القالى جيىندا پرەزيدەنت قاسىم-جومارت توقاەۆ ەلىمىزدىڭ مىزعىماس بىرلىگى, حالقىمىزدىڭ ىنتىماعى مەن جوعارى ازاماتتىق جاۋاپكەرشىلىگى وسى قيىن كۇندەردە ايقىن كورىنگەنىن اتاپ ءوتتى. راسىمەن دە, ءدال وسى قيىن-قىستاۋ تۇستا اباي اتامىز ايتقانداي, «ادامزاتتىڭ ءبارىن ءسۇي» دەپ مەڭزەگەن باۋىرمالدىق ۇعىمى, قازاقتىڭ باعزىدان كەلە جاتقان ەرەكشە قاسيەتى. ەلدەگى توتەنشە جاعداي سول باۋىرمالدىقتى ەرەكشە كورسەتكەن كەزەڭ بولدى.
ءوڭىر-وڭىرلەرگە قانشاما تىلشىلەر بارىپ, ناقتى, رەسمي اقپاراتتار تاراتىپ جاتىر. ءبىز ەرىكتى بولىپ, سول ايماقتارعا تابانىمىز تيمەسە دە, باستى ميسسيامىز – رەسمي اقپارات تاراتۋ.
ارينە, حالىققا وڭاي بولىپ وتىرعان جوق. ولاردىڭ رەنىشى ورىندى. ءبىر جاعىنان, مىنا كۇردەلى كەزەڭدە قاي سالادا ولقىلىقتار بارىن, قاي سالانى ءالى دە ىلگەرىلەتۋ كەرەك ەكەنىن ايقىندادىق. مۇنى پرەزيدەنت تە قاداپ ايتتى. ماسەلەن, رەسپۋبليكا بويىنشا گيدرولوگيا سالاسىندا ماماندار تاپشى. ماماندار ساباقتاستىعى دەگەن ءۇزىلىپ بارا جاتقاندىعىن, وسى سالانىڭ زەينەتتەگى اعا بۋىن وكىلدەرى دە ايتىپ جاتىر. قىسقاسى, سالا ماماندارىن ازىرلەۋ, گيدرولوگيالىق قىزمەتتى جانداندىرۋ, بوگەتتەردى سالۋ ماسەلەلەرى قۇرعاق ءسوز رەتىندە قالماي, ءوز ناتيجەسىن بەرەتىنىنە سەنىم مول.
سەسسيادا مەملەكەتتىك ءتىل مارتەبەسى دە تىسقارى قالمادى. سەبەبى قوعامدا قازاقشاعا شورقاقتاۋ كەلەتىن وتانداستارىمىز ءالى دە بارشىلىق. دەسە دە تەندەنتسيا بويىنشا, اسىرەسە وزگە ەتنوس وكىلدەرى اراسىندا قازاق تىلىنە قىزىعاتىندار, ءوز بەتىنشە وقىپ, مەڭگەرىپ جاتقاندار كوپ. وعان ۇلتتىق ارنانىڭ «شاڭىراق» باعدارلاماسى بارىسىندا كوز جەتكىزدىم. ءۇش ماۋسىمدا 60 شاقتى باعدارلاما ءتۇسىرىلدى. مۇنى رەسپۋبليكانىڭ ءار ازاماتى تەلەديدارعا تەلمىرە وتىرىپ كورمەسە دە, الەۋمەتتىك جەلىلەر ارقىلى باقىلايدى. اسىرەسە YouTube پلاتفورماسىندا قارالىمى جەتىپ ارتىلادى. جوبانىڭ باستى ميسسياسى – ەتنوس وكىلدەرىن كورسەتىپ, مەملەكەتتىك يدەولوگيانى, وتباسىلىق قۇندىلىقتاردى دارىپتەۋ.
قازىر ەتنوس وكىلدەرى, اسىرەسە جاستار اراسىندا مەملەكەتتىك ءتىلدى ءوز بەتىنشە ۇيرەنىپ, قۇرعاق ءسوز رەتىندە ەمەس, جۇرەك سۇزگىسىنەن وتكىزىپ, قازاق حالقىنا العىسىن ءبىلدىرىپ جۇرگەن ازاماتتار جەتەرلىك. قازاق مادەنيەتىنە, سالت-داستۇرىنە سىڭگەن ەتنوس وكىلدەرى وتە كوپ. ءبىزدىڭ ماقساتىمىز – تاتۋلىقتى تۋ ەتەتىن جانداردى كورەرمەنگە, ءار وتانداسىمىزعا كورسەتۋ.
اللا گاۆرينا,
«قازاقستان» رترك اق «تاڭشولپان» باعدارلاماسىنىڭ جۇرگىزۋشىسى
