سەنات توراعاسىنىڭ ايتۋىنشا, مۇنداي احۋال سوڭعى 80 جىلدان بەرى بولماعان. قارعىن سۋدىڭ سالدارىنان ەلىمىزدىڭ بىرقاتار وڭىرىندە كۇردەلى جاعداي قالىپتاسىپ وتىر. وسىعان بايلانىستى مەملەكەت باسشىسى قاسىم-جومارت كەمەل ۇلى توقاەۆ قازاقستان حالقىنا ۇندەۋىن جاريالاپ, تاسقىننىڭ سالدارىن جويۋ ءۇشىن قابىلدانىپ جاتقان شارالارعا توقتالدى.
«پرەزيدەنتىمىزدىڭ تاپسىرماسىنا سايكەس پرەمەر-ءمينيستردىڭ باسشىلىعىمەن رەسپۋبليكالىق شتاب قۇرىلدى. ۇكىمەت مۇشەلەرى جانە ءتيىستى ۆەدومستۆو وكىلدەرى اپات بولعان ايماقتاردا ءجۇر. قيىن احۋالدى ەڭسەرۋ ءۇشىن كۇشتىك قۇرىلىمدار دا بەلسەندى اتسالىسىپ جاتىر. بارلىق قۇتقارۋ جۇمىستارى مەملەكەت باسشىسىنىڭ تىكەلەي باقىلاۋىندا.
وسى رەتتە پارلامەنت, ونىڭ ىشىندە سەنات دەپۋتاتتارى دا وڭىرلەرگە بارىپ, تاسقىن سۋعا قارسى ءىس-قيمىل جونىندەگى وڭىرلىك جەدەل شتابتاردىڭ جۇمىسىنا ۇلەس قوسىپ جاتقانىن اتاپ وتكەن ءجون. سەناتورلار اپاتتىڭ بەتى قايتىپ, جاعداي تۇراقتالعانشا تۇرعىندارمەن بىرگە بولادى.
مەملەكەت باسشىسى زارداپ شەككەن ازاماتتاردىڭ شىعىندارى تولىق وتەلەتىنىن ايتتى. بىردە-ءبىر ادام ەسكەرۋسىز قالمايدى. وسىعان وراي مەملەكەتتىك ماتەريالدىق رەزەرۆتى پايدالانۋ تاپسىرىلدى.
پرەزيدەنتىمىز اتاپ وتكەندەي, الداعى ۋاقىتتا اپاتتان ءتيىستى ساباق الىپ, قورىتىندى شىعارۋىمىز كەرەك. سوعان سايكەس الدىن الۋ جۇمىسىنداعى كەمشىلىكتەردى جويىپ, ونداي ولقىلىقتاردىڭ قايتالانباۋىن قامتاماسىز ەتۋىمىز قاجەت.
وسىنداي كۇردەلى كەزەڭدە جالعان اقپاراتقا بوي الدىرماي, رەسمي كوزدەر تاراتقان مالىمەتتەرگە عانا جۇگىنۋ دە اسا ماڭىزدى. سونداي-اق مۇنداي جاعدايدا قوعامنىڭ جۇدىرىقتاي جۇمىلىپ, بىرلەسىپ ارەكەت ەتكەنى ابزال.
قازىردىڭ وزىندە وڭىرلەردە ۆولونتەرلەر مەن جەرگىلىكتى تۇرعىندار ءوز كۇشتەرىمەن تاسقىنعا توسقىن بولىپ جاتقانىن بىلەمىز. وزگە وبلىستارداعى ازاماتتار مەن كاسىپكەرلەر دە بەلسەندىلىك تانىتىپ جاتىر. وسىنداي بەكەم بىرلىكتىڭ ارقاسىندا بۇل قيىندىقتى دا ەڭسەرىپ شىعامىز دەپ تولىق سەنەمىز», دەپ جازدى ماۋلەن اشىمباەۆ.
