«اكادەميانىڭ 400 اسكەري قىزمەتشىسى جانە 19 تەحنيكاسى پەتروپاۆل قالاسىنىڭ ەلدى-مەكەندەرىندەگى (ولشانكا اۋىلى, بەسكول ك., گورۆودوكانال, پەسترىي كولى, لەسحوز) سۋ تاسقىنىنا قارسى جۇمىستاردى اتقارۋعا بەلسەندى قاتىسىپ جاتىر», دەدى ۇلتتىق ۇلان اكادەمياسىنىڭ باستىعى پولكوۆنيك ارتۋر توقىشەۆ.
20 ناۋرىزدان باستاپ بۇگىنگى كۇنگە دەيىن اكادەميانىڭ كۋرسانتتارى سقو-نىڭ پريبرەجنىي, كوجەۆەننىي, ولشانكا, زارەچنىي, بەسكول ەلد مەكەندەرىندە, سونداي-اق پەتروپاۆل قالاسىنىڭ شەتكى ايماقتارىنداعى سولنەچنىي, بەرەكە, پودگارا, رابوچي ىقشام اۋداندارىندا سۋ تاسقىنىن بولدىرماۋ جانە اپاتتىڭ سالدارىن جويۋ جۇمىستارىن اتقارىپ جاتىر.
سونىمەن قاتار ۇلتتىق ۇلان كۋرسانتتارى, ساربازدارى مەن قورعانىس مينيسترلىگى جاۋىنگەرلەرى پەتروپاۆل قالاسىنىڭ «قىزىلجار سۋ» جشس-ءنىڭ اۋىزسۋعا ارنالعان سورعى ستانتسياسىن تاسقىن قاۋپىنەن قورعاۋ ءۇشىن توسقاۋىل قويۋ جۇمىسىن تۇنگى ۋاقىتتا كىرپىك ىلمەستەن تىنىمسىز اتقاردى. قولدانىلعان ءتيىستى شارالار مەن كۋرسانتتاردىڭ جانقيارلىق ەڭبەگىنىڭ ناتيجەسىندە قالا تۇرعىندارىن اۋىزسۋمەن قامتاماسىز ەتۋ قۇرىلعىلارى ىسكە قوسىلدى.
