتتىق جانە ات سپورتى ورتالىعىنىڭ ديرەكتورى باقداۋلەت ءسابيتوۆ پەن كوكپاردان باس تورەشى عاني احمەتباەۆ ماراپاتتادى.
شىمكەنت
