27 مىڭنان استام جامبىلدىق قالالار مەن اۋىلداردى كوگالداندىرۋعا ءوز ۇلەستەرىن قوستى, ونىڭ ىشىندە كاسىپورىن مەن الەۋمەتتىك نىساننىڭ 5 222 قىزمەتكەرى بار. اۋماقتى اباتتاندىرۋ بويىنشا 60 تاريحي-مادەني ەسكەرتكىش, 143 ساياباق, 1400-گە جۋىق اۋلا, 8300 سۋ جۇيەلەرىندە تازارتۋ جۇمىستارى جۇرگىزىلدى.
وبلىس بويىنشا بيىل اباتتاندىرۋ, كوگالداندىرۋ جانە سانيتارلىق تازالاۋ جۇمىستارىنا 9,4 ميلليارد تەڭگە ءبولىندى. بۇگىنگى تاڭدا 57 100 كوشەت وتىرعىزىلدى, 809,4 شاقىرىم ارىق جانە كانال, 3 102 شاقىرىم كوشە, 1,1 ميلليون شارشى مەتر ساياباق پەن سكۆەر اۋماعى تازارتىلدى, 4 280 توننا قوقىس شىعارىلدى. 53 سۋبۇرقاقتى ىسكە قوسۋ شارالارى قولعا الىندى. بۇل باعىتتاعى جۇمىستاردى ناتيجەلى جالعاستىرۋ ءۇشىن 25 بىرلىك تەحنيكا ساتىپ الۋ جوسپارلانعان.
سونداي-اق وبلىس بويىنشا 469,6 شاقىرىم جول جوندەلەدى. 228 كوشە (تارازدا 76 كوشە) جارىقتاندىرىلادى. بيىل وبلىس ورتالىعىنداعى 10 شاعىن اۋدان مەن قاراسۋ تۇرعىن القابىنىڭ اۋلالارى تولىعىمەن جارىقپەن قامتىلادى.
ءوڭىر باسشىسىنىڭ ايتۋىنشا, قازىرگى كەزدە اعاشتاردى تۇگەندەۋ جۇمىستارى جۇرگىزىلىپ جاتىر. وسى مالىمەتتەر نەگىزىندە ۇتىمدى سۋارۋ جۇيەسىن ۇيىمداستىرۋعا كومەكتەسەتىن دەندروكارتا جاسالماق.
«مەملەكەت باسشىسىنىڭ تاپسىرماسىنا سايكەس قالا ينفراقۇرىلىمىن جاقسارتۋ بويىنشا كەشەندى جۇمىستار قولعا الىنعان. پرەزيدەنت قالالاردى لايىقتى جانە تارتىمدى جاعدايدا ۇستاۋ مادەنيەتىن ەنگىزۋدىڭ ماڭىزدىلىعىن اتاپ ءوتتى.
اۋىل تۇرعىندارى, مەملەكەتتىك مەكەمەلەردىڭ قىزمەتكەرلەرى, ەتنومادەني بىرلەستىكتەردىڭ, بيزنەس وكىلدەرى, ستۋدەنتتەر ەكولوگيالىق اكتسياعا بەلسەندىلىكپەن قاتىسىپ جاتىر», دەيدى وبلىس اكىمى.
ەربول قاراشوكەەۆ اباتتاندىرۋ جانە كوگالداندىرۋ جۇمىستارى الەۋمەتتىك نىساندار مەن ينفراقۇرىلىم سالۋ جوبالارىنىڭ اجىراماس بولىگى بولۋى ءتيىس دەپ ەسەپتەيدى.
وسى جىلى وبلىستا 56 كوپقاباتتى تۇرعىن ءۇيدىڭ (2 909 پاتەر) قۇرىلىسىنا 12,3 ميلليارد تەڭگە بولىنگەن. جىل قورىتىندىسى بويىنشا 54 ءۇي (2 749 پاتەر) پايدالانۋعا بەرىلەدى.
حالىقتىڭ الەۋمەتتىك وسال توپتارى ءۇشىن 1 575 پاتەر ساتىپ الۋ جوسپارلانعان (رەسپۋبليكالىق بيۋدجەتتەن, «سامۇرىق-قازىنا» قورى). بۇدان بولەك, 14,2 مىڭ ورىنعا ارنالعان 41 ءبىلىم بەرۋ, 24 دەنساۋلىق ساقتاۋ نىسانىنىڭ, 15 دەنە شىنىقتىرۋ-ساۋىقتىرۋ كەشەنىنىڭ قۇرىلىسى باستالادى.
ەربول قاراشوكەەۆتىڭ ايتۋىنشا, وڭىردەگى اۋماقتاردى كوگالداندىرۋ جانە اباتتاندىرۋ جونىندەگى ەكولوگيالىق ناۋقان جۇيەلى تۇردە جالعاسادى.
