سۋرەتتى تۇسىرگەن – ەرلان ومار, «EQ»
وقۋ-اعارتۋ ءمينيسترى عاني بەيسەمباەۆ ەلىمىزدەگى بارلىق پەداگوگكە «سوڭعى قوڭىراۋ» ءىس-شاراسىن 25 مامىردا وتكىزۋدى تاپسىردى. وسىعان قاتىستى مينيستر: «بيىلعى وقۋ جىلى 25 مامىردا اياقتالاتىنىن قاتاڭ ەسكەرتەمىن. وسىعان وراي, وقۋ باعدارلامالارىن جىل بويىنا تابىستى مەڭگەرگەن 3,8 ميلليوننان اسا ەلىمىزدىڭ وقۋشىلارى, كەلەسى سىنىپتارعا كوشىرىلسىن. مەكتەپتىڭ 1-10 سىنىپ وقۋشىلارىنا ء«بىلىمىم وتانىما» تاقىرىبىنداعى بىرىڭعاي سىنىپ ساعاتتارىن وتكىزۋ 24 مامىر جۇما كۇنىنە جوسپارلانسىن. بۇل بىلتىرعى قىركۇيەك ايىندا ەنگىزىلگەن ء«بىرتۇتاس تاربيە باعدارلاماسى» شەڭبەرىندە قابىلدانعان جوسپارعا سايكەس ۇيىمداستىرىلۋعا ءتيىس. ارىپتەستەرىمىزدىڭ ۇسىنىسى بويىنشا ەلىمىزدە مامىر ايىندا «ىنتىماق ايى» ايلىعىن وتكىزۋ جوسپارلانعان. ونىڭ اياسىندا «تازا قازاقستان», «يگى ىستەر», «كانيكۋلدا كىتاپ وقيىق» جانە ت.ب. ءىس-شارالار قاراستىرىلعان. سونىمەن قاتار ەلىمىزدەگى 186 مىڭ مەكتەپ بىتىرۋشىلەرى ءۇشىن وقۋ جىلىنىڭ اياقتالۋىنا ارنالعان «سوڭعى قوڭىراۋ» ءىس-شاراسىن 25 مامىردا وتكىزۋدى تاپسىرامىن», دەدى.
ءمينيستردىڭ ايتۋىنشا, بيىلعى مەكتەپ تۇلەكتەرى اتالعان ءىس-شارانى جوعارى مادەنيەتپەن, ىسىراپسىز, داڭعازاسىز, رۋحاني-ادامگەرشىلىك دەڭگەيىندە وتكىزگەنى ورىندى. بۇل بولاشاق تۇلەكتەر ءۇشىن ونەگەلى داستۇرگە اينالعان جاڭا فورماتتاعى جوعارى مادەنيەتتى العاشقى شارا بولارى ءسوزسىز. وقۋ جىلىن اياقتاۋدى ساپالى ۇيىمداستىرۋ جانە قاۋىپسىزدىك شارالارىن ساقتاۋ بويىنشا وڭىرلىك ءبىلىم باسقارمالارىنىڭ باسشىلارىنا دەربەس جاۋاپكەرشىلىك جۇكتەلەدى.
«قۇرمەتتى ارىپتەستەر! توتەنشە جاعدايلار كەزىندە ەۆاكۋاتسيالىق پۋنكتتەردە بالالار مەن تۇرعىندارعا پسيحولوگيالىق كومەك كورسەتكەن 400-دەن اسا مەكتەپ پسيحولوگتەرىمەن, ءوز مىندەتتەرىن اتقارا ءجۇرىپ, كەز كەلگەن قيىندىقتى ەلمەن بىرگە ەڭسەرۋگە قاتىسقان 29 مىڭنان اسا پەداگوگتەر مەن ءبىلىم سالاسى قىزمەتكەرلەرىنىڭ ولشەۋسىز ەڭبەكتەرىن ەرەكشە اتاپ وتكىم كەلەدى. ماسەلەن, ماڭعىستاۋ وبلىسىنىڭ پەداگوگتەرى اتىراۋ وبلىسىنان كەلگەن وتباسىلاردى ءوز ۇيلەرىندە قابىلداپ, ۇيىمشىلدىقتىڭ ەرەكشە ۇلگىسىن كورسەتتى. اقمولا وبلىسىنداعى ارىپتەستەرىمىز ارنايى مەكتەپ ينتەرناتىنىڭ تاربيەلەنۋشىلەرىن ءوز ۇيلەرىنە ورنالاستىرىپ, قامقورلىققا الدى. اسىرەسە قوستاناي وبلىسى, التىنسارين اۋىلىندا ورنالاسقان مەكتەپ ۇجىمى ەلدى مەكەنگە قارعىن سۋ كىرگەن شاقتا, ەڭ الدىمەن, مەكتەپتى قورعاپ قالدى. پەداگوگتەرىمىزدىڭ بۇل قاراكەتى – ۇلكەن ەرلىك پەن شىنايى ازاماتتىقتىڭ بەلگىسى. «بەرەكە – بىرلىكتە, ىرىس – ىنتىماقتا» دەگەن. ەلىمىزدىڭ ءبىلىم بەرۋ جۇيەسىندە وزدەرىڭىزدەي جاۋاپكەرشىلىگى جوعارى, بىلىكتى مامانداردىڭ بولعانىن ماقتان تۇتامىن, ءارى بارشاڭىزعا مينيسترلىك پەن جەكە ءوز اتىمنان ەرەكشە ريزاشىلىعىمدى بىلدىرەمىن», دەدى ع.بەيسەمباەۆ.
