«ايتا كەتۋ كەرەك, بىزدە 12 مىڭ بالا قولايسىز ساناتتا ەسەپتە تۇرعان وتباسىلاردا تۇرادى. بۇل رەتتە بالالار ۇيدە اتا-اناسىنىڭ قاسىندا, ولاردى ەشكىم قۇقىعىنان ايىرعان جوق. ولارمەن پروفيلاكتيكالىق جۇمىستار جۇرگىزىلەدى, بۇل وتباسىلار ۇنەمى باقىلانادى», دەدى دينارا زاكيەۆا.
ونىڭ ايتۋىنشا, بۇل بالانىڭ ءوز وتباسىندا ءومىر ءسۇرۋ مۇمكىندىگىن بارىنشا ساقتاۋ ءۇشىن جاسالىپ جاتىر.
«مەملەكەتىمىزدىڭ ماقساتى – وتباسى ينستيتۋتىن نىعايتۋ. سوندىقتان بالانى سەبەپسىز الىپ كەتۋ دۇرىس ەمەس», دەپ قوستى د.زاكيەۆا.
سونداي-اق دينارا زاكيەۆا تۇرمىسى تومەن نەمەسە ناشار وتباسىلارداعى بالالاردى اكەتۋدىڭ جاڭا زاڭنامالىق تەتىكتەرىن ەنگىزۋ مۇمكىندىگىنە قاتىستى پىكىر ءبىلدىردى.
«قازىرگى قولدانىستاعى زاڭنامادا, وتباسى كودەكسىندە بالالاردى اكەتۋدىڭ, اتا-انا قۇقىعىنان ايىرۋدىڭ جانە شەكتەۋدىڭ بارلىق نەگىزدەرى بەكىتىلگەن. جاڭا سەبەپتەر جوق», دەدى ول.
ەستەرىڭىزگە سالا كەتەيىك, بۇگىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكى وقىلىمدا ماقۇلداندى.
