فوتو: kaz.orda.kz
دەپۋتاتتىڭ ايتۋىنشا, ماسەلەگە ەل پرەزيدەنتى ارالاسىپ, اۋە جانە تەمىر جول بيلەتتەرى باعاسىنىڭ وسۋىنە جول بەرمەۋ جونىندە قاتاڭ ەسكەرتتى. وسىعان وراي «قازاقستان تەمىر جولى» كومپانياسى وزدەرىنە قاراستى «جولاۋشىلار تاسىمالى» اق پويىزدارىنىڭ بيلەتتەرى قىمباتتامايتىنىن حابارلادى. Qazaq Air اۋە كومپانياسى ەلىمىزدىڭ بىرقاتار وڭىرلەرىندەگى سۋ تاسقىنىنا بايلانىستى تۇراقسىز جاعدايدى ەسكەرە وتىرىپ, اۋە بيلەتتەرىنىڭ جوعارعى قۇنىن ءبىر باعىتقا 40 000 تەڭگەگە دەيىن ارزانداتتى. كومپانيا بۇل ۋاقىتشا تاريفپەن ەلدەگى سۋ تاسقىنىنان زارداپ شەككەن بارلىق وڭىرلەردىڭ باعىتتارىندا 24 ساۋىرگە دەيىن ارەكەت ەتەتىنىن مالىمدەدى.
«ال ەلىمىزدەگى ەڭ ءىرى اۋە كومپانياسى – Air Astana توبى 9-18 ءساۋىر ارالىعىندا اتىراۋدان الماتى, استانا, اقتاۋ جانە شىمكەنت قالالارىنا 33 قوسىمشا رەيس ۇيىمداستىرىلعانىن مالىمدەۋمەن عانا شەكتەلدى. اۋە قاتىناسى بويىنشا ىشكى رەيستەر باعاسىنىڭ تىم قىمباتتاۋى بۇعان دەيىن دە بىرنەشە رەت كوتەرىلدى. بىراق تۇبەگەيلى وزگەرىستى كورىپ وتىرعان جوقپىز. سوڭعى جاعدايلارعا بايلانىستى باعانىڭ ودان ءارى شارىقتاۋى, شەكتەن شىعۋشىلىق دەپ بىلەمىز. ۇشاتىن كۇن جاقىنداعاندا بيلەت باعاسىن ادەيى ءوسىرۋ – ناعىز قيانات. كۇنى كەشە ءماجىلىس دەپۋتاتى سامات مۇساباەۆتىڭ كولىك مينيسترىنە الەۋمەتتىك جەلى ارقىلى جولداعان تالابى مۇلدەم جاۋاپسىز قالدى. نەگە جاۋاپ جوق؟ الدە ءمينيستردىڭ اۋە كومپانيالارىنا بيلىگى جۇرمەي مە؟ ەلدەگى كولىك سالاسى تەك قاۋىپسىز جانە ساپالى بولىپ قانا قويماي, كوپشىلىككە قولجەتىمدى بولۋى كەرەك. وسىنى كولىك كومپانيالارىنان تالاپ ەتۋ قاجەت», دەدى دەپۋتات.
ماجىلىسمەننىڭ ايتۋىنشا, زات باعاسى دا قىرىق قۇبىلىپ تۇر. حالىق تاسقىنعا قارسى جۇدىرىقتاي جۇمىلىپ جاتقاندا كەيبىر الىپ-ساتارلار قارا باسىنىڭ قامىن كۇيىتتەپ ءجۇر. قۇنى 50 تەڭگە تۇراتىن قاپشىقتىڭ باعاسىن 200-300 تەڭگەگە دەيىن ءوسىرىپ, اسىرا پايدا تاۋىپ جاتقاندار از ەمەس. وسىنداي كۇردەلى كەزەڭدە باعا تۇراقتىلىعىن, اسىرەسە, تاسقىنعا قارسى قولدانىلاتىن جابدىقتاردىڭ جانە قۇرىلىس ماتەريالدارىنىڭ باعاسىن ۇستاۋ - مەملەكەتتىڭ باستى مىندەتى.
دەپۋتاتتىق ساۋالىندا ەدىل جاڭبىرشين تاعى ءبىر اسا ماڭىزدى ماسەلەنى كوتەردى. ونىڭ سوزىنشە, توپاننىڭ سالدارى وڭىرلەردە كۇردەلى سانيتارلىق-ەپيدەميولوگيالىق جانە ەكولوگيالىق اپاتتارعا الىپ كەلۋى مۇمكىن. مۇنى ساراپشىلار دا, تۇرعىندار دا ايتىپ, دابىل قاعىپ وتىر. سۋ تاسقىنى زيراتتاردى, قاتتى-تۇرمىستىق قالدىقتاردى, مال ولەكسەلەرى كومىلگەن ورىنداردى, دالاداعى دارەتحانالاردى, جانار-جاعارماي ستانتسيالارىن دا شايىپ ءوتتى. ءتىپتى, زيراتتا جەرلەنگەن ادام سۇيەگى دە سىرتقا شىعىپ كەتكەن جاعدايلار انىقتالدى.
دەپۋتاتتىڭ پىكىرىنشە, ۇكىمەت كەلەسى ماسەلەلەردى شۇعىل تۇردە شەشۋ قاجەت:
- ەلىمىزدەگى اۋە, تەمىر جول, اۆتوموبيل كولىكتەرى تاسىمالداۋشىلارىنىڭ باعالارى تۇراقتى باقىلاۋعا الىنىپ, ونىڭ نەگىزسىز كوتەرىلۋىنە جول بەرىلمەسىن. اسىرەسە, توپان سۋدان زارداپ شەككەن وڭىرلەردى جالعايتىن كولىك قاتىناسىنا ەرەكشە نازار اۋدارۋ ماڭىزدى.
- اۋە قاتىناستارى تاريفتەرىنىڭ وسپەۋىن تەك 24 ساۋىرگە دەيىن ۇستاپ تۇرماي, ودان كەيىن دە بيلەت باعاسىنىڭ جىل ون ەكى اي تۇراقتى بولۋ ماسەلەسى قاراستىرىلسىن.
- تاسقىن بولعان وڭىردەگى الەۋمەتتىك ماڭىزى بار ازىق-ت ۇلىك, جانار-جاعارماي, قۇرال-سايمان, قۇرىلىس ماتەريالدارىنىڭ جانە تاعى باسقا تاۋار تۇرلەرىنىڭ باعاسىن تۇراقتاندىرۋدى قولعا الۋ قاجەت.
- قازىردەن باستاپ ۇكىمەت ءتيىستى مينيسترلىكتەر مەن ۆەدومستۆولارمەن بىرىگىپ, جۇقپالى اۋرۋلارعا قارسى جەدەل كەشەندى شارالار قابىلداسىن.
ماجىلىسمەن دەپۋتاتتىق ساۋالىن: «بۇل اپات كوزگە كورىنبەي, ىشتە جاسىرىن جاتقان ءبىراز كەمشىلىكتەرىمىزدى اشىپ جاتىر. اعىن سۋ مەملەكەتتەگى «ەسكى اۋرۋلارىمىزدى» تازالاۋعا دا سەبەپشى بولادى دەگەن ءۇمىتىمىز بار. وسى توتەنشە جاعداي بارىمىزگە ساباق بولۋى ءتيىس. حالقىمىزدىڭ ء«بىر قيىندىقتىڭ ارتىندا ەكى جاقسىلىق بار» دەگەن دانا ءسوزى بار. جاقسىلىق تا, بەرەكە دە ارەكەتپەن كەلەدى. سوندىقتان حالىق پەن بيلىك بىرگە قيمىلداپ, توپان سۋ زاردابىن تەز ارادا جويۋعا كۇش سالۋ قاجەت», دەپ تۇيىندەدى
