كوللاجدى جاساعان – الماس ماناپ, «EQ»
كۋرستار زاماناۋي بلوكچەين تەحنولوگيالارى مەن كريپتوۆاليۋتا الەمىنىڭ نەگىزگى ۇعىمىن اشۋعا باعىتتالىپ, «NFT» جانە «GameFi»-گە كىرىسپە تۇرىندە ءوتتى.
«كۋرس سەرياسىن ۇيىمىمىزدىڭ تاجىريبەلى بلوكچەين ازىرلەۋشىلەرى جاسادى. ولار ساباقتىڭ ءار بولىمىنە بارلىق قاتىسۋشى ءۇشىن مەيلىنشە پايدالى ءارى ءتيىمدى اقپاراتتى ەنگىزدى», دەدى «TechCompany» ديرەكتورى ارتۋر سۇندەتوۆ.
ەلىمىزدەگى بلوكچەين تەحنولوگيالار جانە داتا ورتالىقتار قاۋىمداستىعىنىڭ توراعاسى داۋرەن قاراشەۆتىڭ ايتۋىنشا, «بلوكچەين جانە جاساندى ينتەللەكت مەكتەبى» ەكونوميكانىڭ ءوسۋى مەن ەل ازاماتتارىنىڭ تسيفرلىق ساۋاتىن ارتتىرۋعا ىقپال ەتەدى. سونداي-اق يننوۆاتسيالار مەن جاڭا ستراتەگيالىق ماڭىزدى تەحنولوگيالاردى دامىتۋعا قولايلى ورتا جاسايدى.
بارلىق شەبەرلىك ساعاتى يننوۆاتسيالىق تەحنولوگيالار مەن قارجى قۇرالدارى الەمىنە بويلاۋعا مۇمكىندىك بەرەدى. بۇل جوبا ەل تۇرعىندارىنىڭ تسيفرلىق ساۋاتتىلىعىن ارتتىرۋ ءۇشىن قولعا الىنعان.
ايتا كەتەيىك, الداعى 22 ساۋىردە «بلوكچەين جانە جاساندى ينتەللەكت مەكتەبى» «جاساندى ينتەللەكت: قازىرگى زاماننىڭ باستى تالابى» تاقىرىبىندا تەگىن بازالىق كۋرستار مەن شەبەرلىك ساعاتىنىڭ ءۇشىنشى ءمودۋلىن ىسكە قوسادى. كۋرستى جي سالاسىنداعى ساراپشى, «Omega Server.Inc» ديرەكتورلار كەڭەسىنىڭ مۇشەسى, بىرنەشە تانىمدىق كىتاپتىڭ اۆتورى اناتولي گين جۇرگىزەدى.
