العاشقى ات باسىن بۇرعان نىسان شىمكەنت ساۋدا-لوگيستيكالىق ورتالىعى. بۇل جەردەگى 5 گەكتار اۋماقتا «نمي-يۋگ» جشس-نىڭ كوپسالالى قويما كەشەنى سالىنىپ جاتىر. اتالعان جوبانىڭ قۇنى – 10,2 ملرد تەڭگەنى قۇرايدى. قۇرىلىستىڭ ءبىرىنشى كەزەڭىن بيىل اياقتاۋ جوسپارلانىپ وتىر. بۇگىنگى تاڭدا ءبىرىنشى كەزەڭنىڭ قۇرىلىس-مونتاجداۋ جۇمىستارى بىتۋگە تاياۋ. قويما ءۇي-جايلارىنىڭ جالپى اۋدانى – 22 مىڭ شارشى مەتر. سەرىكتەستىك قۇرىلتايشىسى ايجان نايمبەكوۆا سالىنىپ جاتقان نىسان كليماتتىق باقىلاۋدىڭ يكەمدى جۇيەسى, توڭازىتقىش كامەرالارىنىڭ تەمپەراتۋراسىن -18-دەن + 4 گرادۋسقا دەيىن رەتتەۋ مۇمكىندىگى بار ا + ساناتىنداعى قويما بولاتىنىن ايتادى. جانە زاماناۋي قويمادا تاۋارلاردىڭ كەڭ اسسورتيمەنتىن ساقتاۋعا مۇمكىندىك تۋادى.
ۆيتسە-پرەمەر ءىسساپار اياسىندا «Alsera kz» جشس-نىڭ جىلىجاي كەشەنى جوباسىمەن تانىستى. 650 ملن دوللارعا باعالانعان ينۆەستيتسيالىق جوبانى «بوزارىق» يندۋستريالىق ايماعىندا جۇزەگە اسىرۋشى «Alarko Holding» شەتەلدىك تۇرىك كومپانياسى. ينۆەستور جاڭا تەحنولوگيالاردى قولدانا وتىرىپ, 500 گەكتار الاڭدا بىرنەشە كەزەڭ ارالىعىندا جىلىجاي قۇرىلىسىن جۇرگىزەدى. زاماناۋي جىلىجاي كەشەنىندە قيار, قىزاناق, باقشا داقىلدارى مەن باسقا دا اۋىل شارۋاشىلىعى ونىمدەرى وسىرىلەدى. كەلەشەكتە بۇل نىسان شىمكەنتتەگى جابىق كەشەندە كوكونىس وندىرەتىن ەڭ ۇلكەن جىلىجاي اتانباق, سونداي-اق وسى جوبانىڭ اياسىندا ەكى مىڭعا جۋىق جاڭا جۇمىس ورىندارى اشىلادى.
ۇكىمەت باسشىسىنىڭ ورىنباسارىنا قالا اكىمى عابيت سىزدىقبەكوۆ ساۋدا-لوگيستيكالىق ورتالىعىندا ىسكە اسىرىلاتىن باسقا دا جوبالار تۋرالى باياندادى. ءوز كەزەگىندە س.جۇمانعارين اتالعان جوبالاردىڭ كەلەشەگى مەن پەرسپەكتيۆالارىن جوعارى باعالاپ, مەملەكەت تاراپىنان بارلىق قاجەتتى قولداۋلار كورسەتىلەتىنىن مالىمدەدى. ۆيتسە-پرەمەردىڭ ايتۋىنشا اگرووناركاسىپتىك كەشەندەر بويىنشا مەملەكەت ۇستانعان ساياسات – اۋىل شارۋاشىلىعى ونىمدەرىن تەرەڭ وڭدەۋ كولەمىن 70% جەتكىزۋ بولسا, ساۋدا-لوگيستيكالىق ورتالىعىنداعى جاڭا جوبالار سول ناتيجەگە جەتۋگە مۇمكىندىك بەرەدى.
«AZALA Textile» جشس قازاقستانداعى دايىن توقىما ونىمدەرىن وڭدەپ شىعاراتىن, جابىق تسيكلدى جالعىز ءىرى توقىما فابريكاسى سانالادى. وسى ورايدا ۆيتسە-پرەمەر اتالعان كاسىپورىن جۇمىسىمەن جاقىنىراق تانىستى. بۇگىنگى تاڭدا فابريكادا 475 ادام جۇمىس ىستەيدى. بىرەگەي توقىما كومبيناتى يىرىلگەن جىپتەن ءارتۇرلى دايىن توقىما بۇيىمدارىن شىعارادى. كاسىپورىننىڭ جىلدىق قۋاتتىلىعى 6 800 توننادان استام يىرىلگەن ءجىپ پەن 14 ملن سىزىقتىق مەترلى اۋىر ماتالار وندىرۋگە قاۋقارلى. توقىما فابريكاسىنىڭ ونىمدەرى نەگىزىنەن ەكسپورتقا باعىتتالعان. ياعني «AZALA Textile» وندىرگەن تاۋارىنىڭ شامامەن 70% تاياۋ شەت ەلدەرگە, ليتۆا, گەرمانيا, يتاليا, پولشا, بەلگيا, دانيا, لاتۆيا مەن تۇركياعا جونەلتەدى. وندىرىستىك تسەحتاردى ارالاپ, زاۋىت باسشىلىعىمەن ەمەن-جارقىن اڭگىمەلەسكەن ۇكىمەت باسشىسىنىڭ ورىنباسارى ءىسساپارىنىڭ قورىتىندىسىندا وتاندىق توقىما ءوندىرۋشىسىنىڭ ونىمىنە مەملەكەتتىك ساتىپ الۋدى ۇلعايتۋ مۇمكىندىگى ۇكىمەتتىك دەڭگەيدە پىسىقتالاتىنىن جەتكىزدى.
شىمكەنت
