فوتو: تۇرار قازانعاپوۆ
كونكۋرستىق ىرىكتەۋ 2024 جىلعى 10 مامىردان 30 قاراشاعا دەيىن وتەدى. قۇجاتتار egov.kz پورتالى ارقىلى قابىلدانادى. ال «500 عالىم» بويىنشا وتىنىمدەردى قابىلداۋ جانە كونكۋرستىق ىرىكتەۋ العاش رەت bolashak.gov.kz پورتالىندا «ۇمىتكەردىڭ جەكە كابينەتى» بولىمىندە ونلاين جۇرگىزىلەدى.
ايتا كەتەيىك, بيىل ينجەنەرلىك-تەحنيكالىق جانە مەديتسينالىق ماماندىقتارعا باسىمدىق بەرىلەدى.
2024 جىلى «بولاشاق» باعدارلاماسى بويىنشا وقۋ ءۇشىن 555 ستيپەنديا ءبولىندى. ونىڭ ىشىندە 395 ستيپەنديا ماگيستراتۋرا جانە رەزيدەنتۋرا, دوكتورانتۋرا باعدارلامالارى بويىنشا – 50 ستيپەنديا, تاعىلىمدامادان ءوتۋ ءۇشىن - 110 ستيپەنديا ءبولىندى.
«باسىم ماماندىقتار تىزبەسى ورتالىق جانە جەرگىلىكتى مەملەكەتتىك ورگانداردىڭ وتىنىمدەرى, قىسقا مەرزىمدى جانە ۇزاق مەرزىمدى دامۋ ستراتەگيالارى مەن جوسپارلارى بويىنشا قالىپتاستىرىلدى. ۇمىتكەرلەر سۋ قاۋىپسىزدىگى جانە سۋ بۇرۋ, اگروورمان شارۋاشىلىعى, قۇرىلىس, اوك, جاساندى ينتەللەكت, مولەكۋلالىق گەنەتيكا سياقتى وزەكتى ماماندىقتار بويىنشا شەتەلدە دايىندىقتان وتە الادى», دەلىنگەن «حالىقارالىق باعدارلامالار ورتالىعى» اق تاراتقان حابارلامادا.
«بولاشاق» ستيپەندياسى بويىنشا كۆوتالىق ساناتتار دا قاراستىرىلعانىن ايتا كەتۋ كەرەك. اتالعان ساناتقا ينجەنەرلىك-تەحنيكالىق قىزمەتكەرلەر, مەديتسينا ماماندارى جانە اۋىلدىق جەرلەردە تۇراتىن كانديداتتار كىرەدى. كۆوتانىڭ ەرەكشەلىگى - ۇمىتكەرلەر تەگىن تىلدىك دايىندىقتان وتە الادى.
«500 عالىم» باعدارلاماسى الەمنىڭ جەتەكشى عىلىمي ورتالىقتارىندا قازاقستان عالىمدارىنىڭ بىلىكتىلىگىن ارتتىرۋ ماقساتىندا مەملەكەت باسشىسىنىڭ تاپسىرماسىنا سايكەس بەكىتىلدى. بۇل باعدارلاما بويىنشا جىل سايىن 500 ستيپەنديا بولىنەدى.
مەملەكەت اكادەميالىق وقۋعا, تاعىلىمدامادان وتۋگە, ۇشۋعا, مەديتسينالىق ساقتاندىرۋعا, ۆيزالىق الىمدارعا, وقۋ ماتەريالدارىن ساتىپ الۋعا جۇمسالاتىن شىعىنداردى جابادى, سونداي-اق اي سايىنعى ستيپەنديا تولەنەدى.
ۇمىتكەرلەرگە قويىلاتىن تالاپتار, ماماندىقتار تىزبەسى, ۋنيۆەرسيتەتتەر مەن عىلىمي ورتالىقتاردىڭ ءتىزىمى bolashak.gov.kz سايتىندا جاريالانعان.
